Ang Biblia Makabulig sa Imo nga Makasapo sing Kalipay

BISAN pa ang Biblia indi isa ka libro tuhoy sa medisina, nagakomento ini sa epekto sang mga emosyon​—⁠positibo man ukon negatibo​—⁠sa mental kag pisikal nga kapagros sang isa. “Ang tagipusuon nga malipayon maayo nga bulong,” siling sang Biblia, “apang ang espiritu nga buong nagapamala sang mga tul-an.” Aton man mabasa: “Nagaluya bala ang imo buot sa adlaw sang kapiutan? Ang imo kusog mangin diutay.” (Hulubaton 17:22; 24:10) Ang pagluya sing buot nagapaluya sa aton kag nagabutang sa aton sa katalagman, nga wala sing handum nga magbag-o ukon mangayo sing bulig.

Ang pagluya sing buot makaapektar man sa espirituwalidad sang isa. Ang mga tawo nga nagabatyag nga wala sing kabilinggan masami nagabatyag nga indi gid nila matigayon ang maayo nga kaangtanan sa Dios kag indi gid sila mahamut-an sang Dios. Si Simone nga ginsambit sa nahauna nga artikulo, nagduhaduha kon bala sia “ang sahi sang tawo nga kahamut-an sang Dios.” Apang, kon usisaon naton ang Pulong sang Dios, ang Biblia, makita naton nga ginakahamut-an sang Dios ang mga nagapanikasog nga pahamut-an sia.

Nagaulikid Gid ang Dios

Ang Biblia nagasugid sa aton nga “Si Jehova malapit sa mga buong sing tagipusuon; kag ginaluwas niya ang mga nadugmok sa espiritu.” Wala ginatamay sang Dios “ang buong kag nadugmok nga tagipusuon,” kundi nagasaad sia nga ‘ipasag-uli ang espiritu sang mga mapainubuson kag ipasag-uli ang tagipusuon sang mga ginapigos.’​—⁠Salmo 34:18; 51:17; Isaias 57:15.

Isa ka bes nakita sang Anak sang Dios, si Jesus, nga kinahanglan ipatalupangod sa iya mga disipulo ang katunayan nga nakita sang Dios ang maayo nga mga butang sa Iya mga alagad. Paagi sa isa ka ilustrasyon, ginsaysay niya nga ginatalupangod sang Dios kon ang isa ka maya mahulog sa duta​—⁠isa ka butang nga para sa kalabanan nga tawo indi importante. Ginpadaku man niya nga nahibaluan sang Dios ang pinakagamay  nga detalye tuhoy sa tawo, bisan ang kadamuon sang buhok sa ila ulo. Ginhinakpan ni Jesus ang iya ilustrasyon paagi sa pagsiling: “Busa dili kamo mahadlok: mahal pa kamo sa madamo nga maya.” (Mateo 10:29-31)⁠ * Ginpakita ni Jesus nga walay sapayan sang ginabatyag sang mga indibiduwal tuhoy sa ila kaugalingon, ang mga tawo nga may pagtuo may balor gid sa Dios. Sa katunayan, ginapahanumdom ni apostol Pedro sa aton nga “ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sing pagkamatarong kalahamut-an sa iya.”​—⁠Binuhatan 10:​34, 35.

Hupti ang Balanse nga Pagtamod

Ginapalig-on kita sang Pulong sang Dios nga palambuon ang pagkabalanse sa pagtamod naton sa aton kaugalingon. Si apostol Pablo gin-inspirar sa pagsulat: “Paagi sa di-bagay nga kaayo nga ginhatag sa akon ginasugiran ko ang kada isa sa inyo dira nga indi maghunahuna sing labaw sa dapat niya hunahunaon sa iya kaugalingon; kundi maghunahuna agod mangin maligdong sa hunahuna, ang kada isa suno sa kadakuon sang pagtuo nga ginhatag sa iya sang Dios.”​—⁠Roma 12:3.

