“PAULI ka sa imo mga paryente, kag isugid sa ila ang tanan nga butang nga ginhimo ni Jehova sa imo kag ang kaluoy niya sa imo,” siling ni Jesucristo. Sadto nga tion mahimo nga ara sia sa Gadara, sa bagatnan-sidlangan sang Dagat sang Galilea, nga nagapakighambal sa lalaki nga luyag mangin sumulunod niya. Ang ginsiling ni Jesus nagapakita nga nahangpan niya ang kinaiya sang tawo—nga gusto gid sini isugid sa mga paryente ang mga butang nga interesante kag importante.—Mar. 5:19.

Ini nga kinaiya masami man naton makita karon, ilabi na gid sa pila ka kultura. Gani kon ang isa nangin sumilimba sang matuod nga Dios, si Jehova, masami nga luyag niya isugid ang iya bag-o nga pagpati sa iya mga paryente. Pero paano niya ini dapat himuon? Paano niya malab-ot ang tagipusuon sang iya mga paryente nga lain ang relihion—ukon wala gid sing pagtuluuhan? Ang Biblia may positibo kag realistiko nga laygay parte sa sini.

Sang unang siglo, isa si Andres sa una nga nakakilala kay Jesus subong Mesias. Sin-o dayon ang iya ginsugiran sini? “Una niya [Andres] nga nakita ang iya utod, nga si Simon, kag nagsiling sia sa iya: ‘Nakita namon ang Mesias’ (nga kon badbaron nagakahulugan, ‘Cristo’).” Gindala ni Andres si Pedro kay Jesus, amo nga nakatigayon ini sing kahigayunan nga mangin isa sa mga disipulo ni Jesus.—Juan 1:35-42.

Mga anom ka tuig sang ulihi, sang nagtener si Pedro sa Joppe, gin-agda sia nga maglakbay pa aminhan pakadto sa Cesarea para magbisita sa balay ni Cornelio, nga opisyal sang hangaway. Sin-o ang naabtan ni Pedro nga nagatipon sa balay? “Ginapaabot gid sila [si Pedro kag ang mga kaupod niya nga naglakbay] ni Cornelio kag gintipon niya ang iya mga paryente kag suod nga mga abyan.” Gani, ginhatagan ni Cornelio  sing kahigayunan ang iya mga paryente nga makapamati kay Pedro kag maghimo sing desisyon base sa ila nabatian.—Binu. 10:22-33.

Ano ang matun-an naton sa ginhimo nanday Andres kag Cornelio?

Wala nagpabaya sanday Andres kag Cornelio. Personal nga ginpakilala ni Andres si Pedro kay Jesus, kag naghimo sing kahimusan si Cornelio para makapamati ang iya mga paryente kay Pedro. Pero wala ginpilit nanday Andres kag Cornelio ang ila mga paryente ukon gintinguhaan nga tiplangon sila para mangin mga sumulunod ni Cristo. Ano ang aton matun-an sa sini? Maayo gid ang resulta kon ilugon naton sila. Mahimo naton isugid ang pila ka punto sa Biblia sa aton mga paryente kag maghimo sing mga paagi para mahibaluan nila ang kamatuoran kag makilala ang aton mga masigkatumuluo. Pero respetuhon naton sa gihapon ang ila kahilwayan sa pagpili kag likawan nga piliton sila. Paano naton mabuligan ang aton mga paryente? Binagbinaga ang halimbawa sang mag-asawa sa Germany nga sanday Jürgen kag Petra.

Si Petra nagtuon sa Biblia sa mga Saksi ni Jehova kag nabawtismuhan sang ulihi. Ang iya bana nga si Jürgen opisyal sang militar. Sang primero, wala nalipay si Jürgen sa desisyon sang iya asawa. Pero sang ulihi, narealisar niya nga ang ginabantala sang mga Saksi amo ang kamatuoran sa Biblia. Gindedikar man niya ang iya kabuhi kay Jehova, kag gulang na sia subong sa ila kongregasyon. Ano ang iya malaygay parte sa paglab-ot sa tagipusuon sang paryente nga tuhay sing pagtuluuhan?

