“Kon magpangamuyo kamo, indi ninyo pagsulitsulita ang inyo ginasiling.”—Mateo 6:7.

Indi gusto ni Jehova nga sauluhon naton ang aton mga pangamuyo kag sulitsuliton ini ukon basahon halin sa isa ka prayer book. Kundi gusto niya nga ihambal naton kon ano gid ang ara sa aton tagipusuon. Imadyina kon ano ang imo batyagon kon sa adlaw-adlaw nga tanan sulitsulit lang ang ginahambal sa imo sang imo abyan. Ang maayo nga mag-abyan sinsero kag wala sing ginatago sa isa kag isa. Kon nagapangamuyo kita halin sa aton tagipusuon, ginahambal naton sa aton Amay sa langit kon ano gid ang aton ginabatyag.

“Sang nagpangayo kamo, wala kamo gihapon makabaton kay malain ang inyo katuyuan.”—Santiago 4:3.

Indi naton mapaabot nga sabton kita sang Dios kon ginapangamuyo naton ang mga butang nga indi niya gusto nga himuon naton ukon tigayunon. Halimbawa, nagpaandam si Jehova batok sa kakagod kag sa sala nga pagpati sa suerte. Ti, sabton bala ni Jehova ang pangamuyo sang isa ka tahor nga kuntani suertehon sia? (Isaias 65:11; Lucas 12:15) Gani indi husto nga magpaabot kita nga sabton ni Jehova ang amo sina nga mga pangamuyo! Para sabton kita sang Dios, dapat naton siguraduhon nga ang aton mga pangamuyo nahisanto sa ginasiling niya sa Biblia.

 “Ang wala nagapamati sa kasuguan—bisan ang iya pangamuyo ginakangil-aran.”—Hulubaton 28:9.

Sang panahon nga ginsulat ang Biblia, wala ginsabat sang Dios ang pangamuyo sang mga wala nagtuman sang iya matarong nga mga kasuguan. (Isaias 1:15, 16) Wala nagbag-o ang Dios. (Malaquias 3:6) Kon gusto naton nga sabton sang Dios ang aton mga pangamuyo, dapat kita magkabuhi suno sa iya mga kasuguan. Paano abi kon nakahimo kita sang mga sala sang una? Buot silingon bala indi na gid mamati sa aton si Jehova? Indi amo sina! Mahigugmaon nga patawaron kita sang Dios kon bag-uhon naton ang aton kabuhi kag himuon ang aton masarangan para malipay sia.—Binuhatan 3:19.