Handum Mo Bala ang Kalibutan Diin Indi Ka na Mahadlok?

“Nagakabuhi kita nga ‘pirme ginakulbaan kag . . . daw wala sing mahimo,’ bangod sang ‘indi malaragway nga . . . katalagman nga mahimo matabo sa bisan ano nga tion kag paagi nga indi kita makapangaman.’”

MAHANTOP sa sini nga mga tinaga, nga ginkutlo sang nagligad nga tuig sa magasin nga Newsweek, ang balatyagon sang madamo nga tawo sa magamo nga kalibutan karon. Ginsiling ni Jesucristo nga magabaskog pa ini nga mga balatyagon sa malapit na nga palaabuton. Gintagna niya ang tion nga magakalisang ang mga pungsod kaangay sini amo nga indi nila mahibaluan ang himuon kag ang mga tawo magakapunaw bangod sa kahadlok kag sa paghulat sa mga butang nga magaabot sa duta. Apang, indi kita dapat mahadlok ukon magbatyag nga wala sing mahimo, kay si Jesus nagsiling pa: “Samtang ini nga mga butang nagasugod sa pagkahanabo, magtindog kamo sing tadlong kag ihangad ang inyo mga ulo, kay ang pagtubos sa inyo nagahilapit na.”​—⁠Lucas 21:25-28.

Sa paglaragway sa kahimtangan sang pagkabuhi sang iya katawhan sa duta sa tapos sini nga pagtubos, si Jehova nga Dios nagsiling: “Ang akon katawhan magapuyo sa puluy-an nga mahidaiton kag sa mga puluy-an nga may bug-os nga kalig-unan kag sa malinong nga mga palahuwayan.” (Isaias 32:18) Paagi sa iya manalagna nga si Miqueas, si Jehova nagsiling: “Magalingkod sila, ang tagsatagsa sa idalom sang iya puno sang ubas kag sa idalom sang iya kahoy nga igos, kag wala sing magapakurog sa ila.”​—⁠Miqueas 4:4.

Kabaliskaran gid ini sa kabuhi karon! Wala na sing katalagman nga magapahadlok sa katawhan. Sa baylo sang pirme nga pagbatyag sing kakulba kag pagkawalay mahimo, mangin dayon ang paghidait kag kalipay.