Ginlaragway ni apostol Pablo si Jehova * bilang “ang Dios nga nagahatag sang tanan nga sahi sang lugpay, nga nagalugpay sa aton sa tanan naton nga mga pagtilaw.” (2 Corinto 1:3, 4) Gani ginapasalig kita sang Biblia nga wala sing tawo nga indi mabuligan sang Dios, kag bisan ano pa kadaku ang mga kabudlayan, malugpayan gid kita sang aton Amay sa langit.

Pero siempre, may dapat kita himuon kon gusto naton nga lugpayan kita sang Dios. Paano kita mabuligan sang doktor kon wala kita nagapatsek-ap sa iya? Si manalagna Amos namangkot: “Magaupdanay bala ang duha ka tawo sa paglakat kon wala sila magkitaay suno sa ginkasugtan?” (Amos 3:3, footnote) Gani ginapalig-on kita sang Kasulatan: “Magpalapit kamo sa Dios, kag magapalapit sia sa inyo.”—Santiago 4:8.

Paano kita makasiguro nga magapalapit ang Dios sa aton? Una, bangod sulitsulit niya kita nga ginsilingan nga gusto niya kita buligan. (Tan-awa ang  kahon.) Ikaduha, may mga pamatuod kita sang mga tawo nga nalugpayan sang Dios—matuod gid nga mga tawo, sa aton tion kag sang una.

Pareho sa madamo subong nga nagapangayo sing bulig sa Dios, si Hari David nakaeksperiensia man sang madamo nga kabudlayan. “Pamatii ang akon mga pakiluoy kon nagapangayo ako sa imo sing bulig,” pakitluoy niya kay Jehova. Ginbuligan bala sia sang Dios? Huo. Si David nagsiling: “Ginbuligan niya ako, kag nagakalipay gid ako.”—Salmo 28:2, 7.

Katuyuan sang Dios nga hatagan sing importante nga papel si Jesus sa paglugpay. Ang pila sa mga buluhaton nga ginhatag sang Dios kay Jesus amo ang “pagbugkos sa pilas sang mga nagakalisod” kag “paglugpay sa tanan nga nagalalaw.” (Isaias 61:1, 2) Subong gintagna, may pag-ulikid gid si Jesus sa mga “ginabudlayan kag ginabug-atan.”—Mateo 11:28-30.

Ginlugpayan ni Jesus ang mga tawo paagi sa paghatag sa ila sing maalamon nga laygay, pagtratar sa ila sing mainayuhon, kag sa pila ka tion, pag-ayo pa gani sang ila mga balatian. Isa ka bes, ang aruon nakitluoy kay Jesus: “Kon luyag mo gid, matinluan mo ako.” Bangod sa kaluoy, si Jesus nagsabat: “Luyag ko! Magmatinlo ka.” (Marcos 1:40, 41) Kag nag-ayo ang aruon.

Ang Anak sang Dios wala na sa duta subong para personal kita nga lugpayan. Pero ang iya Amay, nga  si Jehova, “ang Dios nga nagahatag sang tanan nga sahi sang lugpay,” padayon nga nagabulig sa mga nagakinahanglan. (2 Corinto 1:3) Binagbinaga ang apat ka panguna nga paagi nga ginalugpayan sang Dios ang katawhan.

• Ang Biblia. “Ang tanan nga butang nga ginsulat sadto ginsulat sa pagtudlo sa aton. Nagahatag ini sa aton sing paglaum bangod ining Kasulatan nagabulig sa aton sa pagbatas kag nagapabakod sa aton.”—Roma 15:4.

• Ang Balaan nga Espiritu sang Dios. Wala madugay sa tapos mapatay si Jesus, ang bilog nga Cristianong kongregasyon nangin malinong. Ngaa? “Bangod gintuman nila si Jehova kag ginpabakod sila sang balaan nga espiritu.” (Binuhatan 9:31) Ang balaan nga espiritu, ang aktibo nga puersa sang Dios, gamhanan gid. Puede ini gamiton sang Dios agod lugpayan ang bisan sin-o, ano man ang ila kahimtangan.

• Pangamuyo. “Indi kamo magkabalaka sa bisan ano nga butang,” laygay sang Biblia. Kundi, siling sini, “ipahibalo sa Dios ang inyo mga pangabay; kag ang paghidait sang Dios nga labaw sa tanan nga paghangop magabantay sang inyo tagipusuon kag ikasarang sa paghunahuna.”—Filipos 4:6, 7.

• Ang pareho naton nga mga Cristiano mahimo naton mangin mga abyan nga masandigan sa tion sang kabudlayan. Si apostol Pablo nagsiling nga ang iya mga kaupdanan “nagahatag sing daku nga lugpay” sa tion sang “kabudlayan kag kapipit-an.”—Colosas 4:11; 1 Tesalonica 3:7.

Pero mahimo nagapamensar ka kon paano ini nagakatabo. Usisaon naton sing maayo ang mga eksperiensia sang mga tawo nga nag-atubang sang mabug-at nga mga problema nga ginsambit kaina. Pareho sa ila, makita mo nga ginatuman gihapon sang Dios ining mahigugmaon nga saad: “Subong sang iloy nga nagalugpay sa iya anak, padayon ko man kamo nga lugpayan.”—Isaias 66:13.