Ginaluwas ni Jehova ang Napiutan

“Madamo ang mga kapahamakan sang matarong, apang gikan sa sini tanan ginaluwas sia ni Jehova.”—SALMO 34:19.

1, 2. Ano ang nangin problema sang isa ka matutom nga Cristiano, kag ngaa mahimo man kita makabatyag sing subong sini?

 ANG isa ka pamatan-on nga babayi nga si Keiko a kapin sa 20 ka tuig na nga Saksi ni Jehova. Isa sia anay ka regular payunir, ukon bug-os-tion nga manugbantala sang Ginharian. Ginpakabahandi gid niya yadto nga pribilehiyo. Apang, kasan-o lang, daw nadulaan na gid sing paglaum si Keiko kag nagbatyag nga nagaisahanon. “Pirme ako nagahibi,” siling niya. Agod mabatuan ang iya negatibo nga panghunahuna, naghinguyang si Keiko sing kapin nga tion sa personal nga pagtuon. “Sa gihapon, wala sini nabag-o ang akon panghunahuna,” siling niya. “Grabe gid ang akon kapung-aw amo nga luyag ko na lang mapatay.”

² Nakabatyag ka na bala sing subong sini? Subong isa sa mga Saksi ni Jehova, madamo ka sing rason agod magkalipay bangod ang diosnon nga debosyon ‘nagasaad sing kabuhi karon kag sa palaabuton.’ (1 Timoteo 4:8) Nagapuyo ka na karon sa espirituwal nga paraiso! Apang, buot bala sini silingon nga indi ka na makaeksperiensia sing bisan ano nga kapiutan? Indi gid! Ang Biblia nagasiling: “Madamo ang mga kapahamakan sang matarong.” (Salmo 34:19) Indi ini makapakibot, kay “ang bug-os nga kalibutan yara sa gahom sang isa nga malauton,” si Satanas nga Yawa. (1 Juan 5:19) Sa pila ka paagi, naeksperiensiahan naton tanan ang epekto sinang kamatuoran.—Efeso 6:12.

Ang mga Epekto sang Kapiutan

3. Maghatag sing mga halimbawa sang mga alagad sang Dios sa Biblia nga nakaeksperiensia sing daku nga kapiutan.

³ Ang malawig nga kalisod makapasubo sang aton kabuhi. (Hulubaton 15:15) Binagbinaga ang matadlong nga tawo nga si Job. Samtang yara sia sa mabudlay gid nga kahimtangan, si Job nagsiling: “Ang tawo, nga natawo sa babayi, malip-ot sing kabuhi kag puno sing kagamo.” (Job 14:1) Ang kalipay ni Job nadula. Sa sulod sang pila ka tion, naghunahuna pa gani sia nga ginbiyaan sia ni Jehova. (Job 29:1-5) Indi lamang si Job ang alagad sang Dios nga nakaeksperiensia sing tuman nga kalisod. Ang Biblia nagasugid sa aton nga ‘mapait ang kalag’ ni Ana bangod wala sia sing anak. (1 Samuel 1:9-11) Bangod sang problema sang ila pamilya, si Rebeka nagsiling: “Naugot na ako sa kabuhi ko nga ini.” (Genesis 27:46) Sang ginpamalandungan niya ang iya mga kasaypanan, si David nagsiling: “Bug-os nga adlaw ako nga nagalakat nga masubo.” (Salmo 38:6) Maathag nga ginapakita sining mga halimbawa nga ang mahinadlukon sa Dios  nga mga lalaki kag mga babayi sang antes-Cristiano nga dag-on nagbatas man sing daku nga kapiutan.

4. Ngaa indi makapakibot nga may “mga kalag nga ginapung-awan” sa tunga sang mga Cristiano karon?

⁴ Kamusta naman ang mga Cristiano? Kinahanglan ni apostol Pablo silingan ang mga taga-Tesalonica nga “maghambal sing malugpayon sa mga kalag nga ginapung-awan.” (1 Tesalonica 5:14) Ang isa ka reperensia nagsiling nga ang Griegong tinaga nga ginbadbad “mga kalag nga ginapung-awan” mahimo mapatuhoy sa mga “umalagi nga ginahul-an sing tuman sa kabuhi.” Ginpakita sang mga pulong ni Pablo nga nahanusbo anay ang pila ka hinaplas-sang-espiritu sa sadto nga kongregasyon sa Tesalonica. May mga kalag man nga napung-awan sa tunga sang mga Cristiano karon. Apang ngaa napung-awan sila? Binagbinagon naton ang tatlo ka kinaandan nga rason.

