Ngaa nangin interesado ka sa siensia?

Sang bata pa ako, nanamian gid ako sa palibot. Nagdaku ako sa Richterswil, isa ka matahom nga baryo sa Switzerland sa day-ahan sang Lake Zurich. Nagalakatlakat kami diri sang akon ginikanan kag mga magulang kag ginasugiran nila ako parte sa mga sapat kag tanom nga amon maagyan.

Ngaa nagtuon ka sang orthopedic surgery?

Nakaobra anay sa ospital ang akon amay bilang kabulig sang doktor sa pag-opera. Nanamian gid sia sa iya mga nakita didto amo nga ginasugid niya ini sa amon. Bangod sini, nagkuha ako sing kurso parte sa pag-opera. Nangin espesyalista ako sa orthopedic surgery bangod nanamian ako sini. Ang mga orthopedic surgeon dapat mamensar pareho sang engineer agod makay-o nila ang mga tul-an, maskulo, kag mga lanitlanit para makagiho kita.

Labaw sa tanan, nalipay ako nga makita nga nagaayo ang akon mga pasyente. Nanamian gid ako mag-obra upod sa mga tawo.

Ngaa ginduhaduhaan mo ang pagluntad sang Dios?

Nagsugod ini sang pamatan-on ako, kag duha ka butang ang nag-impluwensia sa akon. Una, nadiskobrehan ko nga imoral ang pila ka nagatudlo sa simbahan amo nga natublag gid ako sini. Ikaduha, ang pila ko ka manunudlo nagapati sa ebolusyon nga ginpatihan ko man, ilabi na sang kolehiyo na ako.

Ngaa ginpatihan mo ang ebolusyon?

Nagapati ako sa akon mga propesor. Isa pa, abi ko ang magkaanggid nga bahin sang lawas sang pila ka sahi sang sapat isa lang ang ginhalinan kag ginasakdag sini ang teoriya parte sa genetic mutation nga nagadul-ong sa bag-o nga sahi.

 Pero ngaa nagbag-o ang imo pensar?

Gin-agda ako sang akon abyan sa miting sang mga Saksi ni Jehova. Nanamian gid ako sang ila pagkamainabyanon kag madamo ako sang natun-an sa mga pamulongpulong. Sang ulihi, ginduaw ako sang mabuot nga babayi nga Saksi, kag ginpamangkot ko sia, “Paano ko masigurado nga matuod ang Biblia?”

Ginpakita niya sa akon ang mga tagna sa Biblia parte sa mga hitabo nga nagalaragway sang aton tion. Ang isa ka halimbawa amo ang tagna ni Jesus parte sa tanda sang katapusan nga mga adlaw nga amo ang pag-ilinaway sang mga pungsod, “mabaskog nga mga linog,” kag lapnag nga “mga peste kag kakulang sa pagkaon.” * Ginpakita man niya ang mga tagna parte sa pagkaguba sang katilingban kag paglapnag sang kakagod kag kalautan subong. * Wala magdugay, nagtuon ako sa Biblia kag narealisar ko nga nagakatuman ang tanan nga tagna sini. Gin-usisa ko man liwat ang akon pagtamod sa ginhalinan sang kabuhi.

Nakabulig bala sa imo ang pagtuon sa medisina nga patihan ang ginhalinan sang kabuhi?

Huo. Sang nagtuon ako sa Biblia, naga-research ako parte sa pag-opera sa tuhod. Sugod sang hingapusan sang katuigan 1960, mas nangin maathag sa mga sientipiko ang masibod nga desinyo sang tuhod. Nadiskobrehan nila nga ang aton tuhod wala lang nagatiko pareho sang bisagra, kundi nagatiyog ini kag nagahulag amo nga makalakat kita, makasaot, maka-skate, kag makahimo sang madamo pa nga butang.

Sa sulod sang mga 40 ka tuig, gintinguhaan sang mga researcher nga maghimo sang artipisyal nga tuhod. Pero nabudlayan sila nga ilugon ang matuod nga tuhod bangod sang kasibod sini. Kag kon ikumparar sa aton tuhod, wala nagadugay ang artipisyal nga mga produkto. Bisan pa sang maayo nga mga materyales nga ila ginagamit, ang mga nagdesinyo sini nalipay na kon magdugay ang ila produkto sing 20 ka tuig. Siempre, ang aton tuhod ginahuman sang buhi nga mga selula nga pirme nagabag-o. Para sa akon, ang tuhod nagapamatuod sang kaalam sang Dios sa baylo sang ebolusyon.

Ano ang imo pagtamod sa mutation kag pagkaanggid sa bahin sang lawas sang pila ka sahi sang sapat?

Ina nga pagkaanggid nagapamatuod nga may isa ka Manugdesinyo. Dugang pa, wala ginapanami sang mutation ang desinyo sang buhi nga mga organismo. Sa baylo, ginaguba sini ang mga gene. Siempre, mahimo nga ang isa ka aksidente may maayo nga resulta—halimbawa, nabungguan kag naguba sang tren ang taytay, amo nga wala nakasulod ang nagasalakay nga mga soldado. Pero wala ginpanami sang aksidente ang siudad. Sing kaanggid, ang mutation wala nagapanami sa mga organismo. Kag indi gid ini makahimo sang tumalagsahon nga desinyo pareho sang tuhod sang tawo kag iban pa nga bahin sang lawas.

Ngaa nangin Saksi ni Jehova ka?

Sang gin-aplikar ko ang mga prinsipio sa Biblia, daku gid ang pagbag-o sang akon kabuhi. Dugang pa, sang 2003, nagtambong ako sa isa ka internasyonal nga kombension sang mga Saksi ni Jehova kag nakita ko ang pinasahi nga paghiusa pareho sang pamilya, bisan pa indi sila kilalahay. Ginpakita gid nila ang matuod nga gugma sa isa kag isa kag gusto ko nga mangin bahin sini.