Ang Biblia wala nagatudlo nga ang kada isa may anghel de la guardia. Matuod, nagsiling si Jesus: “Indi gid ninyo pagtamayon ang isa sining mga kubos [mga disipulo sang Cristo], kay nagasiling ako sa inyo nga makita pirme sang ila mga anghel sa langit ang nawong sang akon Amay sa langit.” (Mateo 18:10) Pero, indi buot silingon ni Jesus nga ang kada isa may anghel de la guardia, kundi nga ang mga anghel interesado sa tagsa niya ka disipulo. Gani, ang matuod nga mga sumilimba wala nagahimo sang mga butang nga indi maalamon ukon nagabutang sang ila kaugalingon sa alang-alang, nga nagapaabot nga amligan sila sang mga anghel sang Dios.

Buot bala silingon nga wala nagabulig ang mga anghel sa mga tawo? Indi. (Salmo 91:11) Ang iban nagapati gid nga ang Dios nag-amlig kag nagtuytoy sa ila paagi sa mga anghel. Ang isa sa ila amo si Kenneth, nga ginsambit sa una nga artikulo. Bisan pa indi kita makasiguro, posible nga husto sia. Masami nga makita sang mga Saksi ni Jehova ang ebidensia nga ginabuligan sila sang mga anghel samtang nagabantala. Pero, bangod indi makita ang mga anghel, indi naton mapat-od kon paano sila ginagamit sang Dios sa pagbulig sa mga indibiduwal. Bisan pa sini, indi man sala nga magpasalamat kita sa Labing Gamhanan sa iya ginaaman nga bulig.​—Colosas 3:15; Santiago 1:17, 18.