‘Maghatag sing Labi Pa Sangsa Kinaandan nga Igtalupangod’

“Kinahanglan naton hatagan sing labi pa sangsa kinaandan nga igtalupangod ang mga butang nga nabatian naton, agod indi kita maanod palayo.”—HEBREO 2:1.

1. Ipaathag kon paano ang pagkawili makadul-ong sa kapahamakan.

ANG mga aksidente sa salakyan nagapatay sing mga 37,000 ka tawo kada tuig sa Estados Unidos lamang. Ang mga eksperto nagasiling nga madamo sining kamatayon ang nalikawan kuntani kon ginasentro sang mga drayber ang ila igtalupangod sa dalan. Nawili ang pila ka motorista sa mga tanda kag mga karatula sa dalan ukon sa paggamit sang ila cell phone. May nagakaon man samtang nagamaneho. Sa sini tanan nga kahimtangan, ang pagkawili makadul-ong sa kapahamakan.

2, 3. Ano nga laygay ang ginhatag ni Pablo sa mga Hebreong Cristiano, kag ngaa nagakaigo ang iya laygay?

² Halos 2,000 ka tuig antes maimbento ang salakyan, ginpatuhuyan ni apostol Pablo ang isa ka sahi sang pagkawili nga nangin malaglagon sa pila ka Hebreong Cristiano. Ginpadaku ni Pablo nga ang ginbanhaw nga si Jesucristo ginhatagan sing isa ka posisyon nga superyor sa tanan nga anghel, kay naglingkod sia sa tuo nga kamot sang Dios. Nian ang apostol nagsiling: “Amo kon ngaa kinahanglan naton hatagan sing labi pa sangsa kinaandan nga igtalupangod ang mga butang nga nabatian naton, agod indi kita maanod palayo.”—Hebreo 2:1.

³ Ngaa ang mga Hebreong Cristiano dapat ‘maghatag sing labi pa sangsa kinaandan nga igtalupangod sa mga butang nga nabatian’ tuhoy kay Jesus? Bangod halos 30 ka tuig na ang nagligad nga wala na si Jesus sa duta. Bangod wala na ang ila Agalon, nagsugod sa pagpalayo sa matuod nga pagtuo ang pila ka Hebreong Cristiano. Nawili sila sang Judaismo, ang ila anay paagi sang pagsimba.

Kinahanglan Nila ang Labi Pa nga Pagtalupangod

4. Ngaa mahimo nga nasulay ang pila ka Hebreong Cristiano nga magbalik sa Judaismo?

⁴ Ngaa mahimo masulay ang isa ka Cristiano nga magbalik sa Judaismo? Bueno, ang sistema sang pagsimba sa idalom sang Kasuguan nagalakip sang makita nga mga butang. Makita sang mga tawo ang mga saserdote kag mapanimahuan ang nasunog nga mga halad. Apang, sa pila ka bahin, tuhay gid ang Cristianismo. Ang mga Cristiano may Mataas nga Saserdote, si Jesucristo, apang wala na sia makita sa duta sa sulod sang tatlo ka dekada. (Hebreo 4:​14) May templo sila, apang ang balaan nga duog sini sa langit mismo. (Hebreo 9:​24) Indi kaangay sang pisikal nga sirkunsisyon sa idalom sang Kasuguan, ang sirkunsisyon sang Cristiano amo “ang sa tagipusuon paagi sa espiritu.” (Roma 2:29) Busa, para sa mga Hebreong Cristiano, ang Cristianismo daw nagburon.

5. Paano ginpakita ni Pablo nga ang sistema sang pagsimba nga ginpatok ni Jesus mas superyor sangsa yara sa idalom sang Kasuguan?

