TULUN-AN NGA ARTIKULO 8
Pabalori ang Paghidait Paagi sa Pagdula sang Kahisa
“Tinguhaan naton nga himuon ang mga butang nga nagadala sing paghidait kag ang mga butang nga makapabakod sa isa kag isa.”—ROMA 14:19.
AMBAHANON 113 Ang Aton Paghidait
ANG BINAGBINAGON SA SINI NGA ARTIKULO *
1. Ano ang natabo sa pamilya nanday Jose bangod nahisa sa iya ang iya mga utod?
PALANGGA ni Jacob ang tanan niya nga anak, pero espesyal gid sa iya ang iya 17 anyos nga anak nga si Jose. Ano ang reaksion sang mga utod ni Jose? Nahisa sila sa iya, kag ginkaugtan nila sia. Wala sing may nahimo si Jose para kaugtan sia sang iya mga utod. Pero ginbaligya nila si Jose para mangin ulipon kag nagbinutig sila sa ila amay. Ginsilingan nila si Jacob nga ginpatay sang isa ka mabangis nga sapat ang iya paborito nga anak. Bangod sang ila kahisa, nadula ang paghidait sa ila pamilya kag ginpasubo gid nila ang ila amay.—Gen. 37:3, 4, 27-34.
2. Suno sa Galacia 5:19-21, ngaa makatalagam gid ang kahisa?
2 Sa Kasulatan, ang kahisa * isa sa “mga buhat sang unod” nga mahimo magresulta sa kamatayon kag mahimo mangin rason nga ang isa indi makapanubli sang Ginharian sang Dios. (Basaha ang Galacia 5:19-21.) Ang kahisa amo sa masami ang kabangdanan sang pag-ilinaway, kinagamo, kag pagsilabo sang kaakig.
3. Ano ang binagbinagon naton sa sini nga artikulo?
3 Ginapakita sang halimbawa sang mga utod ni Jose kon paano ang kahisa makaguba sang kaangtanan kag makadula sang paghidait sa pamilya. Bisan pa indi gid naton mahimo ang ginhimo sang mga utod ni Jose, ang aton tagipusuon madaya kag indi perpekto. (Jer. 17:9) Amo nga kon kaisa mahimo mahisa kita sa iban. Binagbinagon naton ang pila ka halimbawa sa Biblia nga makabulig sa aton nga mabal-an kon ano ang posible nga mga rason nga mahisa kita. Dayon binagbinagon naton kon paano malikawan ang kahisa kag paano pabaloran ang paghidait.
ANO ANG POSIBLE NGA MGA RASON NGA MAHISA KITA?
4. Ngaa nahisa ang mga Filistinhon kay Isaac?
4 Kon manggaranon ang iban. Manggaranon nga tawo si Isaac, kag nahisa sa iya ang mga Filistinhon. (Gen. 26:12-14) Gintampukan nila ang mga bubon nga ginakuhaan ni Isaac sang tubig para sa iya mga kasapatan. (Gen. 26:15, 16, 27) Pareho sa mga Filistinhon, ang pila sa mga tawo subong nahisa sa iban nga may mas madamo nga pagkabutang sangsa ila. Magluwas nga gusto nila nga may ara man sila sang mga butang nga ara sa iban, gusto pa gid nila nga wala ini nga mga butang sa iban.
5. Ngaa nahisa ang mga lider sang relihion kay Jesus?
5 Kon madamo ang nanamian sa iban. Nahisa ang Judiyo nga mga lider sang relihion kay Jesus bangod madamo ang nanamian gid sa iya. (Mat. 7:28, 29) Si Jesus ang representante sang Dios, kag nagtudlo sia sang kamatuoran. Pero nagpalapta sang mga kabutigan parte kay Jesus ang mga lider sang relihion para gub-on ang iya reputasyon. (Mar. 15:10; Juan 11:47, 48; 12:12, 13, 19) Ano ang matun-an naton sa sini? Dapat naton likawan nga mahisa sa mga utod nga ginapalangga sang mga kauturan sa kongregasyon bangod sang ila maayo nga mga kinaiya. Sa baylo nga mahisa sa ila, dapat tinguhaan naton nga ilugon sila.—1 Cor. 11:1; 3 Juan 11.
