NAGKILALAHAY ang akon mga ginikanan sang 1919 sa kombension sang Internasyonal nga mga Estudyante sang Biblia sa Cedar Point, Ohio, U.S.A. Sang ulihi, sa sina man nga tuig nagpakasal sila. Natawo ako sang 1922, kag ang akon utod nga si Paul natawo pagligad sang duha ka tuig. Ang akon asawa nga si Grace natawo sang 1930. Ang iya mga ginikanan nga sanday Roy kag Ruth Howell, nagdaku subong mga Estudyante sang Biblia. Ang iya lolo kag lola mga Estudyante man sang Biblia kag mga abyan ni Brother Charles Taze Russell.

Nagkilalahay kami ni Grace sang 1947, kag nagpakasal kami sang Hulyo 16, 1949. Antes kami nagpakasal, nag-istoryahanay kami sing tampad parte sa amon palaabuton. Nagdesisyon kami nga magpakigbahin sa bug-os tion nga ministeryo kag indi magbata. Sang Oktubre 1, 1950, nagpayunir kami nga duha. Dayon sang 1952, gintangdo kami subong manugtatap sang sirkito.

Nagbatyag kami ni Grace nga kinahanglan namon ang daku nga bulig para matuman namon ining bag-o nga asaynment. Samtang nagatuon ako sa eksperiensiado nga mga utod, nangita man ako sing paagi para mabuligan si Grace. Ginpalapitan ko ang madugay na nga abyan sang amon pamilya nga si Marvin Holien, nga eksperiensiado sa pag-alagad subong nagalakbay nga manugtatap, kag nagsiling sa iya: “Bata pa si Grace kag kulang sang eksperiensia. May marekomendar ka bala nga makahanas sa iya sing makadali?” “Huo,” sabat niya. “Si Edna Winkle eksperiensiado nga payunir kag makabulig gid sa iya.” Sang ulihi, nagsiling si Grace parte kay Edna: “Ginbuligan niya ako nga indi makulbaan sa pagbantala, masabat niya sing maayo ang mga pagpamatok, kag gintudluan niya ako kon paano pamatian sing maayo ang tagbalay para mahibaluan ko kon ano ang isabat. Sia gid ang akon kinahanglan!”

Duha ka sirkito ang amon gin-alagaran ni Grace sa estado sang Iowa, lakip ang pila ka bahin sa estado sang Minnesota kag South Dakota. Dayon ginsaylo kami sa New York Circuit 1, nga nagalakip sa  mga lugar sang Brooklyn kag Queens. Indi gid namon malipatan ang pagbatyag nga indi kami eksperiensiado sa sini nga asaynment. Ini nga sirkito nagalakip sang Brooklyn Heights Congregation, nga nagatipon sa Kingdom Hall sa Bethel kag may mga eksperiensiado nga miembro sang pamilya Bethel. Sa tapos sang akon una nga pamulongpulong sa sina nga kongregasyon, ginpalapitan ako ni Brother Nathan Knorr kag ginsilingan: “Malcolm, ginlaygayan mo kami sang pila nga kinahanglan namon himuon, kag nagakaigo gid ina. Indi pagkalimti nga kon indi mo kami pagbuligan paagi sa mainayuhon nga laygay, diutay lamang ang imo mabulig sa organisasyon. Padayuna ang imo maayo nga ginahimo.” Sa tapos sang miting, ginsugid ko ini kay Grace. Nagsaka kami sa amon kuarto sa Bethel. Bangod sa sobra nga kakulba, naghibi kami.

Pagligad sang pila ka bulan, nakabaton kami sing imbitasyon nga mag-eskwela sa ika-24 nga klase sang Gilead, nga matapos sa Pebrero 1955. Ginpahibalo kami antes magsugod ang klase nga ang paghanas sa amon indi gid man para ihanda kami sa pagmisyonero, kundi para mangin mas epektibo kami sa nagalakbay nga hilikuton. Ini nga eskwelahan dalayawon gid pero nagatudlo ini sa amon nga mangin mapainubuson.

