Ang pamangkot kon bala may Dios ukon wala ginakabig sang madamo nga indi masabat ukon indi importante. Si Hervé, nga nagdaku sa Pransia, nagsiling: “Bisan pa indi ako ateista ukon agnostiko, wala ako sing ginatuuhan. Para sa akon, ang pinakamaayo nga paagi sa pagkabuhi amo ang paggamit sang imo sentido kumon. Indi na kinahanglan nga magpati ka pa sa isa ka dios.”

Mahimo nga ang iban pareho kay John nga taga-Estados Unidos. Nagsiling sia: “Ginpadaku ako sang mga ginikanan nga wala nagapati sa Dios. Subong pamatan-on, wala ako sing makomento kon bala may Dios. Pero, kon kaisa, ginapamangkot ko ini.”

Nakapamangkot ka man bala kon may Dios ukon wala, kag kon may yara, ano gid ang katuyuan sang kabuhi? Ayhan may nabasa ka nga mga katunayan nga mabudlay ipaathag kon wala sing Manunuga, subong sang report sang siensia tuhoy sa pagkabalanse sang kinaugali amo nga posible ang kabuhi sa aton planeta, kag sang ebidensia nga ang kabuhi wala maghalin sa wala sing kabuhi nga butang.—Tan-awa ang kahon nga “ Usisaa ang Ebidensia.”

Binagbinaga ang importansia sini nga mga katunayan. Daw kaangay ini sang karatula nga nagatudlo sa isa ka bahandi. Kon makakita ka sing mabakod nga ebidensia nga may Dios, upod ang masaligan nga impormasyon tuhoy sa iya, daku gid ang imo mabenepisyo. Yari ang apat ka halimbawa.

Kon may katuyuan ang kabuhi, luyag naton mahangpan kon ano ini kag mahibaluan ang epekto sini sa aton. Kay kon may Dios kag wala kita makahibalo sini, nagakabuhi kita nga wala mahibaluan ang pinakaimportante nga kamatuoran sa uniberso.

Nagasiling ang Biblia nga ang Dios amo ang ginhalinan sang tanan nga kabuhi. (Bugna 4:11) Paano ini nga ihibalo nagahatag sing katuyuan sa aton kabuhi? Binagbinaga kon ano ang ginatudlo sang Biblia tuhoy sini.

Sa tanan nga tinuga sa duta, tumalagsahon gid ang tawo. Suno sa Biblia, gintuga kita sang Dios agod ilugon sia kag ipakita ang iya personalidad. (Genesis 1:27) Dugang pa, ginatudlo sang Biblia nga ang tawo puede mangin abyan sang Dios. (Santiago 2:23) Wala na sing makahatag sa aton kabuhi sing mas daku nga katuyuan sangsa mangin abyan kita sang aton Manunuga.

Ano ang buot silingon nga mangin abyan sang Dios? Ang mga abyan sang Dios direkta nga nagapabutyag sang ila kaugalingon sa iya. Kag nagapromisa sia nga pamatian niya kag sabton sila. (Salmo 91:15) Subong mga abyan sang Dios, matun-an naton kon ano ang iya ginahunahuna sa madamo nga butang. Makahatag ini sa aton sing husto nga paghangop sa pinakamabudlay nga mga pamangkot tuhoy sa aton kabuhi.

Halimbawa, nabudlayan ang iban sa pagpati sa Dios bangod sang pag-antos nga makita nila sa bug-os nga kalibutan. Nagapamangkot sila, ‘Ngaa ginatugutan sang Manunuga ang pag-antos kag kalautan kon labing gamhanan sia?’

Ang makapaumpaw nga sabat sang Biblia amo nga wala gid gintuyo sang Dios nga mag-antos ang tawo. Sang gintuga ang tawo, wala sia nagaantos. Bisan gani ang kamatayon indi bahin sang orihinal nga katuyuan sang Dios para sa katawhan. (Genesis 2:7-9, 15-17) Mabudlay bala ini patihan? Pantasya lang bala ini? Indi. Kon may labing gamhanan nga Manunuga kag kon ang gugma amo ang iya panguna nga kinaiya, mapaabot naton nga amo gid sini nga kabuhi ang gintuyo niya para sa mga tawo.

Ngaa amo sini karon ang kahimtangan sang tawo? Ginapaathag sang Biblia nga gintuga sang Dios ang tawo nga may kahilwayan sa paghimo sing desisyon. Indi kita mga robot nga ginapilit sa pagtuman sa Dios. Nagdesisyon ang una nga mag-asawa, nga ginhalinan sang tanan nga tawo, nga sikwayon ang paggiya sang Dios. Ginhimo nila kon ano ang luyag nila. (Genesis 3:1-6, 22-24) Ginaantos naton karon ang masakit nga mga resulta sini.