Ang Aton Pagkamakasasala Mahimo Magpalisod sa Aton

5, 6. Ano nga lugpay ang makita naton sa Roma 7:22-25?

⁵ Indi kaangay sang malaut nga mga tawo nga “nawad-an sang tanan nga igbalatyag sa maayo kag malain,” ang matuod nga mga Cristiano nagakalisod bangod sang ila makasasala nga kahimtangan. (Efeso 4:19) Mahimo nabatyagan man nila ang nabatyagan ni Pablo, nga nagsulat: “Nagakalipay gid ako sa kasuguan sang Dios suno sa akon pagkatawo sa sulod, apang nakita ko sa mga bahin sang akon lawas ang isa pa ka kasuguan nga nagapakig-away batok sa kasuguan sang akon hunahuna kag nagadala sa akon nga bihag sa kasuguan sang sala nga yari sa mga bahin sang akon lawas.” Nian nagtuaw si Pablo: “Kailo ako nga tawo!”—Roma 7:22-24.

⁶ Nabatyagan mo na bala ang nabatyagan ni Pablo? Indi malain nga talupangdon mo ang imo mga kasaypanan, kay mapatudok sini sa imo ang kabug-at sang sala kag mapalig-on sini ang imo determinasyon nga likawan ang kalainan. Apang indi kinahanglan nga pirme ka mapung-awan bangod sang imo mga kasaypanan. Sa iya bag-o lang makutlo nga mga kalisdanan, si Pablo nagdugang: “Salamat sa Dios paagi kay Jesucristo nga aton Ginuo!” (Roma 7:25) Huo, nagsalig si Pablo nga gawaron sia sang ginpaagay nga dugo ni Jesus gikan sa napanubli nga sala.—Roma 5:18.

7. Ano ang makabulig sa isa ka tawo agod indi magkalisod bangod sa iya makasasala nga mga huyog?

⁷ Kon napung-awan ka bangod sang imo makasasala nga huyog, makatigayon ka sing lugpay sa mga pulong ni apostol Juan, nga nagasiling: “Kon ang bisan sin-o makahimo sing sala, may mananabang kita upod sa Amay, si Jesucristo, isa nga matarong. Kag sia ang nagatumbas nga halad para sa aton mga sala, apang indi lamang para sa aton kundi para man sa bug-os nga kalibutan.” (1 Juan 2:1, 2) Kon nagakalisod ka bangod sang imo makasasala nga mga huyog, dumduma pirme nga si Jesus napatay para sa mga makasasala, indi para sa himpit nga mga tawo. Sa pagkamatuod, “ang tanan nakasala kag wala makalab-ot sa himaya sang Dios.”—Roma 3:23.

8, 9. Ngaa dapat naton likawan ang pagpakamalaut sang aton kaugalingon?

⁸ Apang, ano abi kon nakahimo ka sing mabug-at nga sala sang una? Walay duhaduha nga ginsambit mo na ini kay Jehova sa pangamuyo, ayhan sing masunson pa. Nakabaton ka na sing espirituwal nga bulig gikan sa Cristianong mga gulang. (Santiago 5:14, 15) Matuod gid ang imo paghinulsol amo nga bahin ka gihapon sang kongregasyon. Ukon ayhan sang una, nagbiya ka sa organisasyon sang Dios, apang naghinulsol ka sang ulihi kag napasag-uli sa matinlo nga tindog. Diin man sa sini ang imo kahimtangan, mahimo tublagon ka liwat sang ginhimo mo anay nga sala. Kon matabo ini, dumduma nga ginapatawad ni Jehova “sing bugana” ang matuod nga nagahinulsol. (Isaias 55:7) Dugang pa, indi niya luyag nga magbatyag ka nga daw ginpakamalaut kag wala na sing paglaum. Amo sina ang gusto ni Satanas nga batyagon mo. (2 Corinto 2:7, 10, 11) Pagalaglagon ang Yawa bangod takus sia sa sini, apang luyag niya nga magbatyag ka nga takus ka man sa kalaglagan kaangay niya. (Bugna 20:10) Indi pagtuguti nga magmadinalag-on si Satanas sa sining pahito nga gub-on ang imo pagtuo. (Efeso 6:11) Sa baylo, “magtindog [ka] batok sa iya” sa sining bahin, subong sang ginahimo mo sa iban pa nga butang.—1 Pedro 5:9.