Sa tapos sang klase, gin-asayn kami subong manugtatap sang distrito. Ang amon distrito nagalakip sang estado sang Indiana, Michigan, kag Ohio. Dayon, sang Disiembre 1955, nakibot kami sang nakabaton kami sing sulat halin kay Brother Knorr nga nagasiling: “Ihambal kon ano gid ang gusto mo, kag prangkaha ako karon. Kon gusto mo magkadto sa Bethel kag magpabilin diri . . . ukon kon gusto mo mag-alagad sa iban nga pungsod pagkatapos mo magtener sa Bethel sing makadali, pahibalua ako. Kon luyag mo mag-alagad sa distrito ukon sirkito, gusto ko man mahibaluan.” Nagsabat kami nga nalipay kami bisan diin kami iasayn. Gilayon nga ginpareport kami sa Bethel!

Ang akon makalilipay nga mga tinuig sa Bethel nagalakip sang paghatag sing pamulongpulong sa mga kongregasyon, kombension, kag asembleya sa bilog nga Estados Unidos. Nagbulig ako sa paghanas sa madamo nga pamatan-on nga sang ulihi nakabaton sing mabug-at nga mga responsibilidad sa organisasyon ni Jehova. Wala madugay, nangin sekretaryo ako ni Brother Knorr sa talatapan nga nagaorganisar sang pagbantala sa bilog nga kalibutan.

Nalipay gid ako sa mga tinuig nga nag-alagad ako sa Service Department. Nakaupod ko diri si T. J. (Bud) Sullivan. Sia anay ang overseer sa sini nga departamento sa madugay nga tion. Pero nakatuon man ako sa iban. Isa sa ila amo si Fred Rusk, nga  gin-asayn sa paghanas sa akon. Nadumduman ko pa nga namangkot ako sa iya, “Fred, ngaa kadamo sang ginbag-o mo sa akon mga sulat?” Nagkadlaw sia, pero serioso nga nagsiling: “Malcolm, kon nagahambal ka, mahimo mo ini mapaathag sing dugang, pero kon sa sulat, ilabi na kon halin diri, dapat ini tinguhaan nga mangin maathag kag sibu gid.” Dayon mainayuhon sia nga nagsiling, “Indi ka lang maluyahan—maayo ang imo ginahimo, kag sa ulihi mangin mas maayo ka pa gid.”

Sa sulod sang mga tinuig sa Bethel, lainlain ang asaynment ni Grace, lakip na ang housekeeping, nga nagaatipan sa mga kuarto. Nalipay gid sia sa iya trabaho. Asta karon, kon maistorya namon ang pila ka pamatan-on sa Bethel sadto nga mga tinuig, nagayuhum sila nga nagasiling kay Grace, “Gintudluan mo gid ako kon paano himuson ang kama, kag nalipay gid si Nanay sa sini.” Nalipay man si Grace sa pagtrabaho sa departamento sang magasin, pagpadala sing mga sulat, kag pagkopya sang rekording. Ang pagtrabaho sa sini nga mga asaynment nagbulig sa iya nga maapresyar nga kon ano man ang amon ginahimo ukon diin man kami, ang pag-alagad sa organisasyon ni Jehova isa ka pribilehiyo kag pagpakamaayo. Amo gihapon sini ang pagtamod ni Grace.

Sang tungatunga sang katuigan 1970, narealisar namon nga kinahanglan namon atipanon ang amon nagatigulang nga mga ginikanan. Sang ulihi, dapat kami maghimo sing mabug-at nga desisyon. Indi namon gusto biyaan ang Bethel kag ang amon pinalangga gid nga mga kauturan. Pero nagbatyag ako nga responsibilidad ko nga atipanon ang amon mga ginikanan. Gani wala madugay, naggua kami sa Bethel, pero nagalaum kami nga kon magbag-o ang amon kahimtangan, mahimo kami magbalik.

Para masuportahan ang amon kaugalingon, nagbaligya ako sing insurance. Nadumduman ko pa nga ginsilingan ako sang isa ka manedyer sang ginahanas pa lang ako: “Ini nga negosyo nagtin-ad bangod sa pagkadto sa mga tawo kon gab-i. Amo ina ang tion nga maabtan mo sila. Gani importante gid nga kadtuan mo sila kada gab-i.” Nagsabat ako, “Nakahibalo ako nga nahambal mo ina base sa imo eksperiensia, kag ginatahod ko ina. Pero may mga responsibilidad ako sa espirituwal nga indi ko gid dapat pagpabay-an, kag wala ako sing plano nga pabay-an ini. Mahimo ako makakadto sing pila ka gab-i, pero kon Martes kag Huebes, kinahanglan ko magtambong sa importante gid nga mga miting.” Ginpakamaayo gid ako ni Jehova kay wala ako nagpalya sa mga miting bangod sang sekular nga trabaho.