 ⁵ Dapat marealisar sang mga Hebreong Cristiano ang tuman ka importante nga butang tuhoy sa sistema sang pagsimba nga ginpatok ni Cristo. Labi nga napasad ini sa pagtuo sangsa panan-aw, apang mas superyor ini sangsa Kasuguan nga ginhatag paagi kay manalagna Moises. “Kon ang dugo sang mga kanding kag mga toro kag ang mga abo sang isa ka damulaga nga baka ang ginwagwag sa sadtong mahigko nga mga halad tubtob sa pagtinlo sa unod,” sulat ni Pablo, “daw ano pa gid nga ang dugo ni Cristo, nga paagi sa walay katapusan nga espiritu naghalad sang iya kaugalingon nga wala sing dagta sa Dios, makatinlo sang aton konsiensia gikan sa patay nga mga buhat agod maghimo kita sing sagrado nga pag-alagad sa buhi nga Dios?” (Hebreo 9:13, 14) Huo, ang kapatawaran nga matigayon paagi sa pagtuo sa halad gawad ni Jesucristo mas superyor gid sa madamo nga paagi sangsa mahimo sang mga halad sa idalom sang Kasuguan.—Hebreo 7:​26-​28.

6, 7. (a) Bangod sa ano nga kahimtangan nga nangin hilingagawon nga ang mga Hebreong Cristiano ‘maghatag sing labi pa sangsa kinaandan nga igtalupangod sa mga butang nga nabatian’? (b) Sang ginsulatan ni Pablo ang mga Hebreo, daw ano kadamo nga tion ang nabilin para sa Jerusalem? (Tan-awa ang nota sa ubos.)

⁶ May isa pa ka rason kon ngaa ang mga Hebreong Cristiano kinahanglan magtalupangod gid sa mga butang nga nabatian tuhoy kay Jesus. Nagtagna sia nga ang Jerusalem laglagon. Si Jesus nagsiling: “Magaabot sa imo ang mga adlaw nga magatukod ang imo mga kaaway sing pamakod nga may mataliwis nga mga usok kag libutan ka kag ipiton ka sa tagsa ka luyo, kag ikaw kag ang imo mga anak sa sulod nimo was-agon nila sa duta, kag wala sila sing ibilin sa imo nga bato nga nasampaw sa bato, bangod wala mo mahantop ang tion sang pag-usisa sa imo.”—Lucas 19:43, 44.

⁷ San-o ini mahanabo? Wala ginsugid ni Jesus ang adlaw kag oras. Sa baylo, naghatag sia sining instruksion: “Kon makita ninyo ang Jerusalem nga nalikupan sang nagkampo nga mga hangaway, nian hibalua ninyo nga ang paghapay sa iya malapit na. Nian ang mga sa Judea magpalagyo sa mga bukid, kag ang mga sa tunga niya magguwa, kag ang mga sa kaumhan indi na magsulod sa iya.” (Lucas 21:20, 21) Sa sulod sang 30 ka tuig nga ginpamulong yadto ni Jesus, nadula sang pila ka Cristiano sa Jerusalem ang ila pagbatyag sing pagkahilingagawon kag nawili sila. Daw subong bala nga wala sila nagatulok sa dalan samtang nagamaneho. Kon wala nila ginbag-o ang ila panghunahuna, pat-od gid ang kalaglagan. Ginahunahuna man nila ini ukon wala, malapit na ang kalaglagan sang Jerusalem! * Ginalauman nga ang laygay ni Pablo  magapukaw sa mga Cristiano sa Jerusalem nga nagakatulog sa espirituwal.

Paghatag sing “Labi Pa Sangsa Kinaandan nga Igtalupangod” Karon

8. Ngaa kinahanglan nga ‘maghatag kita sing labi pa sangsa kinaandan nga igtalupangod’ sa mga kamatuoran sang Pulong sang Dios?