Si Jürgen nagsiling: “Indi naton dapat pagpiliton kag pagpatam-an ang aton mga paryente sang espirituwal nga mga butang. Bangod labi na gid sila nga indi magbaton. Mas maayo nga mataktikanhon naton nga isugid sa ila sing amat-amat ang pila lang ka impormasyon. Makabulig man kon makilala sang aton mga paryente ang mga kauturan nga kaedad nila kag pareho nila sing interes. Paagi sa sini, mabuligan naton sila.”

Gilayon nga ginbaton ni apostol Pedro kag sang mga paryente ni Cornelio ang mensahe sang Biblia. Ang iban sang unang siglo nga nakahibalo sang kamatuoran nagakinahanglan pa sing dugang nga tion sa pagdesisyon.

Ang pila ka paryente ni Jesus nagtuo sa iya sa tion sang iya ministeryo. Halimbawa, mahimo nga sanday apostol Santiago kag Juan mga pakaisa ni Jesus kag ang ila iloy nga si Salome tiya niya. Mahimo nga isa si Salome sa “madamo iban pa nga mga babayi, nga nag-alagad sa ila [kay Jesus kag sa mga apostoles] paagi sa paggamit sa mga pagkabutang nila.”—Luc. 8:1-3.

Pero, ang iban sa pamilya ni Jesus wala nagtuo gilayon. Halimbawa, isa ka bes, sang mga sobra isa ka tuig pagkatapos nabawtismuhan si Jesus, madamo ang nagtilipon sa isa ka balay para mamati sa iya. “Apang sang nabatian sang iya mga paryente ang tuhoy sini, nagkadto sila sa pagdakop sa iya, kay nagsiling sila: ‘Nagbuang sia.’” Sang ulihi, sang ginpamangkot si Jesus sang iya mga utod sa iloy parte sa iya mga plano sa paglakbay, wala niya sila ginsabat sing direkta. Ngaa? Bangod “sa katunayan, ang iya mga utod wala nagatuo sa iya.”—Mar. 3:21; Juan 7:5.

Ano ang aton matun-an sa ginhimo ni Jesus? Wala sia naakig sang nagsiling ang iya mga paryente nga nagbuang na sia. Bisan sa tapos sang iya kamatayon kag pagkabanhaw, ginpalig-on pa gid ni Jesus ang iya mga paryente paagi sa pagpakita sa iya utod sa iloy nga si Santiago. Mahimo nga nakabulig ini para makumbinsi indi lamang si Santiago kundi ang iban pa nga utod sa iloy ni Jesus nga Sia gid ang Mesias. Bangod  sini, nakaupod sila sang mga apostoles kag sang iban pa sa naibabaw nga hulot sa Jerusalem kag maathag nga nakabaton sila sang balaan nga espiritu. Sang ulihi, sanday Santiago kag Judas, nga utod man sa iloy ni Jesus, nakabaton sang dalayawon nga mga pribilehiyo.—Binu. 1:12-14; 2:1-4; 1 Cor. 15:7.

Pareho sang unang siglo, ang pila naton ka paryente nagakinahanglan sing daku nga tion antes sila makalakat sa dalanon sang kabuhi. Halimbawa, binagbinaga si Roswitha, nga isa anay ka debotada nga Romano Katoliko sang nabawtismuhan ang iya bana subong Saksi ni Jehova sang 1978. Bangod relihiosa gid si Roswitha, ginpamatukan niya sang primero ang iya bana. Pero pagligad sang mga tinuig, naghaganhagan ang iya pagpamatok kag narealisar niya nga kamatuoran ang ginatudlo sang mga Saksi. Sang 2003, nagpabawtismo sia. Ngaa nagbag-o sia? Sa baylo nga maakig ang iya bana sa iya pagpamatok, ginhatagan niya sing mga kahigayunan si Roswitha nga bag-uhon ang iya panimuot. Ano ang masiling ni Roswitha? “May daku gid nga kaayuhan ang pagpakita sing pasensia, pasensia, kag dugang pa nga pasensia.”

