Ang mga bata nga “nabun-ag nga may diperensia nga mahibaluan tani paagi sa prenatal screening” indi na makaakusar sa mga doktor bangod gintugutan sila nga mabuhi, report sang Haaretz.com. Pero bangod gintugutan nila ang bata nga mabun-ag, mahimo sila akusaron sang mga ginikanan para mabayran nila ang “dugang nga gasto sa pagpadaku sa may diperensia nga bata kag sa [iya] mga kinahanglanon sa bilog niya nga kabuhi.”

Sa Australia, 8 sa 10 ka mag-asawa ang naga-live in anay antes magpakasal.

Ang estadistika nga ginpagua sang Greek Ministry of Health nagapakita nga nagtaas sing 40 porsiento ang mga naghikog sa Gresya sang una nga lima ka bulan sang 2011 kon ikomparar sa amo man nga mga bulan sang 2010. Ini nga pagtaas nagdungan sa pagnubo sang ekonomiya sining karon lang.

Suno sa Natural Resources Defense Council, halos 40 porsiento sang pagkaon sa bilog nga pungsod ang nagakauyang lang. Halimbawa, ginabulubanta nga 7 ka porsiento sang alanyon ang wala naani, 17 porsiento sang mga pagkaon sa mga restawran kag mga karinderya ang wala makaon, kag mga 25 porsiento sang pagkaon nga ginbakal sang mga pamilya ang ginahaboy lang.

Ang pinakagamay nga kameleon sa kalibutan nakita sining karon lang sa Madagascar. Nagalaba lamang ini sing mga 29 milimetros, kag ang iban sini makatungtong sa kuko. Pero bangod sa pagkaguba sang ila ilistaran, ara ini sa katalagman nga mapapas.