⁸ Kaangay sang unang siglo nga mga Cristiano, dapat kita ‘maghatag sing labi pa sangsa kinaandan nga igtalupangod’ sa mga kamatuoran sang Pulong sang Dios. Ngaa? Bangod nagaatubang man kita sa nagahilapit nga kalaglagan, indi lamang sang isa ka pungsod, kundi sang bug-os nga sistema sang mga butang. (Bugna 11:18; 16:14, 16) Sa pagkamatuod, wala kita makahibalo sang eksakto nga adlaw kag oras kon san-o manghikot si Jehova. (Mateo 24:36) Walay sapayan, nasaksihan naton ang katumanan sang mga tagna sang Biblia nga maathag nga nagapakita nga nagakabuhi na kita sa “katapusan nga mga adlaw.” (2 Timoteo 3:​1-5) Busa, dapat kita magbantay sa bisan ano nga mahimo makapawili sa aton. Dapat kita mamati sa Pulong sang Dios kag huptan ang pagbatyag sing pagkahilingagawon. Paagi lamang sa paghimo sini nga kita ‘magamadinalag-on sa pagpalagyo sa sining tanan nga butang nga natalana nga mahanabo.’—Lucas 21:36.

9, 10. (a) Paano naton mapakita nga atentibo kita sa espirituwal nga mga butang? (b) Paano ang pulong sang Dios ‘suga sa aton tiil’ kag ‘kapawa sa aton banas’?

⁹ Sa sining importante nga tion, paano naton mapakita nga nagahatag kita sing “labi pa sangsa kinaandan nga igtalupangod” sa espirituwal nga mga butang? Ang isa ka paagi amo nga mangin regular kita sa aton pagtambong sa Cristianong mga miting, mga asambleya, kag mga kombension. Dapat man kita mangin mapisan nga mga estudyante sang Biblia agod nga mangin suod kita sa Awtor sini, si Jehova. (Santiago 4:8) Kon magkuha kita sing ihibalo tuhoy kay Jehova paagi sa personal nga pagtuon kag mga miting, mangin kaangay kita sang salmista nga nagsiling sa Dios: “Ang imo pulong suga sa akon tiil, kag kapawa sa akon banas.”—Salmo 119:105.

¹⁰ Ang Biblia nangin ‘kapawa sa aton banas’ kon nagasugid ini sa aton sang mga katuyuan sang Dios sa palaabuton. Ini man ‘suga sa aton tiil.’ Buot silingon, makabulig ini sa aton sa aton masunod nga tikang kon nagaatubang kita sang mabudlay gid nga mga problema sa kabuhi. Amo kon ngaa importante nga ‘maghatag kita sing labi pa sangsa kinaandan nga igtalupangod’ kon nagatipon kita upod sa aton mga masigkatumuluo para tudluan kag kon personal kita nga nagabasa sang Pulong sang Dios. Ang makuha naton nga impormasyon magabulig sa aton sa paghimo sing maalamon kag mapuslanon nga mga desisyon nga nagapahamuot kay Jehova kag nagapahalipay sang iya tagipusuon. (Hulubaton 27:11; Isaias 48:17) Paano naton mapalawig ang aton pagkonsentrar sa mga miting kag sa tion sang personal nga pagtuon agod makabenepisyo gid kita sa espirituwal nga mga aman sang Dios?

Pagpauswag sang Aton Konsentrasyon sa mga Miting

11. Ngaa ang pagpamati sa Cristianong mga miting makahalangkat kon kaisa?

¹¹ Kon kaisa, ang pagpamati sa Cristianong mga miting isa ka hangkat. Madali matublag ang hunahuna, ayhan sang hibi sang isa ka lapsag ukon sang naulihi mag-abot nga nagapangita sang pulungkuan. Pagkatapos sang malawig nga adlaw sa trabaho, mahimo nga kapoy gid kita. Ang nagapamulongpulong sa plataporma mahimo nga indi makawiwili, kag indi lang naton matalupangdan, nagadalamguhanon na kita—ayhan nagadukaan pa gani! Bangod importante ang impormasyon nga ginapresentar, dapat kita manikasog nga pauswagon ang aton ikasarang sa pagkonsentrar sa mga miting sa kongregasyon. Apang paano naton ini himuon?

