Magpakita sing Kaluoy sa “Tanan nga Sahi sang Tawo”
SANG gintudluan ni Jesus ang iya mga disipulo kon paano ibantala ang maayong balita, nagsiling sia nga may mga tawo nga indi gusto mamati sa mensahe sang Ginharian. (Luc. 10:3, 5, 6) Sa aton ministeryo, mahimo may mga tawo nga maakig ukon magsakit pa gani sa aton. Kon maeksperiensiahan naton ini, mahimo mabudlayan kita sa pagpakita sing kaluoy sa aton mga ginabantalaan.
Makita sang maluluy-on nga tawo ang kinahanglanon kag problema sang iban, nasubuan sia sa ila kahimtangan, kag gusto niya sila buligan. Pero, kon madula ang aton kaluoy sa mga tawo nga maistorya naton sa ministeryo, mahimo madula man ang aton kapisan sa pagbantala kag indi na naton ini pagseriosohon. Pero, kon palambuon naton ang kaluoy, nga daw pareho sa pagdugang sing gatong sa kalayo, magadabadaba man ang aton kapisan sa ministeryo!—1 Tes. 5:19.
Paano naton mapalambo ang kaluoy bisan pa mabudlay ini himuon? Binagbinagon naton ang tatlo ka halimbawa nga maayo gid nga ilugon: ang halimbawa ni Jehova, ni Jesus, kag ni apostol Pablo.
ILUGA ANG KALUOY NI JEHOVA
Linibo na ka tuig nga ginabatas ni Jehova ang pagpakahuya sa iya ngalan. Pero, “mainayuhon [sia gihapon] sa mga indi mapinasalamaton kag mga malauton.” (Luc. 6:35) Mainayuhon sia bangod mapinasensiahon sia sa tanan. Gusto ni Jehova nga ang “tanan nga sahi sang tawo” maluwas. (1 Tim. 2:3, 4) Bisan pa ginadumtan sang Dios ang malaut, palangga niya ang mga tawo kag indi niya luyag nga mapatay ang bisan sin-o sa ila.—2 Ped. 3:9.
Nahangpan ni Jehova nga ginbulag ni Satanas ang mga wala nagatuo. (2 Cor. 4:3, 4) Madamo ang gintudluan sing sala nga mga pagpati kag pamatasan sugod sang bata pa sila, gani nabudlayan sila nga batunon ang kamatuoran. Gusto gid ni Jehova nga buligan sila. Ano ang pamatuod naton?
Binagbinaga ang pagtamod ni Jehova sa mga taga-Ninive sang una. Bisan pa masingki sila, ginsilingan ni Jehova si Jonas: “Indi bala nga dapat man ako maluoy sa Ninive nga isa ka daku nga siudad, nga may kapin sa 120,000 ka tawo nga wala makahibalo kon ano ang husto kag sala?” (Jon. 4:11) Nahangpan ni Jehova nga wala mahibaluan sang mga taga-Ninive ang kamatuoran parte sa iya, gani ginsugo niya si Jonas nga paandaman sila.
Pareho kay Jehova, hamili man sa aton ang mga tawo. Mailog naton sia paagi sa pagbulig sa mga tawo nga makatuon parte sa iya, bisan pa pamatyag naton daw indi sila interesado.
ILUGA ANG KALUOY NI JESUS
Pareho sa iya Amay, naluoy man si Jesus sa mga ginagutom sa espirituwal. “Sang makita niya ang mga tawo, naluoy sia sa ila kay ginpanitan sila kag nag-alaplaag kaangay sang mga karnero nga wala sing manugbantay.” (Mat. 9:36) Nahangpan ni Jesus ang ila kahimtangan; nakahibalo sia nga ang mga gusto mamati sa iya gintudluan sang kabutigan kag ginpakanubo sang mga lider sang ila relihion. Bisan pa nahibaluan ni Jesus nga madamo sa ila ang indi magsunod sa iya bangod sang pila ka rason, “gintudluan niya [gihapon] sila sing madamo nga butang.”—Mar. 4:1-9.
Indi maluyahan sing buot kon indi interesado ang tawo sa una nga pag-istorya
Nagabag-o ang kahimtangan, lakip ang pagtamod sang tawo sa kamatuoran
Kon daw indi interesado ang mga tawo sa aton mensahe, dapat naton hangpon kon ngaa. Indi maayo ang pagtamod sang iban sa Biblia ukon sa mga Cristiano bangod sang malain nga ginahimo sang mga nagapangangkon nga Cristiano. Ang iban mahimo ginsugiran sang mga kabutigan parte sa aton mga ginapatihan. Ang iban naman nahadlok nga basi pakalainon sila sang ila mga kaingod ukon pamilya kon mag-istorya sila sa aton.
Ang pila nga maistorya naton sa ministeryo mahimo nakaeksperiensia sing mabug-at nga mga problema, gani daw indi sila interesado sa aton mensahe. Ang misyonera nga si Kim nagsiling: “Sa isa ka lugar sa amon teritoryo, madamo ang nahalitan sang inaway kag wala na sing nabilin sa ila mga pagkabutang. Para sa ila, wala na sila sing paglaum. Akig sila kag wala sila sing pagsalig sa iban. Pirme may nagapamatok sa amon diri. Isa ka bes, ginsakit ako samtang nagabantala.”