⁹ Sa Bugna 12:10, ginatawag si Satanas subong “manugsumbong sang aton mga kauturan”— hinaplas nga mga Cristiano. ‘Ginasumbong niya sila sa atubang sang Dios sa adlaw kag gab-i.’ Ang pagpamalandong sa sining bersikulo makabulig sa  imo nga mahangpan nga malipay si Satanas, ang butig nga manugsumbong, kon basulon kag pakamalauton mo ang imo kaugalingon, bisan pa wala ini ginahimo ni Jehova. (1 Juan 3:19-22) Ngaa magpadayon ka sa pag-antos sa imo mga kasaypanan tubtob sa punto nga daw mangampo ka na? Indi pagtuguti nga gub-on ni Satanas ang imo kaangtanan sa Dios. Indi gid pagtuguti ang Yawa nga bulagon ka sa kamatuoran nga si Jehova “maluluy-on kag mainayuhon, mahinay sa pagpangakig kag bugana sa mahigugmaon nga kaayo.”—Exodo 34:6.

Ang Aton mga Limitasyon Mahimo Magpaluya sang Aton Buot

10. Sa anong mga paagi mahimo makapaluya sing buot ang aton mga limitasyon?

¹⁰ Ang pila ka Cristiano naluyahan sing buot bangod ang ila mga limitasyon nagaapektar sa ila pag-alagad sa Dios. Amo man bala sina ang nabatyagan mo? Mahimo indi ka na makahinguyang sing kapin nga tion sa ministeryo kaangay sang ginahimo mo sang una bangod sang malubha nga balatian, katigulangon, ukon iban pa nga mga rason. Matuod nga ginapalig-on ang mga Cristiano nga magbakal sing tion para sa pag-alagad sa Dios. (Efeso 5:15, 16) Apang ano abi kon indi ka na makahimo sing kapin sa ministeryo bangod sang mga limitasyon kag subong resulta, naluyahan ka sing buot?

11. Paano kita makabenepisyo sa laygay ni Pablo nga narekord sa Galacia 6:4?

¹¹ Ginalaygayan kita sang Biblia nga indi magmahinay kundi mangin “mga manug-ilog nila nga paagi sa pagtuo kag pagpailob nagapanubli sang mga saad.” (Hebreo 6:12) Mahimo lamang naton ini kon usisaon naton ang ila maayo nga halimbawa kag ilugon ang ila pagtuo. Apang, indi kita makabenepisyo kon ipaanggid naton ang aton kaugalingon sa iban kag magsiling nga kulang ang aton ginahimo. Busa, mas maayo nga iaplikar naton ang laygay ni Pablo: “Pamatud-an sang kada isa kon ano ang iya kaugalingon nga binuhatan, kag nian ang rason niya sa pagpabugal mangin sa iya kaugalingon lamang kag indi sa pagpaanggid sa iban.”—Galacia 6:4.

12. Ngaa mahimo kita magkalipay sa aton pag-alagad kay Jehova?

¹² Ang mga Cristiano may rason gid sa pagkalipay, bisan pa ginalimitehan sila sang malubha nga mga balatian. Ginapalig-on kita sang Biblia: “Ang Dios indi di-matarong nga malipat sang inyo binuhatan kag sang gugma nga ginpakita ninyo tungod sa iya ngalan.” (Hebreo 6:10) Mahimo nabudlayan ka sa paghimo sang mga butang nga ginahimo mo anay bangod sang mga sirkunstansia nga indi mo makontrol. Apang, sa bulig ni Jehova, mahimo ka makapakigbahin sing kapin pa sa pila ka aspekto sang Cristianong ministeryo, subong sang pagpanaksi paagi sa telepono kag sa sulat. Makasalig ka nga pakamaayuhon ka ni Jehova nga Dios bangod sang imo bug-os-kalag nga pag-alagad kag sang gugma nga imo ginapakita sa iya kag sa imo isigkatawo.—Mateo 22:36-40.

Ang “Makahalanguyos nga mga Tion” Makapaluya sing Buot

13, 14. (a) Sa anong mga paagi mahimo tunaan sang aton kapiutan ining “makahalanguyos nga mga tion”? (b) Sa anong paagi nga athagon gid karon ang kakulang sang kinaugali nga gugma?