12. Ano ang makabulig sa aton agod mas mahapos ang aton pagkonsentrar sa mga miting?

¹² Masami nga mas mahapos magkonsentrar sa mga miting kon nakahanda kita sing maayo. Busa, ngaa indi magpain sing tion nga matun-an sing abanse ang materyal nga pagabinagbinagon? Pila lamang ka minuto ang kinahanglan kada adlaw agod mabasa kag mapamalandungan ang isa ka bahin sang gin-asayn nga mga kapitulo sa Biblia nga basahon sa kada semana. Paagi sa pagplano, makakita man kita sing tion sa paghanda para sa Pagtinuon Sang Kongregasyon sa Libro kag Pagtinuon sa Lalantawan. Ano man ang aton iskedyul, isa ka butang ang pat-od: Ang paghanda makabulig sa aton nga makakonsentrar sa materyal nga ginabinagbinag sa mga miting sa kongregasyon.

13. Ano ang makabulig sa aton sa pagpabilin nga nagakonsentrar sa materyal nga ginabinagbinag sa mga miting?

 ¹³ Dugang pa sa paghanda sing maayo, nasapwan sang iban nga mas atentibo sila sa mga miting sa Kingdom Hall kon nagapungko sila sa atubangan. Ang pagtulok sa humalambal, pagbukad sing Biblia kon may ginabasa nga kasulatan, kag pagkuha sing mga nota amo ang iban nga paagi agod indi maglagaw ang aton hunahuna. Apang, ang handa nga tagipusuon mas importante sangsa bisan ano nga teknik sa pagkonsentrar. Dapat nahangpan naton ang katuyuan sang pagtipon naton sing tingob. Labaw sa tanan, nagatipon kita upod sa mga masigkatumuluo agod magsimba kay Jehova. (Salmo 26:12; Lucas 2:​36, 37) Ang mga miting isa ka importante nga paagi diin ginapakaon kita sa espirituwal. (Mateo 24:45-​47) Dugang pa, ginahatagan kita sini sing kahigayunan nga ‘pukawon ang isa kag isa sa gugma kag sa maayong mga buhat.’—Hebreo 10:24, 25.

14. Ano gid ang makahimo sa miting nga magmadinalag-on?

¹⁴ Ang pila may huyog nga husgaran ang kalidad sang miting paagi sa mga ikasarang sa pagtudlo sang mga may bahin. Kon sangkol gid ang mga humalambal, matawag ini nga makalilipay nga miting. Apang kon daw indi epektibo ang pagtudlo, mahimo nga kabaliskaran ang aton pagtamod. Matuod nga dapat himuon sang mga may bahin sa programa ang tanan nila nga masarangan sa paggamit sing arte sa pagpanudlo kag ilabi na sa paglab-ot sa tagipusuon. (1 Timoteo 4:​16) Apang, kita nga nagapamati indi dapat mangin mamulayon. Bisan pa nga importante ang ikasarang sa pagpanudlo sang mga may bahin, wala lamang nasandig sa sini ang kadalag-an sang miting. Wala bala kamo nagaugyon nga ang aton dapat panguna nga ginakabalak-an, indi kon paano ginahatag sang humalambal ang iya pamulongpulong, kundi kon paano kita nagapamati? Kon nagatambong kita sa mga miting kag nagapamati sa kon ano ang ginapresentar, nagasimba kita sa Dios suno sa iya kabubut-on. Amo ini ang nagahimo sa miting nga madinalag-on. Kon nalangkag kita  sa pagkuha sing ihibalo tuhoy sa Dios, makabenepisyo kita sa mga miting, walay sapayan sang mga ikasarang sang humalambal. (Hulubaton 2:​1-5) Gani, dapat gid kita mangin determinado nga ‘maghatag sing labi pa sangsa kinaandan nga igtalupangod’ sa aton mga miting.

