SANG panahon sang Biblia, nagahatag sang dote ang nobyo sa pamilya sang nobya. Puede ihatag bilang dote ang mga butang nga may balor, mga sapat, ukon kuarta. May mga tion man nga nagaobra ang nobyo sa pamilya sang nobya. Pareho ini sa ginhimo ni Jacob nga pito ka tuig nga nag-obra sa amay ni Raquel para mapangasawa niya si Raquel. (Gen. 29:17, 18, 20) Para sa ano ang dote?

Ang isa ka eksperto sa Biblia nga si Carol Meyers nagsiling: “Sa mga pamilya nga pagpanguma ang palangabuhian, daku gid ang mabulig sang mga anak. Gani bangod indi na makapanguma ang nobya para sa iya pamilya, makabulig gid sa iya pamilya ang dote nga ihatag sang iya nobyo.” Makabulig man ang dote para magsuod ang mga pamilya sang nobyo kag sang nobya. Kag kon suod na ang duha ka pamilya, makabuligay sila sa tion sang mga kabudlayan. Ang paghatag sang dote nagapamatuod man nga kalaslon na ang nobya. Ginapakita man sini nga ginahatag na sang iya amay sa iya mangin bana ang pag-atipan kag pag-amlig sa iya.

Pero indi buot silingon nga ang mga babayi daw pareho sa isa ka butang nga puede baklon ukon ibaligya. Ang libro nga Ancient Israel​—Its Life and Institutions nagasiling: “Kon magpakasal ang mga Israelinhon, may obligasyon ang nobyo nga maghatag sang kuarta, ukon sang katumbas sini, bilang dote sa pamilya sang babayi. Bangod sini, daw masal-an nga ginbakal niya ang babayi. Pero indi bayad para sa babayi ang dote, kundi bulig ini para sa iya pamilya.”

Sa pila ka pungsod subong, ginasunod gihapon sang mga tawo ang kustombre sa paghatag sang dote. Kon mangayo sang dote ang mga ginikanan nga Saksi, dapat hustuhan lang ini kag makatarunganon. Kon himuon nila ini, ‘ginapakita nila sa tanan nga tawo ang ila pagkamakatarunganon.’ (Fil. 4:5; 1 Cor. 10:32, 33) Paagi sa sini, mapakita nila nga indi sila “mahigugmaon sa kuarta.” (2 Tim. 3:2) Kag kon indi tama kadaku ang dote nga pangayuon sang mga ginikanan nga Saksi, indi mapilitan ang nobyo nga ipaisol ang petsa sang kasal asta nga masarangan niya ang ginapangayo nga dote. Kag kon payunir ang nobyo, indi niya pagpamensaron nga mag-untat anay sa pagpayunir kay kinahanglan niya mag-obra sing full-time para mahatag niya ang tama kadaku nga dote.

Sa pila ka pungsod, may mga kasuguan nga ginapatuman parte sa paghatag sang dote. Dapat ini sundon sang mga ginikanan nga Saksi. Ngaa? Bangod ang Biblia nagasiling nga “dapat magpasakop sa mas mataas nga mga awtoridad” ang mga Cristiano, kag dapat nila tumanon ang mga kasuguan nga wala nagalapas sa mga kasuguan sang Dios.​—Roma 13:1; Binu. 5:29.