Ang Dios Nagaulikid sa Imo
MABASA sa Biblia ang pinakamaayo nga laygay para sa aton bangod halin ini sa Dios. Indi ini libro para sa ikaayong lawas, pero makahatag ini sang praktikal nga bulig kon paano atubangon ang mabudlay nga mga sitwasyon, problemado ukon indi mapahamtang nga hunahuna, nasakit nga balatyagon, balatian, kag mga problema sa mental health.
Ang pinakaimportante, ginapasalig kita sang Biblia nga naintiendihan gid sang aton Manunuga, si Jehova nga Dios, a ang aton ginahunahuna kag ginabatyag. Gusto gid niya nga buligan kita sa bisan ano man nga problema nga aton ginaatubang. Halimbawa, binagbinaga ining duha ka makapaumpaw nga mga teksto sa Biblia:
“Malapit si Jehova sa mga nagaantos; ginaluwas niya ang mga nalisdan.”—SALMO 34:18.
“Ako si Jehova nga imo Dios nagauyat sang imo tuo nga kamot, ang Isa nga nagasiling sa imo, ‘Indi ka mahadlok. Buligan ko ikaw.’”—ISAIAS 41:13.
Pero, paano kita ginabuligan ni Jehova para atubangon ang mga problema sa mental health? Binagbinagon sa masunod nga mga artikulo, kon paano ginapakita ni Jehova sa madamo nga paagi nga nagaulikid gid sia sa aton.
a Si Jehova ang personal nga ngalan sang Dios.—Salmo 83:18.