Yara kami sa tupad ni Nanay sang napatay sia sa nursing home sang Hulyo 1987. Ang head sang mga nars nagpalapit kay Grace kag nagsiling: “Mrs. Allen, pauli ka anay kag magpahuway. Nahibaluan sang tanan nga ari ka pirme para sa imo ugangan. Indi ka na magkabalaka, ginhimo mo ang tanan.”

 Sang Disiembre 1987, nag-aplay kami liwat sa Bethel, ang duog nga nanamian gid namon. Pero pagligad sang pila lang ka adlaw, nahibaluan nga may kanser sa colon si Grace. Sa tapos sia naoperahan kag naulian, gindeklarar nga wala na sia sing kanser. Pero sang ulihi, nakabaton kami sing sulat halin sa Bethel nga nagarekomendar nga magpadayon kami sa ministeryo sa lokal nga kongregasyon. Determinado kami nga magpadayon sa amon pag-alagad.

Sang ulihi, gintanyagan ako nga magtrabaho sa Texas. Nagdesisyon kami nga mas maayo para sa amon ang medyo mainit-init nga klima, kag nangin maayo gid man. Diri sa Texas, halos 25 ka tuig na namon nga kaupod ang matinatapon nga mga kauturan nga nangin suod gid sa amon.

Nagpakigbato si Grace sa kanser sa colon kag thyroid, kag sang ulihi sa kanser sa suso. Pero wala gid sia nagreklamo sa iya sitwasyon ukon sa prinsipio sang pagkaulo kag pagpasakop. Masami sia ginapamangkot, “Ano ang inyo sekreto nga madinalag-on kag malipayon ang inyo pag-asawahay?” Apat ka rason ang iya ginahatag: “Best friend gid kami. Nagaistoryahanay gid kami kada adlaw. Nalipay gid kami nga mag-updanay. Kag wala kami nagatulog nga akig.” Siempre, may tion nga indi kami mag-intiendihanay, pero nagapatawaray kami kag wala na namon ina ginaungkat—kag nakabulig gid ini sa amon.

May pila ka maayo nga leksion nga amon natun-an sa tanan nga pagtilaw nga amon naeksperiensiahan:

1. Magsalig pirme kay Jehova kag batunon kon ano ang iya ginatugot. Indi gid magsandig sa imo kaugalingon nga paghangop.—Hulu. 3:5, 6; Jer. 17:7.

2. Magsalig sa Pulong ni Jehova para sa panuytoy, ano man ang problema. Importante ang pagtuman kay Jehova kag sa iya mga kasuguan. Dapat ka magdesisyon kon bala mangin matinumanon ka ukon indi. Indi puede nga yara ka sa tunga.—Roma 6:16; Heb. 4:12.

3. Isa lang ka butang sa kabuhi ang pinakaimportante—ang pagtigayon sing maayo nga ngalan kay Jehova. Unahon ang pag-alagad sa iya, indi ang materyal nga mga manggad.—Hulu. 28:20; Man. 7:1; Mat. 6:33, 34.

4. Mangamuyo para mangin mabungahon kag aktibo sa pag-alagad kay Jehova suno sa imo masarangan. Magkonsentrar sa mga butang nga imo mahimo, sa baylo sang mga butang nga indi mo mahimo.—Mat. 22:37; 2 Tim. 4:2.

5. Batuna nga wala na sing iban pa nga organisasyon ang ginapakamaayo kag ginakahamut-an ni Jehova.—Juan 6:68.

Kada isa sa amon ni Grace nag-alagad kay Jehova sing sobra sa 75 ka tuig, kag halos 65 ka tuig sini subong mag-asawa. Malipayon gid kami sa amon pag-alagad kay Jehova sing magkaupod sa sulod sang mga dekada. Ginapangamuyo namon nga maeksperiensiahan man sang tanan naton nga kauturan ang makapaladya gid nga kabuhi kon magsalig sila kay Jehova.