Malipayon nga Paghatag Gikan sa Tagipusuon

TUHOY sa paghatag, si apostol Pablo nagsulat: “Maghimo ang kada isa suno sa ginpamat-od niya sa iya tagipusuon,” kag nagdugang sia: “Indi sing paganot ukon ginapilit, kay ginahigugma sang Dios ang nagahatag sing malipayon.” (2 Cor. 9:7) Si Jehova wala nagapilit sa mga tawo nga suportahan ang matuod nga pagsimba. Ginapahanugutan niya ang iya mga alagad nga ipakita ang ila debosyon paagi sa ila kinabubut-on kag malipayon nga paghatag. Halin pa sang una, nalangkag gid ang katawhan sang Dios sa paghimo sini. Binagbinaga ang tatlo ka halimbawa.

Sa tapos ginhilway ni Jehova ang mga Israelinhon gikan sa Egipto, ginsugo niya sila nga magtukod sang tabernakulo. Kinahanglanon ang mga materyales amo nga ginpangabay ang mga Israelinhon nga maghatag sing bulig. Bilang sabat, “ang tagsatagsa nga ang iya tagiposoon nagtandug sa iya” nagdala sang bulawan, pilak, alahas, kag iban pa nga mga materyales. Tuman gid kadamo ang gin-amot sang mga tawo amo nga ginpahibalo sila nga mag-untat na sa paghatag.—Ex. 35:5, 21; 36:6, 7.

 Mga pila ka siglo sang ulihi, sang ginplano nga patindugon ang templo, may kahigayunan naman liwat ang mga alagad sang Dios nga suportahan ang putli nga pagsimba. Si Hari David naghatag sing daku nga amot kag nag-agda sa iban pa nga maghatag man. Ngaa makasiling kita nga ginhimo nila ini sing malangkagon? Bangod ang bulawan kag pilak pa lamang nga mga amot nagbalor na sing kapin sa 100 bilyones dolyares kon ipaanggid naton sa aton kuarta sa karon! Ang katawhan malipayon gid sa paghatag sang ila kinabubut-on nga mga amot para kay Jehova.—1 Cron. 29:3-9; 2 Cron. 5:1.

Ang paghatag sing malipayon ginpakita man sang una nga mga sumulunod ni Jesucristo. Sang Pentecostes 33 C.E., mga 3,000 ang nabawtismuhan kag madamo sa ila ang indi taga-Jerusalem. Agod nga makapabilin sa siudad yadtong ginkulang sang ila mga kinahanglanon kag agod makatuon sing dugang pa tuhoy sa ila bag-o nga pagtuo, nag-alamot sila para makatipon sing pundo. Ginbaligya sang mga kauturan ang ila mga pagkabutang kag gindala ang kuarta sa mga apostoles agod suportahan yadtong mga nagakinahanglan sang bulig. Daw ano nga kalipay ang ginbatyag ni Jehova bangod sang ila ginpakita nga pagtuo kag gugma!—Binu. 2:41-47.

Sa karon, padayon man nga ginasuportahan sang mga Cristiano ang putli nga pagsimba paagi sa maalwan kag malipayon nga paghatag sang ila tion, kusog kag mga donasyon. Makita sa nalakip nga kahon ang iban pa nga paagi sa paghimo sini.

[Kahon sa pahina 18, 19]

MGA PAAGI SA PAG-AMOT

MGA KONTRIBUSYON PARA SA BUG-OS KALIBUTAN NGA HILIKUTON

Madamo ang nagapain, ukon nagatigana, sing kantidad nga ginahulog nila sa mga kahon-alamutan nga may ngalan “Worldwide Work.”

Kada bulan, ginapadala sang mga kongregasyon ini nga kantidad sa opisina sang mga Saksi ni Jehova sa ila pungsod. Ang boluntaryo nga donasyon nga kuarta mahimo man ipadala sing direkta sa Watch Tower Bible and Tract Society of the Philippines, Inc., P.O. Box 2044, 1060 Manila, ukon sa sanga talatapan sang mga Saksi ni Jehova nga nagapangalagad sa inyo pungsod. (Ang boluntaryo nga mga donasyon nga ginsambit sa ubos mahimo man ipadala sa sanga talatapan sang mga Saksi ni Jehova nga nagapangalagad sa inyo pungsod.) Ang mga tseke nga ipadala sa sini nga adres dapat ipangalan sa “Watch Tower.” Mahimo man idonar ang mga alahas ukon iban pa nga malahalon nga mga pagkabutang. Dapat ilakip sa sini nga mga kontribusyon ang isa ka malip-ot nga sulat nga nagapahibalo nga ini isa ka direkta nga regalo.