¹³ Bisan pa ginakalangkagan naton ang kabuhi sa matarong nga bag-ong kalibutan sang Dios, nagakabuhi kita karon sa “makahalanguyos nga mga tion nga mabudlay pakigbagayan.” (2 Timoteo 3:1) Malugpayan kita sa pagkahibalo nga ang mapiot nga mga kahimtangan nagapakita nga nagahilapit na ang aton kaluwasan. Apang, apektado kita sang mga kahimtangan sa palibot naton. Halimbawa, ano abi kon wala ka sing trabaho? Ang trabaho mahimo nga maiwat, kag samtang nagalipas ang mga binulan, mahimo magduhaduha ka kon bala nakita ni Jehova ang imo kahimtangan ukon nabatian niya ang imo mga pangamuyo. Ukon ayhan nangin biktima ka sang pag-ihig-ihig ukon sang pila ka porma sang inhustisya. Bisan gani ang pagbasa lang sang mga ulong-dinalan sang pamantalaan mahimo magpabatyag sa imo sang nabatyagan anay sang matarong nga tawo nga si Lot, nga “natublag sing daku” (“naluyahan sing buot,” Young’s Literal Translation of the Holy Bible) bangod sang lugak nga paggawi sang mga tawo sa palibot niya.—2 Pedro 2:7.

¹⁴ May isa pa ka partikular nga aspekto sang katapusan nga mga adlaw nga athagon gid sa aton. Ang Biblia nagtagna nga sa ulihi madamo ang “wala [na] sing kinaugali nga gugma.” (2 Timoteo 3:3)  Ang gugma sa sulod sang pamilya halos wala na sa madamo nga mga panimalay. Sa pagkamatuod, “ginapakita sang mga ebidensia nga mas daku ang posibilidad nga ang mga tawo patyon, pintasan, sakiton sa emosyon, ukon abusuhan sa sekso sang ila kapamilya sangsa iban nga tawo,” siling sang libro nga Family Violence. “Ang duog diin ang mga tawo magabatyag kuntani nga ginahigugma kag luwas sa katalagman amo ang labing makatalagam nga duog para sa pila ka adulto kag kabataan.” Yadtong mga nadayag sa di-maayo nga mga kahimtangan sa puluy-an mahimo makaeksperiensia sa tion kag tion sing kabalaka kag pagkawalay paglaum. Ano abi kon amo sini ang imo kahimtangan?

15. Ngaa ang gugma ni Jehova labaw gid sa gugma nga ginapakita sang tawo?

¹⁵ Nag-amba ang salmista nga si David: “Kon magbiya sa akon ang akon amay kag akon iloy, nian si Jehova magasapopo sa akon.” (Salmo 27:10) Makalulugpay gid mahibaluan nga ang gugma ni Jehova labaw gid sa gugma nga ginapakita sang bisan sin-o nga ginikanan nga tawo! Bisan pa mahimo nga masakit nga sikwayon, maltratuhon, ukon biyaan sang isa ka ginikanan, wala ini sing epekto sa daku nga pag-ulikid ni Jehova sa imo. (Roma 8:38, 39) Dumduma nga ginabuyok sang Dios yadtong mga ginahigugma niya. (Juan 3:16; 6:44) Bisan ano pa ang pagtratar sa imo sang mga tawo, ginahigugma ka sang imo langitnon nga Amay!

Praktikal nga mga Tikang Agod Mapahaganhagan ang Kapung-aw

16, 17. Kon napung-awan, ano ang himuon sang isa ka tawo agod mahuptan ang iya espirituwal nga kusog?

¹⁶ Sarang ka makahimo sing praktikal nga mga tikang agod malandas ang kapung-aw. Halimbawa, maghimo ka sing makapalig-on nga programa sang Cristianong hilikuton. Pamalandungi ang Pulong sang Dios, ilabi na kon naluyahan gid ikaw sing buot. Ang salmista nag-amba: “Sang nagsiling ako: ‘Ang akon tiil pat-od nga makadalin-as,’ ang imo mahigugmaon nga kaayo, O Jehova, padayon nga nagpalig-on sa akon. Sang ang akon nagakabalaka nga mga panghunahuna nagdamo sa sulod nakon, ang imo mga paglipay naghapuhap sa akon kalag.” (Salmo 94:18, 19) Ang regular nga pagbasa sang Biblia makabulig agod mapuno ang imo hunahuna sang makalulugpay kag makapalig-on nga mga butang.