6. Ano ang ginhimo ni Diotrefes bangod nahisa sia?
6 Kon may mga pribilehiyo sa kongregasyon ang iban. Sang unang siglo, nahisa si Diotrefes sa mga nagapanguna sa Cristianong kongregasyon. Luyag niya “magpulupangulo” sa kongregasyon, gani nagpalapta sia sang malain nga sugilanon parte kay apostol Juan kag sa iban nga mga utod para madula ang respeto sa ila sang mga kauturan. (3 Juan 9, 10) Bisan pa indi gid naton paghimuon ang ginhimo ni Diotrefes, posible nga mahisa kita sa aton utod nga nakabaton sang asaynment nga gusto gid naton, ilabi na gid kon pamatyag naton mahimo man naton ini ukon sing mas maayo pa.
Ang aton tagipusuon daw pareho sa duta, kag ang aton maayo nga mga kinaiya daw pareho sa matahom nga mga bulak. Pero ang kahisa daw pareho sa makahalalit nga hilamon. Mahimo kita punggan sang kahisa nga mapakita ang maayo nga mga kinaiya pareho sang gugma, kaluoy, kag kaayo (Tan-awa ang parapo 7)
7. Ano ang epekto sa aton sang kahisa?
7 Ang kahisa daw pareho sa makahalalit nga hilamon. Kon manggamot sa aton tagipusuon ang kahisa, mabudlay ini gabuton. Ang negatibo nga mga balatyagon pareho sang kaimon, bugal, kag pagkamaiyaiyahon nagapalala sang kahisa. Pareho sang hilamon nga makapugong sang pagtubo sang isa ka bulak, ang kahisa makapugong man sa aton nga mapakita ang maayo nga mga kinaiya pareho sang gugma, kaluoy, kag kaayo. Kon mabatyagan naton nga daw nagatubo ang kahisa sa aton tagipusuon, dapat naton gabuton ini gilayon. Paano naton malikawan ang kahisa?
MANGIN MAPAINUBUSON KAG KONTENTO
Paano naton magabot ang kahisa nga daw pareho sa hilamon? Paagi sa bulig sang balaan nga espiritu sang Dios, malikawan naton ang kahisa, kag mangin mapainubuson kita kag kontento (Tan-awa ang parapo 8-9)
8. Ano nga mga kinaiya ang makabulig sa aton nga malikawan ang kahisa?
8 Malikawan naton ang kahisa kon tinguhaan naton nga mangin mapainubuson kag kontento. Kon may amo kita sini nga mga kinaiya, indi gid kita mahisa. Kon mapainubuson kita, malikawan naton nga magsobra ka bilib sa aton kaugalingon. Ang mapainubuson nga tawo wala nagabatyag nga mas importante sia sangsa iban. (Gal. 6:3, 4) Ang kontento nga tawo nalipay sa kon ano ang may ara sia kag wala niya ginakumparar ang iya kaugalingon sa iban. (1 Tim. 6:7, 8) Kon mapainubuson kag kontento ang isa ka tawo, nalipay sia kon ang iban makabaton sang pagpakamaayo.
9. Suno sa Galacia 5:16 kag Filipos 2:3, 4, paano makabulig sa aton ang balaan nga espiritu?
9 Kinahanglan naton ang bulig sang balaan nga espiritu sang Dios para malikawan naton ang kahisa kag mangin mapainubuson kita kag kontento. (Basaha ang Galacia 5:16; Filipos 2:3, 4.) Makabulig ang balaan nga espiritu ni Jehova para mausisa naton ang aton pinakamadalom nga panghunahuna kag mga motibo. Paagi sa bulig sang Dios, mabuslan naton sang mga butang nga makapalig-on ang makahalalit nga mga panghunahuna kag mga balatyagon. (Sal. 26:2; 51:10) Binagbinaga ang halimbawa nanday Moises kag Pablo, nga nangin madinalag-on nga malikawan ang kahisa.
Nagdalagan pakadto kanday Moises kag Josue ang isa ka pamatan-on nga Israelinhon para isugid sa ila nga may duha ka lalaki sa kampo nga nagapanghikot nga daw mga manalagna. Ginpangabay ni Josue si Moises nga punggan ang mga lalaki, pero wala ini ginhimo ni Moises. Ginsilingan ni Moises si Josue nga nalipay sia kay ginhatagan ni Jehova ang duha ka lalaki sang Iya espiritu (Tan-awa ang parapo 10)
