Ang World Health Organization nagsiling nga kon pirme ka makahaklo sing aso sang salakyan “mas daku ang posibilidad nga magbalatian ka sing kanser sa baga” kag sa barukan.

May natukiban nga mga fossil sang polen kag spore sang tanom sa idalom sang dagat nga nagapakita nga nagtubo man sa Antartica sang una ang mga palma kag iban nga kahoy nga nagatubo lang sa tropikal nga mga rehiyon subong. Madamo ang nagapati nga minilyon ka tuig ang nagligad, indi tuman ka tugnaw sa Antartica. Kag ang temperatura sa polar region daw pareho lang sa mga lugar malapit sa ekwador.

Suno sa report nga ginpagua sang 2012 sang Ireland’s Association of Catholic Priests, 87 porsiento nga mga Katoliko nga ginsurbe sa sini nga pungsod ang nagapati nga dapat tugutan nga mangasawa ang mga pari; 77 porsiento ang nagapati nga dapat tugutan ang mga babayi nga mangin pari.

Ginpakita sang pag-usisa nga ang mga bulong para sa malaria nga gingamit sa iban nga lugar indi maayo ang kalidad ukon peke, amo nga wala ini nakapaayo. Sa Southeast Asia, 36 porsiento sang mga sampol nga bulong nga gintestingan ang napamatud-an nga peke, kag 20 porsiento naman sa sub-Saharan Africa.

Sang tungatunga sang Abril 2012, gin-anunsio sang mga opisyal sang gobierno nga pagligad sang halos tatlo ka tuig, amo pa lang ini ang adlaw nga wala sing krimen sa El Salvador. Bangod sa droga, 69 sa kada 100,000 ka tawo ang ginpatay sang 2011—isa sa pinakagrabe nga report sa bilog nga kalibutan.