Ano ang ginhimo ni Kim para indi madula ang iya kaluoy bisan pa ginsakit sia? Nagsiling sia: “Kon masingki ang tagbalay, ginapanumdom ko ang Hulubaton 19:11, nga nagasiling: ‘Ang paghangop sang tawo nagapahaganhagan sang iya kaakig.’ Ginapamensar ko ang naeksperiensiahan sang mga tawo sa amon teritoryo, kag nakabulig ini sa akon nga maluoy sa ila. Kag indi man tanan diri masingki. May mga naduaw pa gani kami liwat.”
Pamangkuton naton ang aton kaugalingon, ‘Kon ako ang sa lugar sang mga tawo sa amon teritoryo, ano ayhan ang reaksion ko kon bantalaan ako parte sa Ginharian?’ Halimbawa, ano abi kon pirme kabutigan ang ginasugid sa aton parte sa mga Saksi ni Jehova? Mahimo indi man kita interesado mamati, kag kinahanglan kita pakitaan sing kaluoy. Kon dumdumon naton ang sugo ni Jesus nga himuon naton sa iban ang gusto naton nga himuon nila sa aton, makabulig ini sa aton nga mangin kalmado bisan pa mabudlay ini himuon.—Mat. 7:12.
ILUGA ANG KALUOY NI PABLO
Ginpakitaan ni apostol Pablo sing kaluoy bisan ang mga masingki nga nagpamatok sa iya. Ngaa? Bangod gindumdom niya ang iya kabuhi sang una. Nagsiling sia: “Sadto manugpasipala ako, manughingabot, kag arogante nga tawo. Apang, ginpakitaan ako sing kaluoy bangod nagpanghikot ako nga wala sing nahibaluan kag wala sing pagtuo.” (1 Tim. 1:13) Narealisar niya nga ginkaluuyan sia ni Jehova kag ni Jesus. Gani, kon may magpamatok sa iya, ginapamensar niya nga amo man sia sini sang una.
May mga tion nga naistorya ni Pablo ang mga tawo nga nagapangapin gid sa ila butig nga mga panudlo. Ano ang ginhimo niya? Ang Binuhatan 17:16 nagasiling nga sang ara si Pablo sa Atenas, “naugot sia sang makita niya nga ang siudad puno sing mga diosdios.” Pero, gingamit ini ni Pablo para makapanaksi. (Binu. 17:22, 23) Ginpasibu niya ang iya pagbantala sa sarisari nga gindak-an sang mga tawo “agod maluwas [niya] ang iban sa bisan ano man nga paagi.”—1 Cor. 9:20-23.
Kon makaistorya kita sang mga tawo nga nagapati sa butig nga mga panudlo, ilugon naton si Pablo. Gamiton naton sa paghambalanay ang ila ginapatihan kag isugid naton ang “maayong balita tuhoy sa mas maayo nga butang.” (Isa. 52:7) Ang isa ka sister nga si Dorothy nagsiling: “Sa amon teritoryo, madamo ang gintudluan nga ang Dios kuno mapintas kag padasudaso kon magsilot. Ginadayaw ko sila bangod nagapati sila sa Dios kag dayon ginasugid ko ang ginasiling sang Biblia parte sa gugma ni Jehova kag mga promisa niya sa palaabuton.”
“PADAYON NGA DAUGA ANG MALAUT PAAGI SA MAAYO”
Samtang nagahingapos ang “katapusan nga mga adlaw,” mapaabot naton nga ang pamatasan sang pila nga aton ginabantalaan “magalain pa gid.” (2 Tim. 3:1, 13) Pero indi ini dapat mangin rason nga madula ang aton kaluoy ukon kalipay. Hatagan kita ni Jehova sing kusog para ‘padayon naton nga madaug ang malaut paagi sa maayo.’ (Roma 12:21) Ang isa ka payunir nga si Jessica nagsiling: “Masami ako makaistorya sang mga tawo nga bugalon kag ginapakadiutay nila ang aton mensahe. Medyo makaulugot ini. Kon amo sini ang tagbalay, nagapangamuyo ako kay Jehova sing hipos para buligan ako nga tamdon ang tawo suno sa pagtamod niya. Paagi sini, nagakadula ang akon kaugot kag makakonsentrar ako sa pagbulig sa tawo.”
Padayon naton nga ginapangita ang mga tawo nga gusto makatuon sang kamatuoran
Ang pila nangin interesado sang ulihi bangod wala kita nag-untat sa pagbantala
Dapat man naton palig-unon ang aton mga kauturan. Si Jessica nagsiling: “Kon may mamatok sa amon, ginatinguhaan ko nga indi magpaapekto sa sini. Ginasambit ko dayon ang makapalig-on nga mga topiko, pareho sang maayo nga resulta sang amon pagministeryo bisan pa nagapamatok ang iban.”
Nahibaluan ni Jehova ang aton mga kabudlayan sa ministeryo. Nalipay gid sia kon ginailog naton ang iya kaluoy! (Luc. 6:36) Pero, indi tubtob san-o nga magapakita si Jehova sing kaluoy. Makasalig kita nga nahibaluan niya kon san-o ang husto nga tion nga tapuson ini nga sistema. Pero samtang wala pa ini, importante gid ang aton pagbantala. (2 Tim. 4:2) Gani, padayon kita nga mangin mapisan sa pagbantala kag pakitaan naton sing kaluoy ang “tanan nga sahi sang tawo.”
