Ang Katahom ang mga Tinuga ni Jehova

“Kadamo sang Imo mga Binuhatan, O Jehova!”

NAGAPUYO man kita sa uma ukon sa siudad, sa bukid ukon sa higad baybay, napalibutan kita sing makahalawhaw nga katahom sang mga tinuga. Sing nagakaigo, ginapakita sang 2004 Calendar of Jehovah’s Witnesses ang matahom nga talan-awon sang makatilingala nga mga binuhatan ni Jehova nga Dios.

Pirme ginaapresyar sang mga tawo ang mga binuhatan sang Dios. Halimbawa, binagbinaga si Solomon, nga ang kaalam “naglabaw sa kaalam sang tanan nga katawhan sa Sidlangan.” Ang Biblia nagasiling: “Nagpamulong sia nahanungod sang mga kahoy, kutob sa sedro sang Lebanon tubtob sa isopo nga nagatubo sa mga dingding; kag nagpamulong man sia nahanungod sang kasapatan kag sang kapispisan kag sang nagasaug nga mga butang kag sang kaisdaan.” (1 Hari 4:​30, 33) Ang amay ni Solomon, nga si Hari David, masami nga nagapamalandong sa mga obra maestra sang Dios. Napahulag sia sa pagdayaw sa iya Taghimo: “Kadamo sang imo mga binuhatan, O Jehova! Sa kaalam ginhimo mo ini tanan. Ang duta puno sang imo mga binuhatan.”​—⁠Salmo 104:24.⁠ *

Dapat man kita magpanilag kag magtuon sa mga tinuga. Halimbawa, mahimo man naton ‘itangla ang aton mga mata sa hitaas’ kag mamangkot: “Sin-o ang nagtuga sining mga butang?” Bueno, si Jehova nga Dios, nga “bugana sa dinamiko nga kusog” kag sa pagkamatuod ‘mabaskog sa gahom’!​—⁠Isaias 40:26.

Paano ang pagpamalandong sa mga tinuga ni Jehova makaapektar sa aton? Sa dimagkubos sa tatlo ka paagi. Sarang ini (1) makapahanumdom sa aton sa pagpabalor sang aton kabuhi, (2) makapahulag sa aton nga buligan ang iban nga makatuon tuhoy sa mga tinuga, kag (3) makapahulag sa aton nga kilalahon kag apresyahon ang aton Manunuga sing bug-os.

Ang kabuhi naton subong mga tawo nga mas superyor sangsa “wala sing pangatarungan nga mga sapat,” ang nagapaposible sa aton nga mapanilagan kag mapabaloran ang pagkamakatilingala sang mga tinuga. (2 Pedro 2:12) Makita naton ang matahom nga mga lugar. Mabatian naton ang malulot nga mga huni sang mga pispis. Kag sarang kita makadumdom sang hamili nga mga handumanan. Bisan pa ang aton karon kabuhi indi himpit, kanami gid mabuhi!

Nalipay ang mga ginikanan maglantaw sa kinaugali nga pagkawili sang ila mga bata sa mga tinuga. Nanamian gid ang mga bata mangita sing mga pakinhason sa baybay, sa pagsagod sing hinuptanan, sa pagsaka sa kahoy! Dapat buligan sang mga ginikanan ang ila mga bata nga makita ang kaangtanan sang mga tinuga sa Manunuga. Ang kahayanghag kag pagtahod nga mapalambo sang mga bata sa mga tinuga ni Jehova magapabilin sa ila sa bug-os nila nga kabuhi.​—⁠Salmo 111:​2, 10.

Nakulangan gid kita sing paghangop kon ginadayaw naton ang mga tinuga apang wala ginaapresyar ang Manunuga. Ang tagna ni Isaias nagabulig sa aton nga mapamalandungan ining  punto sang nagsiling ini: “Wala bala kamo makahibalo ukon wala bala kamo makabati? Si Jehova, ang Manunuga sang mga ukbong sang duta, isa ka Dios tubtob sa walay latid nga tion. Wala sia ginalapyo ukon ginaluyahan. Indi matungkad ang iya paghangop.”​—⁠Isaias 40:28.

Huo, ang mga binuhatan ni Jehova nagapamatuod sang iya indi matungkad nga kaalam, sang iya indi matupungan nga gahom, kag sang iya tudok nga gugma sa aton. Kon makita naton ang katahom sa aton palibot kag mahantop ang mga kinaiya sang Isa nga naghimo sini tanan, kabay nga mapahulag kita sa pagsiling kaangay ni David: “Wala gid sing kaangay sa imo . . . , O Jehova, ni mga binuhatan nga kaangay sa imo mga binuhatan.”​—⁠Salmo 86:8.

Makasalig kita nga ang matinumanon nga mga tawo padayon nga magadayaw sa mga tinuga ni Jehova. Tubtob sa walay katubtuban, may yara kita walay katapusan nga kahigayunan nga makatuon sing dugang pa tuhoy kay Jehova. (Manugwali 3:11) Kag samtang nagadugang ang aton natun-an tuhoy sa iya, mas labi pa naton nga mahigugma ang aton Manunuga.

[Nota]

[Kahon sa pahina 9]

Pagdayaw sa Manunuga

Madamong mainapresyahon nga mga sientipiko ang nagkilala sa papel sang Dios sa pagpanuga. Yari ang pila ka halimbawa:

“Natigayon ko ang importansia kag kalipay sa akon hilikuton sa siensia sa tion nga may matukiban ako kon kaisa nga bag-o nga butang kag nagasiling ako sa akon kaugalingon, ‘Ti amo gali sini ang paagi sang Dios sa pagbuhat.’ Ang akon tulumuron amo nga mahangpan ang magamay nga bahin sa plano sang Dios.”​​—⁠Henry Schaefer, propesor sang kemika.

“Kon tuhoy sa kabangdanan sang pagsangkad sang Uniberso, ang bumalasa ang magahimo sang iya kaugalingon nga konklusion, apang ang amon paghangop sa sini kulang kon wala Sia [Dios].”​​—⁠Edward Milne, Britaniko nga kosmologo.

“Nakahibalo kami nga ang kinaugali ginalaragway sang tanan nga sahi sang matematika bangod gintuga ini sang Dios.”​​—⁠Alexander Polyakov, Ruso nga matematiko.

“Sa amon pagtuon sa kinaugali nga mga butang, ginabinagbinag namon ang panghunahuna sang Manunuga, ginausisa ang iya mga ideya, ginahangop ang Iya sistema indi ang amon.”​—⁠Louis Agassiz, Amerikano nga biologo.

[Retrato sa pahina 8, 9]

Gentoo nga mga penguin, Antarctic Peninsula

[Retrato sa pahina 9]

Grand Teton National Park, Wyoming, E.⁠U.⁠A.

[Credit Line]

Jack Hoehn/Index Stock Photography