Si Monika nabawtismuhan sang 1974, kag mga napulo ka tuig sang ulihi nangin Saksi man ang iya duha ka bata nga lalaki. Ang iya bana nga si Hans wala man nagapamatok sa ila, pero sang 2006 lang sia nabawtismuhan. Ano ang masiling sini nga pamilya base sa ila narealisar sang ulihi? “Magpabilin nga mainunungon kay Jehova, kag indi magkompromiso kon tilawan ang imo pagtuo.” Siempre, importante nga pirme nila pasaligon si Hans nga palangga nila sia gihapon. Kag wala gid sila nadulaan sing paglaum nga batunon niya sa ulihi ang ila pagtuo.

Ginlaragway anay ni Jesus ang mensahe sang kamatuoran subong tubig nga nagahatag sang kabuhi nga wala sing katapusan. (Juan 4:13, 14) Luyag naton paumpawan ang aton mga paryente paagi sa pagpainom sa ila sang mabugnaw kag matin-aw nga tubig sang kamatuoran. Siempre, indi naton luyag nga masalim-ukan sila bangod sa gulpi nga pagpainom sa ila sang tuman ka damo nga tubig. Depende sa aton pagpaathag sa ila kon bala mapaumpawan sila ukon masalim-ukan. Ang Biblia nagsiling nga “ang matarong nga tawo nagahunahuna anay antes siya maghambal” kag “ang maalamon nga tawo nagabantay gid sang iya ginahambal, gani makatuon ang iban sa iya.” Paano naton maaplikar ini nga laygay?—Hulu. 15:28; 16:23, Ang Pulong sang Dios, APD.

Mahimo nga gusto ipaathag sang asawa sa iya bana ang iya ginapatihan. Kon ‘nagahunahuna anay sia antes maghambal,’ pilion niya sing maayo ang iya isiling kag indi magpadasudaso sa paghambal. Indi niya dapat ipagua nga daw matarong sia ukon superyor. Ini nga paagi sang panghambal makapaumpaw kag makahatag sing kalinong. San-o ayhan relaks ang iya bana kag mahapos istoryahon? Ano ang gusto sini istoryahan ukon basahon? Interesado bala sia sa siensia, pulitika, ukon sports? Paano niya mapukaw ang interes sang iya bana sa Biblia nga ginatahod gihapon ang balatyagon kag mga opinyon sini? Kon binagbinagon ini sang asawa, mabuligan sia nga makahambal kag makapanghikot nga may paghangop.

Para malab-ot ang tagipusuon sang mga miembro sang pamilya nga indi pa mga Saksi, indi lang nga ipaathag naton sa ila ang pila ka impormasyon sang aton ginapatihan. Ang aton ginahambal dapat updan sang maayo nga paggawi.

“Padayuna ang pag-aplikar sang mga prinsipio sang Biblia kada adlaw. Epektibo gid ini nga pamaagi para makahunahuna kag makabinagbinag ang imo paryente, bisan pa nga daw indi pa gid sia kumbinsido,” paathag ni Jürgen, nga ginsambit kaina. Nagaugyon sa sini si Hans, nga nabawtismuhan mga 30 ka tuig pagkatapos nabawtismuhan ang iya asawa. “Importante ang huwaran nga paggawi subong Cristiano para makita sang aton paryente ang positibo nga epekto sang kamatuoran sa aton kabuhi.” Dapat makita sang aton mga paryente nga bangod sa aton pagtuo tuhay kita sa iban, pero sa positibo nga paagi, indi sa negatibo.

