Si María Isabel isa ka mapisan nga bata nga manugbantala sa siudad sang San Bernardo sa Chile sa Bagatnan nga Amerika. Ang ila pamilya tumandok sang Mapuche. Ang bilog nga pamilya malipayon nga nagasuporta sa bag-o naporma nga kongregasyon sa lenguahe nga Mapuche, nga ginatawag man Mapudungun.

Sang ginpahibalo nga ang Memoryal sang kamatayon sang Cristo hiwaton man sa Mapudungun kag 2,000 ka imbitasyon sa sina nga lenguahe ang ipanagtag, namensar si María Isabel kon paano sia makabulig. Nadumduman niya ang eksperiensia sang iban nga Saksi nga pamatan-on nga nagmadinalag-on sa pagbantala sa ila mga klasmeyt kag mga manunudlo. Gin-istorya niya ini sa iya mga ginikanan, kag nagdesisyon sila nga si María Isabel ang maghimo sing plano para mapanagtag ang mga imbitasyon sa eskwelahan. Ano ang iya ginplano?

Una, si María Isabel nangayo sing permiso sa mga nagadumala sang eskwelahan nga ipatapik ang isa ka imbitasyon sa mayor nga alagyan pasulod sa eskwelahan. Nagpasugot sila kag gindayaw ang iya plano. Isa ka aga, sa tion sang roll call, ginpahibalo pa sang prinsipal paagi sa loudspeaker ang parte sa imbitasyon!

Dayon nangabay si María Isabel nga kadtuan ang tanan nga kuarto. Sang ginpasugtan sia sang mga manunudlo, namangkot sia sa kada klase kon sin-o sa ila ang Mapuche. “Abi ko kon mga 10 ukon 15 lang ang estudyante nga Mapuche sa bilog nga eskwelahan,” siling niya, “pero madamo gali—150 ka imbitasyon ang akon napanagtag!”

Ang isa ka babayi nga nakakita sang imbitasyon nga yara sa prante sang eskwelahan namangkot kon sin-o ang iya istoryahon parte sa sini. Nakibot gid sia sang gindala sia sa isa ka dies anyos nga bata nga babayi! “Nagapaabot sia nga mas may edad ang iya maistorya,” siling ni María Isabel nga nagayuhum. Sang ginhatagan sia sing imbitasyon kag ginpaathagan sing makadali, ginpangayo ni María Isabel ang iya adres agod mabisita nila sia sang iya mga ginikanan para masugiran pa parte sa Ginharian sang Dios. Nalipay gid ang 20 ka manugbantala sang Mapudungun nga lenguahe nga makita ang babayi upod sa 26 ka Mapuche nga interesado nga nagtambong sa Memoryal. Ina nga grupo isa na karon ka mainuswagon nga kongregasyon!

Ano man ang imo edad, maimbitar mo man bala ang imo pareho nga estudyante ukon katrabaho sa pagtambong sa Memoryal, pamulongpulong publiko, ukon distrito nga kombension? Maka-research ka sa aton publikasyon parte sa mga eksperiensia nga mahimo makabulig sa imo kon paano ini magmadinalag-on. Pangayua man ang balaan nga espiritu ni Jehova para mabuligan ka nga makatigayon sing kaisog sa paghambal parte sa iya. (Luc. 11:13) Kon himuon mo ini, mahimo ka man masorpresa kag mapalig-on sa resulta sang imo naplano sing maayo nga panikasog.