Nalipay kita nga mahibaluan nga indi katuyuan sang Dios nga mag-antos ang tawo. Pero luyag naton nga matapos na ang pag-antos. Gani, kinahanglan naton ini nga paglaum sa palaabuton.

Sang magrebelde ang tawo, nagsaad dayon ang Dios nga tumanon niya sa ulihi ang iya orihinal nga katuyuan para sa duta. Bangod labing gamhanan sia, wala sing makapugong sa iya sa paghimo sini. (Isaias 55:11) Sa indi madugay, dulaon sang Dios ang tanan nga resulta sang pagrebelde sa iya, kag ang kahimtangan sang duta kag sang katawhan mangin suno sa iya orihinal nga katuyuan.

Ano ang kahulugan sini sa imo? Binagbinaga ang duha lang sang madamo nga saad sang Dios sa palaabuton, nga mabasa sa Biblia.

• PAGHIDAIT SA BUG-OS NGA DUTA KAG WALA NA SING KALAUTAN. “Sa indi na lang madugay, madula na ang mga malauton; pangitaon mo sila sa ila nahamtangan, kag wala na sila didto. Apang ang mga mahagop magapanubli sang duta, kag mangin malipayon gid sila sa bugana nga paghidait.”—Salmo 37:10, 11.

• WALA NA SING BALATIAN KAG KAMATAYON. “Wala sing pumuluyo nga magasiling: ‘Nagamasakit ako.’” (Isaias 33:24) “Dulaon niya sing dayon ang kamatayon, kag pahiran sang Soberanong Ginuong Jehova ang luha sa tanan nga nawong.”—Isaias 25:8.

Ngaa masaligan naton ang mga saad sang Dios nga mabasa sa Biblia? Bangod madamo nga tagna nga narekord sa Biblia ang natuman na. Pero, bisan pa may paglaum kita sa palaabuton, nagaantos gihapon kita subong. Ano ang dugang pa nga bulig nga ginahatag sang Dios?

Ginabuligan kita sang Dios sa pagsolbar sang aton mga problema kag sa paghimo sing maayo nga mga desisyon. Madamo nga desisyon ang indi gid man importante, pero ang iban sini nagaapektar gid sa aton kabuhi. Wala sing tawo nga makahatag sa aton sing kaalam nga pareho ka epektibo sa kaalam nga halin sa aton Manunuga. Ang iya pagtamod mapuslanon sa tanan nga tion kag sia ang ginhalinan sang kabuhi sang tawo. Gani nahibaluan niya kon ano ang pinakamaayo para sa aton.

Ang Biblia nagaunod sang panghunahuna ni Jehova nga Dios kay gintuytuyan niya ang mga tawo nga nagsulat sini. Ang Biblia nagasiling: “Ako si Jehova nga imo Dios, ang nagatudlo sa imo para sa imo kaayuhan, ang nagatuytoy sa imo sa dalanon nga dapat mo laktan.”—Isaias 48:17, 18.

Wala sing limitasyon ang gahom sang Dios, kag luyag niya nga gamiton ini para sa aton. Ginalaragway sang Biblia ang Dios subong mahigugmaon nga amay nga luyag magbulig sa aton. Ini nagasiling: “Ihatag gid [sang Amay] ang balaan nga espiritu sa mga nagapangayo sa iya!” (Lucas 11:13) Ini nga gahom nga halin sa Dios makagiya kag makapabakod sa aton.

Paano ka makatigayon sini nga bulig halin sa Dios? Ang Biblia nagasabat: “Ang nagapalapit sa Dios dapat magpati nga nagaluntad sia kag nagapadya sa mga hanuot nga nagapangita sa iya.” (Hebreo 11:6) Agod makumbinsi ka nga may Dios, dapat mo mismo usisaon ang ebidensia.

Kinahanglan ang tion agod makita mo ang kamatuoran tuhoy sa Dios, pero makabenepisyo gid ikaw kon himuon mo ini. Binagbinaga ang eksperiensia ni Xiujin Xiao, nga natawo sa China kag nagaistar na subong sa Estados Unidos. Nagsiling sia: “Bisan pa nagapati ako sa teoriya sang ebolusyon, interesado ako tuhoy sa Biblia. Gani, gintun-an ko ang Biblia upod sa mga Saksi ni Jehova. Sa akon hingapusan nga tuig sa kolehiyo, nangin masako ako, amo kon ngaa daw wala na ako sing tion sa mga natun-an ko sa Biblia. Daw indi ako malipayon. Pero sang ginhimo ko liwat nga prioridad ang pagtuon sa Biblia, nangin malipayon gid ako.”

Luyag mo bala makatuon sing dugang pa tuhoy sa aton Manunuga nga si Jehova nga Dios? Ngaa indi mo paghatagan sing tion nga usisaon ini?