SAMTANG nagabiyahe sa Atlantiko ang barko nga ginasakyan ni George Young pakadto sa Europa, nalipay sia sa pagpamensar sa iya nahimo para sa Ginharian sang didto pa sia sa Brazil. * Pero ginpamensar man niya ang iya bag-o nga asaynment sa halos wala pa mabantalaan nga mga teritoryo sa Spain kag Portugal. Kon mag-abot na sia didto, ihanda niya ang mga kinahanglanon para sa base sa Biblia nga mga pamulongpulong ni Utod J. F. Rutherford kag ipanagtag niya ang 300,000 ka tract!

Magamo sa Lisbon sang nag-abot si Utod Young sang 1925. Bangod sang rebolusyon sang 1910, ginbuslan sang republika ang paggahom sang monarkiya sa pungsod kag halos nadula man ang pagkontrol sang Iglesia Katolika. Nadugangan ang kahilwayan sang mga tawo, pero nagpadayon ang mga ginamo.

Sang ginahanda ni Utod Young ang mga kinahanglanon para sa pamulongpulong ni Utod Rutherford, ginpatuman sang gobierno ang martial law bangod sang wala madayon nga kudeta. Ang sekretaryo sang British and Foreign Bible Society nagpaandam kay Utod Young nga madamo ang magapamatok sa iya. Wala sapayan sini, nangayo si Utod Young sing permit para magamit ang gymnasium sang Camões Secondary School, kag ginhatagan sia!

Madamo gid ang nalangkag pag-abot sang Mayo 13, ang petsa sang pamulongpulong ni Utod Rutherford. May mga plakard sa mga bilding kag may mga pamantalaan nga nagpahibalo sang pamulongpulong nga “How to Live on the Earth Forever” (Kon Paano Mabuhi sa Duta sing Wala sing Katapusan). Dalidali nga nagbalhag ang mga nagapamatok sing artikulo sa ila pamantalaan para paandaman ang mga bumalasa parte sa bag-o nag-abot nga “butig nga mga manalagna.” Sa alagyan pasulod sa gymnasium, nagpanagtag ang mga nagapamatok sing linibo ka brosyur nga nagapakalain sa mga ginatudlo ni Utod Rutherford.

Pero mga 2,000 ang nakasulod sa gymnasium kag mga 2,000 man ang wala ginpasulod kay gutok na. Ang pila nga nagapamati ara sa hagdanan nga mga lubid sa kilid sang gymnasium; ang iban nagapungko sa ibabaw sang mga kagamitan sa pag-ehersisyo.

Pero may mga nagtublag sa pamulongpulong. Nagsinggit ang mga nagapamatok kag ginlampos nila ang mga pulungkuan. Pero kalmado lang si Utod Rutherford nga nagsaka sa lamesa para mabatian sia. Halos tungang gab-i na sang matapos sia, kag sobra 1,200 ka interesado ang naghatag sang ila ngalan kag adres para makabaton sang mga publikasyon base sa Biblia. Pagkadason nga adlaw, ginbalhag sang pamantalaan nga O Século ang isa ka artikulo parte sa pamulongpulong ni Utod Rutherford.

Sang Septiembre 1925, ginsugdan ang pagbalhag sang Portuguese nga The Watch Tower sa Portugal.  (Antes sini, may Portuguese na nga edisyon nga ginabalhag sa Brazil.) Sa sini man nga tion, nagaplano ang Estudyante sang Biblia sa Brazil nga si Virgílio Ferguson nga magsaylo sa Portugal para magbulig sa hilikuton sang Ginharian. Kaupod niya anay si Utod Young nga nagaalagad sa gamay nga sanga talatapan sang mga Estudyante sang Biblia sa Brazil. Sang ulihi, nagbiyahe si Virgílio kag ang iya asawa nga si Lizzie para mag-upod liwat kay Utod Young. Tayming gid ang pag-abot ni Utod Ferguson kay malapit na magsaylo si Utod Young sa iban nga asaynment, nga nagalakip sa Soviet Union.

Sang naggahom sa Portugal ang isa ka diktador paagi sa kudeta, labi nga ginpamatukan ang aton hilikuton. Maisog nga nagpabilin si Utod Ferguson sa pungsod kag nagpanikasog para maamligan ang gamay nga grupo sang mga Estudyante sang Biblia kag mapauswag ang ila hilikuton. Nangayo sia sing pahanugot nga gamiton ang iya balay para sa mga miting. Ginhatagan sia sing pahanugot sang Oktubre 1927.

Sa una nga tuig nga naggahom ang diktador, mga 450 ang nagsuskriber sa The Watch Tower. Magluwas sa sini, paagi man sa mga tract kag bukleta, naglapnag ang mensahe sang kamatuoran asta sa malayo nga mga sakop sang Emperyo sang Portugal, ang Angola, Azores, Cape Verde, East Timor, Goa, Madeira, kag Mozambique.

Sang 1929, nagsaylo sa Lisbon ang isa ka Portuguese nga hardinero nga si Manuel da Silva Jordão. Sang didto pa sia sa Brazil, nakapamati sia sang pamulongpulong ni Utod Young. Ginbaton niya dayon ang kamatuoran kag gusto niya buligan si Utod Ferguson sa pagbantala. Gani nag-alagad si Manuel bilang colporteur, ang pagtawag sadto sa mga payunir. Bangod naorganisar na ang pag-imprinta kag pagpanagtag sang mga publikasyon nga base sa Biblia, nag-uswag ang bag-o nga kongregasyon sa Lisbon.

Sang 1934, nagbalik sa Brazil ang mag-asawa nga Ferguson. Pero nasab-ug na ang mga binhi sang kamatuoran. Bisan pa nagginamo sa Europa sa tion sang Inaway Sibil sa Espanya kag sang Bug-os Kalibutan nga Inaway II, nagpabilin nga matutom kay Jehova ang iya mga alagad sa Portugal. Daw pareho lang sila sang mga baga sadto, pero sang 1947, daw pareho na sila sang kalayo sang nag-abot ang una nga misyonero nga ginhanas sa Gilead School nga si John Cooke. Indi na dayon mapunggan ang pagdamo sang mga manugbantala sang Ginharian. Bisan pa gindumilian sang gobierno ang hilikuton sang mga Saksi ni Jehova sang 1962, nagpadayon ang pag-uswag. Sang nangin legal ang hilikuton sang mga Saksi ni Jehova sang Disiembre 1974, sobra na 13,000 ang manugbantala sa pungsod.

Subong, sobra na 50,000 ang nagabantala sang maayong balita sang Ginharian sang Dios sa Portugal kag sa mga isla nga nagagamit sing Portuguese, pati na ang Azores kag Madeira. Lakip sa sini nga mga manugbantala ang mga kaliwat sang pila sa mga nakapamati sa pamulongpulong ni Utod Rutherford sang 1925.

Nagapasalamat kita kay Jehova kag sa matutom nga mga kauturan sang una nga maisog nga nagpanguna sa hilikuton bilang mga ‘alagad ni Cristo Jesus sa mga pungsod.’—Roma 15:15, 16.—Halin sa amon archive sa Portugal.