Sa pagkamatuod, indi naton dapat hunahunaon ang aton kaugalingon nga labaw sa kon ano gid kita tubtob sa punto nga nagapahambog na kita; kag indi man naton dapat tamdon ang aton kaugalingon nga wala gid sing kabilinggan. Sa baylo, dapat naton tinguhaan nga palambuon ang makatarunganon nga pagtamod sa aton kaugalingon, nga ginabinagbinag ang aton kabakod kag subong man ang aton mga limitasyon. Ang isa ka Cristianong babayi nagsiling: “Indi man gid ako malain nga tawo; kag indi man ako ang pinakamaayo. May maayo ako nga mga kinaiya kag may malain man, kag ang tanan subong man sini.”

Sa pagkamatuod, ang pagtigayon sining balanse nga pagtamod indi mahapos. Mahimo magkinahanglan sing daku gid nga panikasog agod dulaon ang tuman ka negatibo nga pagtamod sa kaugalingon nga yara sa aton sa madamo na nga tinuig. Apang, paagi sa bulig sang Dios mabag-o naton ang aton personalidad kag ang aton pagtamod sa kabuhi. Ang matuod, ginapalig-on kita sang Pulong sang Dios nga himuon ini. Aton mabasa: ‘Ubaha ninyo ang daan nga personalidad nga nahisuno sa inyo una nga dalanon sang paggawi kag ginapalain suno sa iya madaya nga mga kailigbon; apang magbag-o kamo sa puwersa nga nagapahikot sa inyo hunahuna, kag magsuklob sing bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.’​—⁠Efeso 4:22-24.

Paagi sa pagpanikasog nga bag-uhon ang ‘puwersa nga nagapahikot sa aton hunahuna,’ buot silingon, ang nagapanguna nga huyog sang aton hunahuna, mabag-o naton ang aton personalidad nga tuman ka negatibo sa isa nga positibo. Narealisar ni Lena, nga ginsambit sa nahauna nga artikulo, nga kon indi niya pagdulaon ang panghunahuna nga wala sing magahigugma ukon magabulig sa iya, wala man sing makapabag-o sang iya balatyagon tuhoy sa iya kaugalingon. Ano ang praktikal nga laygay nga mabasa sa Biblia ang nakabulig kanday Lena, Simone, kag sa iban pa nga magbag-o?

 Mga Prinsipio sa Biblia nga Nagapalambo sang Kalipay

“Ihaboy ang imo lulan kay Jehova, kag sia gid magaalay-ay sa imo.” (Salmo 55:22) Una sa tanan, ang pangamuyo makabulig sa aton nga makasapo sing matuod nga kalipay. Si Simone nagsiling: “Kon ginaluyahan ako sing buot, nagadangop ako kay Jehova kag nagapangayo sang iya bulig. Pirme ko gid mabatyagan ang iya kusog kag panuytoy sa akon.” Sang ginapalig-on kita sang salmista nga ihaboy ang aton lulan kay Jehova, ginapahanumdom niya kita nga wala lamang nagaulikid si Jehova sa aton kundi ginatamod man niya kita subong mga indibiduwal nga takus sang iya bulig kag pagsakdag. Sang gab-i sang Paskua sang 33 C.⁠E., nasubuan ang mga disipulo ni Jesus bangod sang ginsiling ni Jesus tuhoy sa iya nagahilapit nga pagbiya. Ginpalig-on sila ni Jesus nga mangamuyo sa Amay, kag nagsiling pa sia: “Pangayo kag kamo magabaton, agod nga ang inyo kalipay mabug-os.”​—⁠Juan 16:​23, 24.