CONDITIONAL-DONATION TRUST ARRANGEMENT

Mahimo ka magpatago sang kuarta sa Watch Tower Society para gamiton sa bug-os kalibutan nga hilikuton. Apang, kon kinahanglan mo na ini, mahimo ini ibalik sa imo. Para sa dugang nga impormasyon, pakig-anguti palihug ang Treasurer’s Office sa adres nga ginsambit sa ibabaw.

CHARITABLE PLANNING

Magluwas sa direkta nga mga regalo nga kuarta, may iban pa nga paagi sang paghatag nga makabulig sa bug-os kalibutan nga pag-alagad sa Ginharian. Lakip sa sini amo ang:

Insurance: Mahimo himuon ang Watch Tower Society nga benepisyaryo sang isa ka life insurance policy ukon sang isa ka retirement/pension plan.

Mga Deposito sa Bangko: Ang mga deposito sa bangko, sertipiko sang deposito, ukon indibiduwal nga deposito sa pagretiro mahimo ibutang sa ngalan ukon ihatag sa Watch Tower Society kon mapatay na ang nagdeposito sini, suno sa mga ginapatuman sang bangko sa inyo lugar.

Stocks kag Bonds: Mahimo idonar sa Watch Tower Society ang stocks kag bonds subong direkta nga regalo ukon himuon nga benepisyaryo ang Watch Tower Society kon mapatay ang tag-iya.

Real Estate: Ang mabaligya nga real estate (balay, bilding, ukon lote) mahimo ihatag nga donasyon paagi sa direkta nga pagregalo ukon paghatag sini kon mapatay na ang tag-iya. Halimbawa kon balay ang idonar mahimo nga padayon nga maistaran ini tubtob buhi pa ang tag-iya. Pakig-anguti anay ang sanga talatapan sa inyo pungsod antes isaylo ang titulo sang bisan ano nga real estate.

Gift Annuity: Ang gift annuity isa ka kasugtanan diin mahimo isaylo sang isa ang kuarta ukon securities sa isa ka gintangduan nga korporasyon nga ginagamit sang mga Saksi ni Jehova. Bilang kabaylo, ang nagdonar, ukon ang isa nga gintangduan sang nagdonar, makabaton sing espesipiko nga kantidad kada tuig tubtob buhi sia. Ang nagdonar makabaton sang income-tax deduction sa tuig nga magsugod ang gift annuity.

Mga Testamento kag mga Trust Agreement: Mahimo ipapanubli sa Watch Tower Society ang pagkabutang ukon kuarta paagi sa isa ka legal nga testamento, ukon himuon ang Watch Tower Society subong benepisyaryo sang isa ka trust agreement. Kon ang benepisyaryo isa ka relihioso nga organisasyon, mas manubo ang buhis nga bayaran.

Subong ginapahangop sang termino nga “charitable planning,” ining sahi sang mga donasyon nagakinahanglan sang pila ka pagplano sa bahin sang nagdonar. Para sa mga indibiduwal nga luyag maghatag sing pinansial nga bulig para sa bug-os kalibutan nga hilikuton sang mga Saksi ni Jehova paagi sa pila ka porma sang ginplano nga pagdonar, ginhanda ang isa ka brosyur sa Ingles kag Espanyol nga natig-uluhan Charitable Planning to Benefit Kingdom Service Worldwide. Ini nga brosyur ginbalhag agod maghatag sing impormasyon tuhoy sa nanuhaytuhay nga paagi sang pagdonar sa karon ukon sa tion nga mapatay ang nagdonar. Pagkatapos mabasa ang brosyur kag makonsulta ang ila mga abogado ukon manugkwenta sang buhis, madamo ang nagsuporta sa aton relihioso kag iban pa nga mga hilikuton sa bug-os nga kalibutan, kag nabuligan man sila nga mabuhinan ang ila ginabayaran nga buhis. Mahimo ka makatigayon sini nga brosyur paagi sa pagpangabay sa Charitable Planning Office.

Para sa dugang nga impormasyon, mahimo kamo magpakig-angot sa Charitable Planning Office, paagi sa sulat ukon sa telepono, sa adres nga nalista sa ubos, ukon makig-angot sa sanga talatapan sang mga Saksi ni Jehova sa inyo pungsod.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue

San Francisco del Monte

1105 Quezon City

Telepono: (02) 411-6090