10. Ano ang natabo nga mahimo nagtilaw kay Moises? (Tan-awa ang piktyur sa kober.)
10 Madamo sang pribilehiyo si Moises samtang ginadumalahan niya ang katawhan sang Dios, pero wala niya ginpunggan ang iban nga makabaton sini nga mga pribilehiyo. Halimbawa, isa ka bes, ginkuha ni Jehova ang pila sang iya balaan nga espiritu kay Moises kag ginhatag ini sa isa ka grupo sang Israelinhon nga mga gulang nga nagatindog malapit sa tolda nga tilipunan. Wala madugay pagkatapos sini, nabal-an ni Moises nga nakabaton man sang balaan nga espiritu ang duha ka gulang nga wala makakadto sa tolda nga tilipunan, kag nagpanghikot sila nga daw mga manalagna. Ano ang ginhimo ni Moises sang ginpangabay sia ni Josue nga punggan ang duha ka gulang? Wala nahisa si Moises kay ginhatagan ni Jehova ang duha ka lalaki sang iya balaan nga espiritu. Nangin mapainubuson sia kag nalipay sia para sa ila bangod ginhatagan sila sang pribilehiyo. (Num. 11:24-29) Ano ang matun-an naton kay Moises?
Paano mailog sang mga gulang ang pagkamapainubuson ni Moises? (Tan-awa ang parapo 11-12) *
11. Paano mailog sang mga gulang si Moises?
11 Kon ikaw isa ka gulang, ginpangabay ka na bala nga hanason ang iban sa isa ka pribilehiyo sa kongregasyon nga ginapabaloran mo gid? Halimbawa, mahimo nga gusto mo gid ang imo pribilehiyo nga magdumala sang Pagtinuon sa Ang Lalantawan kada semana. Pero kon mapainubuson ka pareho kay Moises, indi ka magbatyag nga wala ka na ginapabaloran kon ginpangabay ka nga hanason ang isa ka utod para sa ulihi madumalahan niya ini nga pribilehiyo. Malipay ka nga buligan ang imo utod.
12. Paano ginapakita sang madamo nga Cristiano subong nga kontento sila kag mapainubuson?
12 Binagbinaga ang isa pa ka sitwasyon nga ginaatubang sang madamo nga brother nga tigulang na. Nagaalagad sila bilang koordenitor sang hubon sang mga gulang sa madamo na nga tuig. Pero kon 80 anyos na sila, kinabubut-on nila nga ginabaton nga indi na sila ang magaatipan sang ila asaynment. Kon ang mga manugtatap sang sirkito 70 anyos na, indi na sila makapadayon sa ila asaynment kag mapainubuson sila nga nagabaton sang bag-o nga pribilehiyo. Kag sang nagligad nga mga tinuig, madamo nga Bethelite sa bilog nga kalibutan ang ginhatagan sang bag-o nga asaynment bilang mga payunir. Wala nagalain ang buot sining matutom nga mga kauturan sa mga nagbulos sa ila asaynment.
13. Ngaa posible kuntani nga mahisa si Pablo sa 12 ka apostoles?
13 Si apostol Pablo isa man ka maayo nga halimbawa. Kontento sia kag mapainubuson, kag ginlikawan niya nga mahisa. Nagpangabudlay gid sia sa iya ministeryo, pero mapainubuson sia nga nagsiling: “Ako ang labing kubos sa mga apostoles, kag indi ako takus tawgon nga apostol.” (1 Cor. 15:9, 10) Nakaupod sang 12 ka apostoles si Jesus sang ginahimo niya ang iya ministeryo diri sa duta, pero si Pablo nangin Cristiano lang pagkatapos napatay kag nabanhaw si Jesus. Bisan pa gintangdo si Pablo bilang “apostol nga ginpadala sa mga pungsod,” wala sia nakabaton sang espesyal nga pribilehiyo nga mangin bahin sang 12 ka apostoles. (Roma 11:13; Binu. 1:21-26) Imbes nga mahisa sa 12 ka apostoles nga nangin suod kay Jesus, nangin kontento si Pablo sa kon ano ang may ara sia.
14. Ano ang himuon naton kon kontento kita kag mapainubuson?
14 Kon kontento kita kag mapainubuson, mailog naton si Pablo kag mangin matinahuron kita sa mga ginhatagan ni Jehova sang awtoridad. (Binu. 21:20-26) Ginsigurado ni Jehova nga may mga gulang para magpanguna sa Cristianong kongregasyon. Bisan indi sila perpekto, ginakabig sila ni Jehova nga “mga dulot nga mga lalaki.” (Efe. 4:8, 11) Kon ginatahod naton ining gintangdo nga mga lalaki kag mapainubuson naton nga ginasunod ang ila panuytoy, magapabilin kita nga suod kay Jehova kag may paghidait kita sa aton mga kauturan.