“May kapin nga kalipay sa paghatag sangsa pagbaton.” (Binuhatan 20:35) Subong sang gintudlo ni Jesus, ang paghatag isa ka importante nga butang sa pagtigayon sing matuod nga kalipay sa kabuhi. Ang pag-aplikar sining kamatuoran sang Biblia nagabulig sa aton nga masentro ang igtalupangod sa mga kinahanglanon sang iban sa baylo nga sa aton mga kakulangan. Kon ginabuligan naton ang iban kag makita ang ila pagkamapinasalamaton, nagaayo ang aton pamatyag. Kumbinsido si Lena nga ang regular nga pagsugid sa iban sing maayong balita gikan sa Biblia nakabulig sa iya sa duha ka paagi. “Una, naghatag ini sa akon sing kalipay kag kaayawan nga ginasiling ni Jesus,” siling niya. “Ikaduha, nakabaton ako sing positibo nga reaksion gikan sa iban, nga nakabulig sa akon nga makasapo sing kalipay.” Paagi sa maalwan nga pagbulig sa iban, maeksperiensiahan naton ang pagkamatuod sang Hulubaton 11:25: “Ang isa nga nagabunyag sing bugana sa iban bunyagan man sing bugana.”

“Ang tanan nga adlaw sang napiutan malain; apang ang may maayo sing tagipusuon may dalayon nga piesta.” (Hulubaton 15:15) Tanan kita makapili kon paano naton tamdon ang aton kaugalingon kag ang aton mga sirkumstansia. Mangin kaangay kita sa isa nga nagatamod sing negatibo sa tanan nga butang kag mapiutan, ukon mahimo kita maghunahuna sing positibo, magbatyag sing ‘maayo sa tagipusuon,’ kag mangin malipayon subong bala nga daw sa piesta kita. Siling ni Simone: “Ginatinguhaan ko nga mangin positibo. Masako ako sa personal nga pagtuon kag sa ministeryo, kag tayuyon ako nga nagapangamuyo. Nagapakig-upod man ako sa mga tawo nga may positibo nga panimuot, kag ginabuligan ko ang iban.” Ini nga panimuot sang tagipusuon nagaresulta sa matuod nga kalipay, subong sang ginapalig-on sa aton sang Biblia: “Magkasadya kay Jehova kag magmalipayon, kamo nga mga matarong; kag magsinggit sa kalipay, tanan kamo nga matadlong ang tagipusuon.”​—⁠Salmo 32:11.

“Ang matuod nga kaupod nagahigugma sa tanan nga tion, kag isa ka utod nga natawo kon may kapiutan.” (Hulubaton 17:17) Ang pagpakighambal sa isa nga imo hinigugma ukon sa ginasaligan nga manuglaygay makabulig sa aton agod malandas ang negatibo nga mga balatyagon  kag masikway ini antes kita madaug sini. Ang pagpakighambal sa iban makabulig sa aton nga tamdon ang mga butang sing balanse kag positibo. “Ang pagpautwas sang akon mga ginabatyag nakabulig gid,” siling ni Simone. “Kinahanglan isugid mo sa iban ang imo ginabatyag. Sa masami, ang pagpautwas lamang sang imo ginabatyag ang kinahanglan.” Ang paghimo sini makabulig sa imo nga maeksperiensiahan nga matuod ang hulubaton nga nagasiling: “Ang kabalaka sa tagipusuon sang isa ka tawo magapakuko sini, apang ang maayong pulong nagapasadya sini.”​—⁠Hulubaton 12:25.

Kon Ano ang Imo Mahimo

Nabinagbinag naton ang pila lamang sa madamo nga makalilipay kag praktikal nga mga prinsipio gikan sa Biblia nga makabulig sa aton nga malandas ang negatibo nga mga balatyagon kag makasapo sing matuod nga kalipay. Kon isa ka sa mga nabudlayan bangod sang pagbatyag nga di-sangkol, ginapalig-on ka namon nga usisaon sing maayo ang Pulong sang Dios, ang Biblia. Tun-i nga mapalambo ang realistiko kag balanse nga pagtamod sa imo kaugalingon kag tuhoy sa imo kaangtanan sa Dios. Ginalauman gid namon nga paagi sa pagtuytoy sang Pulong sang Dios, masapwan mo ang matuod nga kalipay sa tanan nga imo ginahimo.

[Nota]

[Retrato sa pahina 7]

Ang pagkabuhi sa mga prinsipio sang Biblia nagapalambo sang kalipay