“Ang Bulig sa Akon Nagagikan kay Jehova”

Ginapakamaayo ni Jehova ang mga Masinakripisyuhon

ISA ka tawo ang nagabisikleta sa madabong nga kagulangan sang Cameroon. Sa sulod sang pila ka oras, nagaagi sia sa nabahaan kag lutakon nga mga dalan, sa amo ginaatubang ang katalagman agod mapalig-on ang iban. Agod matudluan ang isa ka naligwin nga grupo, duha ka lalaki sa Zimbabwe ang nagalakat sing 15 kilometros, nga ginatabok ang nagabaha nga mga suba, samtang nagatus-on sang ila mga bayo kag sapatos agod indi ini mabasa. Sa isa naman ka duog, nagabugtaw sing alas kuatro sa kaagahon ang isa ka babayi agod duawon kag tudluan sa Biblia ang isa ka nars nga mahimo lang magtuon sing isa ka oras sa kaagahon.

Paano magkaanggid ining tatlo ka halimbawa? Tanan sila bug-os tion nga mga ministro sang mga Saksi ni Jehova nga nagatudlo sing kamatuoran sa Biblia. Sila amo ang mga regular kag espesyal payunir, misyonero, nagalakbay nga manugtatap, kag linibo ka boluntaryo sa mga puluy-an Bethel sa bug-os nga kalibutan. Nakilal-an sila bangod sang ila pagkamasinakripisyuhon. *

Husto nga Motibo

Ginasunod sang mga Saksi ni Jehova ang laygay ni apostol Pablo kay Timoteo: “Himua ang imo bug-os nga masarangan nga ipakita ang imo kaugalingon nga nahamut-an sang Dios, manugpangabudlay nga wala sing dapat ikahuya, nga nagagamit sing matadlong sang pulong sang kamatuoran.” (2 Timoteo 2:15) Apang, ano ang nagapahulag sa ginatos ka libo ka Saksi nga mag-alagad subong bug-os tion nga mga ministro?

Kon pamangkuton ang bug-os tion nga mga ministro kon ngaa nagapangabudlay sila sa pag-alagad kay Jehova, ang ila sabat amo nga ginahigugma nila ang Dios kag ang ila isigkatawo. (Mateo 22:37-​39) Nagakaigo gid ini, kay kon wala sila sing gugma, mangin walay pulos ang ila pagpangabudlay.​—1 Corinto 13:​1-3.

Masinakripisyuhon nga Pag-alagad

Ginbaton sang tanan dedikado nga Cristiano ang imbitasyon ni Jesus: “Kon ang bisan sin-o luyag magsunod sa akon, ipanghiwala niya ang iya kaugalingon kag pas-anon ang iya usok sang pag-antos kag padayon nga magsunod sa akon.” (Mateo 16:24) Ang pagpanghiwala sang aton kaugalingon nagakahulugan nga handa kita magpasakop nga panag-iyahan kag tuytuyan ni Jehova nga Dios kag ni Jesucristo. Amo ini ang nagpahulag sa madamo nga mag-alagad sing masinakripisyuhon bilang bug-os tion nga mga ministro.

Madamo nga Saksi ang nanikasog gid agod madugangan pa ang ila pag-alagad kay Jehova. Binagbinaga ang halimbawa ni Júlia, isa ka 56 anyos nga regular payunir sa São Paulo, Brazil. “Isa ka utod nga lalaki nga Intsik ang nagtelepono sa akon kag namangkot kon interesado ako magtuon sing Inintsik,” hinumdom niya. “Bangod may edad na ako, wala na magsulod sa pensar ko nga magtuon sing bag-o nga lenguahe. Apang pagligad sang pila ka adlaw, ginbaton ko ini nga hangkat. Subong, makahatag na ako sing Makasulatanhon nga mga presentasyon sa Inintsik.”

Ang sanga talatapan sang mga Saksi ni Jehova  sa Peru nagreport: “Sining karon lang, ginatos ka regular payunir ang nagsaylo sa wala pa matangdo nga mga teritoryo nga nagapakita sang ila maisugon kag masinakripisyuhon nga espiritu. Nagsaylo sila sa nabaw-ing nga mga banwa nga wala sing moderno nga mga pasilidad kag maiwat ang trabaho. Handa magsakripisyo ining mga kauturan agod makapabilin sa ila mga asaynment. Apang labaw sa tanan, ang ila pagministeryo isa ka pagpakamaayo sa madamo nga duog. Ang mga nagalakbay nga manugtatap nagreport nga may bag-ong mga grupo nga naporma bangod sa bulig sining masinakripisyuhon nga mga regular payunir.”

Gintaya sang pila ka Cristiano ang ila kabuhi agod buligan ang ila mga masigkatumuluo. (Roma 16:​3, 4) Ang isa ka manugtatap sang sirkito nga naasayn sa may inaway nga duog sa Aprika nagreport: “Antes kami makalab-ot sa katapusan nga barikada sa ulot sang teritoryo sang mga rebelde kag sang gobierno, ginpalibutan kami nga mag-asawa sang apat ka kumander militar sang mga rebelde kag sang ila mga badigard, kag namangkot kon sin-o kami. Samtang ginatan-aw nila ang amon ID, nakita nila nga naghalin kami sa lugar nga kontrolado sang gobierno, gani nagsuspetsa sila sa amon. Ginpasibangdan nila ako nga espiya. Gani, ginhulog nila ako sa buho. Ginpaathag ko kon sin-o kami, gani ginbuy-an nila kami sang ulihi.” Nalipay gid ang mga kongregasyon nga naduaw sila sining masinakripisyuhon nga mag-asawa!

Walay sapayan sang mga kabudlayan nga ginaatubang nila, nagadamo ining bug-os tion nga mga ministro sa bug-os nga kalibutan. (Isaias 6:8) Ginapabaloran sining mapisan nga mga manugpangabudlay ang ila pribilehiyo nga alagdon si Jehova. Minilyon sang iban pa karon ang nagadayaw kay Jehova nga may amo sini ka masinakripisyuhon nga espiritu. Gani, ginapakamaayo niya sila sing bugana. (Hulubaton 10:22) Nagasalig nga padayon nga pakamaayuhon kag sakdagon, ining mapisan nga mga ministro makasiling man kaangay sang salmista nga nag-amba: “Ang bulig sa akon nagagikan kay Jehova.”​—Salmo 121:2.

[Nota]

[Blurb sa pahina 9]

“Ang imo katawhan magahalad sang ila kaugalingon sing kinabubut-on sa adlaw sang imo puwersa militar.”—SALMO 110:3

[Kahon sa pahina 8]

GINAPAKABAHANDI NI JEHOVA ANG IYA MATUTOM NGA MGA ALAGAD

“Magpakapag-on kamo, nga di-mationg, nga madamo pirme sing ginahimo sa hilikuton sang Ginuo, kay nahibaluan ninyo nga ang inyo pagpangabudlay may kaangtanan sa Ginuo indi walay pulos.”—1 Corinto 15:58.

“Ang Dios indi di-matarong nga malipat sa inyo binuhatan kag sa gugma nga ginpakita ninyo tungod sa iya ngalan.”—Hebreo 6:10.