Nagdayaw gid ang tumalan-aw sa isa ka matahom nga video nga wala sing tunog nga natig-uluhan, A Trip Down Market Street. Ginpakita diri ang mga nagakatabo kada adlaw sa San Francisco, U.S.A., sa panugod sang ika-20 nga siglo. Ginbutang sang mga nag-video ang ila de-mano nga kamera sa atubang sang ila cable car kag gintuon ini sa dalan. Makita sa video ang mga kalesa kag dinumaan nga mga salakyan, subong man ang mga nagapamalaklon kag mga nagabaligya sing pamantalaan.

Makapasubo gid ini nga video bangod ginkuha ini sang Abril 1906, antes natabo ang linog kag sunog sang Abril 18, nga nagpatay sa linibo ka tawo kag halos nagguba sini nga bahin sang siudad. Ayhan ilisipon na lang ang adlaw sang pila ka malipayon nga tawo sa sini nga video. “Nakita ko ang mga tawo diri,” siling ni Scott Miles, nga apo sang isa sa mga nag-video, “kag wala sila makahibalo kon ano ang matabo sa ila. Kag makaluluoy gid sila.”

Pareho man sini ka serioso ang aton panahon. Naluoy man kita sa aton mga isigkatawo. Adlaw-adlaw nila nga ginahimo ang ila mga hilikuton kag wala gid sila sing ihibalo sa kalamidad nga madali na lang matabo—ang kalaglagan sining sistema sang mga butang kag sang ila pagkabuhi. Apang indi pareho sa indi mapaktan nga linog, may malip-ot pa nga tion para paandaman ang aton mga isigkatawo parte sa adlaw sang paghukom ni Jehova. Mahimo may iskedyul ka kada semana sa pamalaybalay nga ministeryo, pero may mahimo ka pa bala para paandaman ang iban?

Talalupangdon gid ang halimbawa ni Jesus kay handa gid sia pirme magbantala. Ginabantalaan niya ang tanan niya nga maistorya, manugsukot man ini sang buhis nga iya nalabayan sa dalan ukon isa ka babayi nga nasugilanon niya sa bubon sang udtong adlaw. (Luc. 19:1-5; Juan 4:5-10, 21-24) Handa pa gani niya isakripisyo ang iya pagpahuway para matudluan ang iban. Ang kaluoy sa iya isigkatawo amo ang nagpahulag sa iya para himuon ini. (Mar. 6:30-34) Paano ginailog karon ang pagbatyag ni Jesus sing pagkahilingagawon?

Si Melika nagaistar sa isa ka guardiado nga apartment. Madamo sia sing kaingod nga estudyante nga taga-iban nga pungsod, nga nagagamit sing cell  phone kag wala sila sing rekord sa direktoryo sang lobby. Kon yara sia sa lobby ukon elebeytor, ginakalitan niya ang kahigayunan nga makapanaksi sa ila. Sia nagsiling, “Ginakabig ko ini nga akon teritoryo.” Nagadala si Melika sing literatura sa lainlain nga lenguahe, kag madamo ang nagabaton sing tract kag magasin. Ginapahibalo man niya sa ila ang aton Web site nga jw.org. Nakasugod sia sing pila ka pagtuon sa Biblia.

Si Sonia handa man pirme magpanaksi. Nagaobra sia sa isa ka klinika, kag naghimo sing tulumuron nga panaksihan sing maayo ang tanan niya nga katrabaho. Una, gintinguhaan niya nga mahibaluan ang mga kinahanglanon kag interes sang tagsa sa ila. Dayon ginakalitan niya ang pahuway sa udto para mapanaksihan sila sing isaisa. Bangod sini, nakasugod si Sonia sing duha ka pagtuon sa Biblia. Nagaplano man sia nga istoryahon ang mga mapa-check-up nga nagahulat sa lobby sang klinika.

Ang isa nga nakaluwas sa linog sang 1906 nagtawag sini nga “pinakamakahalalit nga kalamidad nga natabo sa isa ka estado ukon siudad.” Apang sa indi madugay, ang tanan nga kalamidad indi makatupong sa matabo sa adlaw sang pagtimalos batok sa tanan nga “wala nagakilala sa Dios.” (2 Tes. 1:8) Gusto gid ni Jehova nga magbag-o ang hunahuna kag tagipusuon sang mga tawo kag batunon ang paandam nga ginahatag sang iya mga Saksi.—2 Ped. 3:9; Bug. 14:6, 7.

Pribilehiyo mo nga buksan ang mga mata sang mga tawo sa sining mabudlay nga mga tion kag buligan sila nga biyaan ang ila maiyaiyahon nga panimuot agod pangitaon si Jehova. (Sof. 2:2, 3) Kalitan mo bala ang tagsa ka kahigayunan nga panaksihan ang imo katrabaho, kaingod, kag ang imo masugilanon kada adlaw? Himuon mo bala ang tanan para paandaman ang iban?