Si apostol Pedro naghatag sing mapuslanon nga laygay sa mga asawa nga may indi tumuluo nga mga bana: “Magpasakop kamo sa inyo bana, agod ang bisan sin-o nga wala nagatuman sa pulong, madaug sila nga wala sing pulong paagi sa paggawi sang ila asawa, bangod nasaksihan mismo nila ang inyo putli nga paggawi upod ang tudok nga pagtahod. Kag ang inyo pagpamuni indi mangin sa gua lamang nga pagsalapid sing buhok kag ang pagsuksok sing bulawan nga mga puni ukon ang pagsuksok sing sampaw nga mga panapton, kundi ini mangin amo ang tinago nga  pagkatawo sa tagipusuon nga may di-madinulunton nga panapton nga malinong kag malulo nga espiritu, nga may daku nga balor sa mga mata sang Dios.”—1 Ped. 3:1-4.

Si Pedro nagsulat nga ang bana mahimo mabuyok paagi sa huwaran nga paggawi sang iya asawa. Amo ini nga Kasulatan ang ginadumdom ni Christa, ang utod nga nagatinguha nga lab-uton ang tagipusuon sang iya bana paagi sa iya paggawi sugod sang nabawtismuhan sia sang 1972. Bisan pa nagtuon sadto ang iya bana sa mga Saksi, wala pa ini nagdesisyon nga batunon ang kamatuoran. Nakatambong na ang iya bana sa pila ka miting kag nangin abyan sang mga kauturan. Pero ginrespeto nila ang iya kinamatarong sa pagdesisyon. Paano gintinguhaan ni Christa nga lab-uton ang iya tagipusuon?

“Determinado ako nga sundon kon ano ang gusto ni Jehova nga himuon ko. Pero, ginatinguhaan ko nga madaug ang akon bana bisan ‘wala sing pulong’ paagi sa akon maayo nga paggawi. Kon indi man lang supak sa mga prinsipio sang Biblia, ginahimo ko ang tanan ko nga masarangan para sundon sia. Kag siempre, ginarespeto ko ang iya kahilwayan kag ginatugyan ini sa mga kamot ni Jehova.”

Ang ginhimo ni Christa nagapakita nga importante gid ang pagpasibu. May makapalig-on sia nga rutina sang espirituwal nga mga hilikuton, lakip ang regular nga pagtambong sa mga miting kag mabungahon nga pagpakigbahin sa ministeryo. Pero, nagapakita sia sing paghangop, bangod nahibaluan niya nga may kinamatarong ang iya bana sa iya gugma, tion, kag atension. Kinahanglan gid naton tanan ang pagpasibu kag paghangop kon nagapakig-angot kita sa indi tumuluo nga mga paryente. “Sa tagsa ka butang may panag-on” ukon tion, paathag sang Biblia. Nalakip sa sini ang tion para sa mga miembro sang aton pamilya, labi na sa mga tiayon nga indi tumuluo. Ang tion sa pag-updanay nagabukas sing komunikasyon. Ginapakita sang mga eksperiensia nga ang maayo nga komunikasyon nagabulig para malikawan ang pagbatyag sing kasubo, napabay-an, ukon kaimon.—Man. 3:1.

“Importante nga ipakita nga ginahigugma naton ang miembro sang aton pamilya kag ginapangamuyo naton sia,” siling ni Holger, nga ang amay nabawtismuhan pagligad sang 20 ka tuig nga nabawtismuhan ang iban nga miembro sang pamilya. Si Christa nagsiling man nga ‘wala gid sia nadulaan sing paglaum nga ang iya bana magadampig sa ulihi kay Jehova kag magabaton sang kamatuoran.’ Dapat kita pirme positibo kag indi madulaan sing paglaum sa aton mga paryente nga indi tumuluo.

Tulumuron naton nga indi maguba ang aton kaangtanan sa aton kapamilya, hatagan sila sing kahigayunan nga matun-an ang kamatuoran, kag matandog ang ila tagipusuon sang mensahe sang Biblia. Kag sa tanan nga butang, dapat kita maggawi “nga may kalulo kag tudok nga pagtahod.”—1 Ped. 3:15.