‘TINGUHAI NGA HIMUON ANG MGA BUTANG NGA NAGADALA SING PAGHIDAIT’
15. Ano ang kinahanglan naton himuon?
15 Wala sing paghidait kon may kahisa. Kinahanglan naton gabuton ang kahisa sa aton tagipusuon kag likawan naton nga pahisaon ang iban. Importante gid ini para matuman naton ang sugo ni Jehova nga ‘tinguhaan nga himuon ang mga butang nga nagadala sing paghidait kag ang mga butang nga makapabakod sa isa kag isa.’ (Roma 14:19) Paano naton mabuligan ang iban nga malikawan ang kahisa, kag paano naton pabaloran ang paghidait?
16. Paano naton mabuligan ang iban nga malikawan ang kahisa?
16 Daku ang impluwensia sa iban sang aton batasan kag mga ginahimo. Gusto sang kalibutan nga ‘magpadayawdayaw’ kita sang aton mga pagkabutang. (1 Juan 2:16) Pero ini nga batasan makapahisa sa iban. Malikawan naton nga mapahisa ang iban kon wala naton ginaistorya ang parte sa aton mga pagkabutang ukon mga plano naton nga baklon. Ang isa pa ka paagi nga malikawan naton nga mapahisa ang iban amo ang pagpaubos kon may mga pribilehiyo kita sa kongregasyon. Kon pirme naton ginaistorya sa iban ang parte sa aton mga pribilehiyo, mahimo sila mahisa sa aton. Pero kon talupangdon naton ang iban kag apresyahon ang ila maayo nga binuhatan, mabuligan naton sila nga mangin kontento kag mapalig-on naton ang paghiusa kag paghidait sa kongregasyon.
17. Ano nga kinaiya ang gindula sang mga utod ni Jose, kag ano ang nangin resulta?
17 Posible gid naton madula ang kahisa! Binagbinaga liwat ang halimbawa sang mga utod ni Jose. Tinuig pagkatapos nila ginhalitan si Jose, nakita nila sia liwat sa Egipto. Antes nagpakilala si Jose sa iya mga utod, gintestingan niya sila para mabal-an niya kon bala nagbag-o na sila. Ginhatagan niya sila sing pagkaon, pero mas madamo nga pagkaon ang ginhatag niya sa kamanghuran nga si Benjamin. (Gen. 43:33, 34) Pero wala nahisa kay Benjamin ang iya mga utod, kundi nabalaka gid sila sa iya kag sa ila amay nga si Jacob. (Gen. 44:30-34) Bangod gindula sang mga utod ni Jose ang kahisa, napasag-uli nila ang paghidait sa ila pamilya. (Gen. 45:4, 15) Sing kaanggid, kon dulaon naton ang kahisa, magapabilin ang paghidait sa aton pamilya kag sa aton kongregasyon.
18. Suno sa Santiago 3:17, 18, ano ang mapakita naton kon nagabulig kita para magpabilin ang paghidait?
18 Gusto ni Jehova nga dulaon naton ang kahisa kag pabaloran naton ang paghidait. Dapat magpanikasog gid kita para mahimo ini. Natun-an naton sa sini nga artikulo nga posible kita mahisa sa iban. (Sant. 4:5) Kag ginapalibutan kita sang mga tawo nga mahisaon. Para malikawan naton ang kahisa, dapat kita mangin mapainubuson, kontento, kag dapat naton pabaloran ang iban. Kon himuon naton ini, makabulig kita para magpabilin ang paghidait kag mapakita naton ang maayo nga mga kinaiya.—Basaha ang Santiago 3:17, 18.
AMBAHANON 130 Mangin Mapinatawaron
^ par. 5 May paghidait sa organisasyon ni Jehova. Pero mahimo madula ang paghidait kon may kahisa kita. Hibaluon naton sa sini nga artikulo kon ano ang posible nga mga rason nga mahisa kita. Kag binagbinagon naton kon paano malikawan ining makahalalit nga kinaiya kag kon paano pabaloran ang paghidait.
^ par. 2 DUGANG NGA PAATHAG: Ginalaragway sa Biblia nga kon ang isa ka tawo may kahisa, gusto niya nga may ara man sia sang mga butang nga ara sa iban. Pero indi lang amo sina ang gusto niya. Gusto man niya nga wala ini nga mga butang sa ila.
^ par. 61 MGA PIKTYUR: Sa miting sang hubon sang mga gulang, ginpangabay ang isa ka tigulang na nga brother, nga nagadumala sang Pagtinuon sa Ang Lalantawan, nga hanason ang bataon nga gulang para sa sini nga pribilehiyo. Gusto gid sang tigulang nga brother ang iya asaynment, pero nalipay sia nga suportahan ang desisyon sang mga gulang paagi sa paghatag sa bataon nga brother sang mga panugda kag komendasyon.