¹⁷ Importante man ang pangamuyo. Bisan pa indi mo mapabutyag sing maayo ang imo pinakasulod nga mga balatyagon, nahibaluan ni Jehova ang luyag mo ihambal. (Roma 8:26, 27) Ang salmista naghatag sining pasalig: “Ihaboy ang imo lulan kay Jehova, kag sia gid magaalay-ay sa imo. Indi gid sia magtugot nga malingkang ang matarong.”—Salmo 55:22.

18. Anong praktikal nga mga tikang ang sarang mahimo sang isa nga napung-awan?

¹⁸ Ang iban nagabatyag sing kalisod bangod sang clinical depression. b Kon amo sini ang imo  balatian, tinguhai nga ituon ang imo igtalupangod sa bag-ong kalibutan sang Dios kag sa tion nga “wala [na] sing pumuluyo nga magasiling: ‘Nagamasakit ako.’” (Isaias 33:24) Kon daw pirme ka na ginapung-awan, mas maayo nga magpatan-aw ka sa doktor. (Mateo 9:12) Importante man nga atipanon mo ang imo lawas. Basi makabulig ang makapapagros nga mga pagkaon kag pag-ehersisyo. Pat-ura nga makapahuway ka sing maayo. Indi magpulaw sa pagtan-aw sing telebisyon, kag likawi ang sahi sang kalingawan nga magaubos sang imo pisikal kag emosyonal nga kusog. Labaw sa tanan, magpadayon sa pagpakigbahin sa diosnon nga mga hilikuton! Bisan indi pa ini ang tion nga “pahiran [ni Jehova] ang tagsa ka luha,” buligan ka niya nga makabatas.—Bugna 21:4; 1 Corinto 10:13.

Pagkabuhi “sa Idalom sang Gamhanan nga Kamot sang Dios”

19. Ano ang ginapangako ni Jehova sa mga ginapiutan?

¹⁹ Ginapalig-on kita sang Biblia nga bisan pa madamo ang mga kapahamakan sang matarong, “gikan sa sini tanan ginaluwas sia ni Jehova.” (Salmo 34:19) Paano ini ginahimo sang Dios? Sang sulitsulit nga nangamuyo si Pablo nga luwason sia gikan sa iya “ungon sa unod,” ginsilingan sia ni Jehova: “Ang akon gahom ginahimpit sa kaluyahon.” (2 Corinto 12:7-9) Ano ang ginpangako ni Jehova kay Pablo, kag ano ang ginapangako niya sa imo? Ang Dios wala nangako sing insigida nga bulong, kundi sing kusog nga makabatas.

20. Walay sapayan sang mga pagtilaw sa aton, ano ang ginapasalig sa aton sang 1 Pedro 5:6, 7?

²⁰ Si apostol Pedro nagsulat: “Magpaubos kamo . . . sa idalom sang gamhanan nga kamot sang Dios, agod nga bayawon niya kamo sa nagakaigo nga tion; samtang ginatugyan ninyo sa iya ang tanan ninyo nga kabalaka, kay nagaulikid sia sa inyo.” (1 Pedro 5:6, 7) Bangod nagaulikid si Jehova sa imo, indi ka niya pagbiyaan. Sakdagon ka niya walay sapayan sang mga pagtilaw nga imo ginaatubang. Dumduma nga ang matutom nga mga Cristiano yara “sa idalom sang gamhanan nga kamot sang Dios.” Samtang nagaalagad kita kay Jehova, ginahatagan niya kita sing kusog agod makabatas. Kon matutom kita sa iya, wala sing makahimo sing permanente nga halit sa aton sa espirituwal. Busa, kabay nga huptan naton ang aton integridad kay Jehova agod maagom naton ang kabuhi nga walay katapusan sa iya ginsaad nga bag-ong kalibutan kag masaksihan ang adlaw nga luwason niya sing permanente ang mga napiutan!

[Mga nota]

Madumduman Mo Bala?

• Ngaa nagaeksperiensia sing mga kapiutan bisan ang mga alagad ni Jehova?

• Ano ang pila ka butang nga ginatunaan sang kapung-aw sang pila sa katawhan sang Dios?

• Paano kita ginabuligan ni Jehova nga masarangan ang aton mga kabalaka?

• Sa anong paagi yara kita “sa idalom sang gamhanan nga kamot sang Dios”?

[Mga Pamangkot sa Pagtinuon]

[Mga retrato sa pahina 25]

Walay sapayan sang mga pagtilaw, may rason sa pagkalipay ang katawhan ni Jehova

[Retrato sa pahina 28]

Ang pagpanaksi paagi sa telepono isa ka paagi nga mahatag mo kay Jehova ang imo pinakamaayo