Magbenepisyo sing Bug-os Gikan sa Personal nga Pagtuon

15. Paano kita makabenepisyo sa pagtuon kag pagpamalandong?

¹⁵ Nagabenepisyo gid kita gikan sa ‘paghatag sing labi pa sangsa kinaandan nga igtalupangod’ sa mga tion sang personal nga pagtuon kag pagpamalandong. Ang pagbasa kag pagpamalandong sa Biblia kag sa Cristianong mga publikasyon magahatag sa aton sing hamili nga mga kahigayunan nga mapatudok sa aton tagipusuon ang mga kamatuoran sang Pulong sang Dios. Ini, subong resulta, may daku nga epekto kon paano kita nagahunahuna kag nagapanghikot. Sa pagkamatuod, magabulig ini sa aton nga makasapo sing kalipay sa paghimo sing kabubut-on ni Jehova. (Salmo 1:2; 40:8) Busa, kinahanglan nga pauswagon naton ang aton ikasarang sa pagkonsentrar agod makabenepisyo kita sa aton pagtuon. Mahapos lang kita matublag! Ang tawag sa telepono ukon gahod mahimo na nga makatublag sa aton. Ukon mahimo nga indi kita makakonsentrar sing malawig. Mahimo kita magpungko agod magkaon sa espirituwal, apang indi madugayan kag nagalagaw na ang aton hunahuna. Paano kita ‘makahatag sing labi pa sangsa kinaandan nga igtalupangod’ sa tion sang aton personal nga pagtuon sa Pulong sang Dios?

16. (a) Ngaa importante para sa aton nga mag-iskedyul sing tion para sa personal nga pagtuon? (b) Paano ka nagapain sing tion para sa pagtuon sa Pulong sang Dios?

¹⁶ Mapuslanon nga maghimo sing iskedyul kag magpili sing isa ka duog nga maayo gid tun-an. Para sa kalabanan sa aton, ang tion kag pag-isahanon talagsa lang matigayon. Mahimo magbatyag kita nga ang kasakuon sa matag-adlaw nga mga hilikuton nagaanod sa aton kaangay sang isa ka sanga sa masulog nga tubig. Ang matuod, kinahanglan nga sulangon naton ang sulog, kon sa aton pa, agod makasapo kita sing tion sa pagtuon. Indi mahimo nga maghulat lang kita sa pag-abot sang kahigayunan nga makatuon. Sa baylo, kinahanglan nga kontrolon naton ang kahimtangan paagi sa pagpain sing tion sa pagtuon. (Efeso 5:​15, 16) Ang pila nagapain sing malip-ot nga tion sa aga nga mas diutay ang tublag. Nasapwan sang iban nga mas maayo sa gab-i. Ang punto amo nga indi naton dapat pagpasapayanan ang pagkaimportante sang pagkuha sing sibu nga ihibalo sa Dios kag sa iya Anak. (Juan 17:3) Busa, dapat kita mag-iskedyul sing tion para sa personal nga pagtuon kag sundon ining iskedyul.

17. Ano ang pagpamalandong, kag paano kita makabenepisyo sa sini?

¹⁷ Ang pagpamalandong—ang paghunahuna sang aton natun-an paagi sa pagtuon—importante gid. Nagabulig ini sa aton nga makuha ang mga panghunahuna sang Dios gikan sa naimprinta nga pahina kag ibutang ini sa aton tagipusuon. Nagabulig man ini sa aton kon paano iaplikar ang laygay sang Biblia agod kita “mangin mga manugtuman sang pulong, kag dili manugpalamati lamang.” (Santiago 1:22-25) Dugang pa, ang pagpamalandong nagabulig sa aton nga mangin suod pa gid kay Jehova, kay nagabulig ini sa aton nga mabinagbinag ang iya mga kinaiya kag kon paano ini ginapadaku sa materyal nga ginabinagbinag sa tion sang pagtuon.

18. Ano nga mga kahimtangan ang kinahanglanon para sa epektibo nga pagpamalandong?

¹⁸ Agod makabenepisyo sing bug-os gikan sa pagtuon kag pagpamalandong, dapat indi matublag ang aton hunahuna. Agod makakuha sing bag-o nga impormasyon kon nagapamalandong kita, kinahanglan isikway naton ang mga tublag sang moderno nga pagkabuhi. Ang paghimo sini nagakinahanglan sang tion kag pag-isahanon, apang daw ano ka makapaumpaw nga magpakig-ambit sa espirituwal nga pagkaon kag sa mga tubig sang kamatuoran nga masapwan sa Pulong sang Dios!

19. (a) Kon tuhoy sa personal nga pagtuon, ano ang nakabulig sa pila nga mapalawig ang ila pagkonsentrar? (b) Ano dapat ang aton panimuot tuhoy sa pagtuon, kag ano nga mga benepisyo ang aton matigayon gikan sa sining importante nga hilikuton?

 ¹⁹ Ano abi kon indi kita makakonsentrar sing malawig kag magsugod sa paglagaw ang aton hunahuna pagkatapos sang malip-ot nga pagtuon? Nasapwan sang iban nga sarang nila mapalawig ang ila konsentrasyon sa pagtuon paagi sa malip-ot anay nga pagtuon kag amat-amat ini padugayon. Ang aton tulumuron amo ang paghinguyang sing bastante nga tion sa pagtuon sangsa dalidalion ini. Dapat naton palambuon ang daku nga interes sa topiko nga ginabinagbinag. Kag makapanalawsaw kita sing dugang nga ginagamit ang madamo nga materyal nga ginaaman sang matutom kag mainandamon nga ulipon nga klase. Daku ang kabilihanan sa paglili sa “madalom nga mga butang sang Dios.” (1 Corinto 2:​10) Mapauswag sini ang aton ihibalo sa Dios kag mapalambo ang aton ikasarang sa paghantop. (Hebreo 5:​14) Kon maukod kita nga mga estudyante sang Pulong sang Dios, ‘mangin sangkol man kita sa pagtudlo sa iban.’—2 Timoteo 2:2.

20. Paano naton mapalambo kag mahuptan ang suod nga kaangtanan kay Jehova nga Dios?

²⁰ Ang pagtambong sa Cristianong mga miting kag pagtuon sing personal magabulig gid sa aton nga mapalambo kag mahuptan ang suod nga kaangtanan kay Jehova. Maathag nga amo gid sini ang kahimtangan sang salmista nga nagsiling sa Dios: “Daw ano ang paghigugma ko sang imo kasuguan! Ginahunahuna ko ini sa bug-os nga adlaw.” (Salmo 119:97) Nian, tambungan gid naton sing tayuyon ang mga miting, mga asambleya, kag mga kombension. Kag kabay nga magbakal kita sing tion para sa pagtuon sing Biblia kag pagpamalandong. Padyaan gid kita sing bugana tungod sa paghatag naton sing “labi pa sangsa kinaandan nga igtalupangod” sa Pulong sang Dios.

[Nota]

Madumduman Mo Bala?

• Ngaa naanod palayo ang pila ka Hebreong Cristiano gikan sa matuod nga pagtuo?

• Paano kita makapabilin nga atentibo sa Cristianong mga miting?

• Ano ang makabulig sa aton nga makabenepisyo gikan sa personal nga pagtuon sa Biblia kag pagpamalandong?

[Mga Pamangkot sa Pagtinuon]

[Retrato sa pahina 11]

Ang mga Hebreong Cristiano dapat mangin alisto sa nagahilapit nga kalaglagan sang Jerusalem

[Retrato sa pahina 13]

Mabuligan sang mga ginikanan ang ila kabataan agod makabenepisyo sa Cristianong mga miting