Amo ini ang ginasiling sang pila ka alagad sang Dios tuhoy sa pagpangita sing palamanhon. Pero nahibaluan gid nila ang laygay ni apostol Pablo nga magminyo sa “sumulunod lamang sang Ginuo”—ang laygay nga dapat sundon sang tanan nga Cristiano. (1 Cor. 7:39) Kon amo, ngaa amo sini ang ila ginasiling?

Ang mga nagakomento sini mahimo magbatyag nga mas madamo ang utod nga dalaga sangsa utod nga soltero. Amo gid sini ang kahimtangan sa madamo nga pungsod. Binagbinaga ang duha ka halimbawa: Sa Korea, sa 100 ka di-minyo nga mga Saksi, 57 ang dalaga kag 43 ang soltero. Sa Colombia, 66 porsiento sang mga Saksi ang mga babayi kag 34 porsiento ang mga lalaki.

Sa pila ka kadutaan, daku katama ang ginapangayo nga dote sang indi tumuluo nga mga ginikanan. Gani, nabudlayan makapangasawa ang mga utod nga lalaki nga kasarangan lang ang pangabuhi. Bangod sini, mahimo magbatyag ang isa ka utod nga babayi nga mabudlay makakita sing palamanhon nga ‘sumulunod sang Ginuo.’ Gani mahimo mamangkot sia, “Realistiko pa bala nga maghunahuna nga makakita ako sing nagakaigo nga palamanhon nga Cristiano?” *

Kon amo sini ang imo ginahunahuna, makasalig ka nga nakita gid ni Jehova ang imo kahimtangan kag nahibaluan gid niya ang imo ginabatyag.—2 Cron. 6:29, 30.

Apang, nag-aman si Jehova sing panuytoy sa iya Pulong nga magminyo sa sumulunod lamang sang  Ginuo. Ngaa? Bangod nahibaluan niya kon ano ang maayo para sa iya katawhan. Luyag niya amligan ang iya mga alagad sa masakit nga epekto sang indi maalamon nga desisyon kag luyag man niya nga mangin malipayon sila. Sang panahon ni Nehemias, sang madamo nga Judiyo ang nangasawa sang dumuluong nga wala nagasimba kay Jehova, ginpatuhuyan ni Nehemias ang indi maayo nga halimbawa ni Solomon. Bisan pa ‘ginhigugma sang Dios’ si Solomon, “bangod sa iya dumuluong nga mga asawa, nagpakasala sia.” (Neh. 13:23-26) Gani para sa kaayuhan sang iya mga alagad, ginsugo kita sang Dios nga magminyo lamang sang matuod nga mga sumilimba. (Sal. 19:7-10; Isa. 48:17, 18) Nagapasalamat ang matuod nga mga Cristiano sa mahigugmaon nga pag-atipan sang Dios kag nagasalig sila sa iya panuytoy. Gani, paagi sa pagpasakop sa iya bilang Manuggahom, ginakilala nila sia subong Soberano sang Uniberso.—Hulu. 1:5.

Pat-od gid nga indi mo gusto nga “magpagota sing sampihakan” sa isa nga magapahilayo sa imo gikan sa Dios. (2 Cor. 6:14) Ginatuman sang madamo nga Cristiano karon ang panuytoy sang Dios nga nagaamlig sa ila sa tanan nga tion, kag narealisar nila nga maalamon ang ila ginhimo. Apang wala ini ginsunod sang iban.

Ginpaathag ni Maggy, * nga isa ka utod nga babayi sa Australia, ang natabo sang nakigdeyt sia sa indi tumuluo: “Pirme ako indi makatambong sa mga miting kay sa iya ako nagaupod. Nagluya gid ako sa espirituwal.” Si Ratana nga taga-India naluyag sa iya klasmeyt nga nagatuon sang Biblia. Apang sang ulihi, ginpakita sang lalaki nga interesado lang sia kay Ratana. Nagbiya si Ratana sa kamatuoran kag nagpakumbertir sa lain nga relihion para makapakasal sila.

Ang isa pa ka halimbawa amo si Ndenguè nga taga-Cameroon. Namana sia sa edad nga 19. Nagpromisa ang iya nobyo nga mahimo niya padayunon ang mga hilikuton sang iya relihion. Pero duha ka semana pagkatapos sang ila kasal, gindumilian na sia sang iya bana sa pagtambong sa Cristianong mga miting. Nagsiling sia: “Nasubuan ako kag nagahinibi. Narealisar ko nga indi ko na mahimo ang gusto ko. Pirme gid ako nagahinulsol.”

Siempre pa, may indi tumuluo man nga mga tiayon nga rasonable kag mahinangpanon. Pero bisan pa indi ka mag-antos sa mga epekto sang pagminyo sa indi tumuluo, ano ang epekto sini sa kaangtanan mo sa imo langitnon nga Amay? Ano ang batyagon mo nga wala ka namati sa iya laygay nga nahibaluan mo na gid nga para ini sa imo kaayuhan? Kag labaw sa tanan, ano ang batyagon niya sa imo desisyon?—Hulu. 1:33.

Napamatud-an gid sang mga kauturan sa bilog nga kalibutan nga ang pagminyo sa “sumulunod lamang sang Ginuo” amo ang pinakamaayo nga desisyon. Ang mga indi minyo determinado gid nga pahalipayon ang Dios paagi sa pagpili sing palamanhon ukon palangasaw-on sa tunga sang iya mga sumilimba. Si Michiko, nga isa ka dalaga nga utod sa Japan, ginakumbinsi sang iya pamilya nga magpamana sing indi tumuluo. Samtang ginapamatukan niya ini nga pag-ipit, nakita niya ang pila sang iya mga abyan kag mga kilala nga nakapamana sa sulod sang kongregasyon. Nagsiling sia: “Pirme ko ginasiling sa akon kaugalingon nga bangod si Jehova ‘malipayon nga Dios,’ ang aton kalipay wala nagadepende sa kon bala minyo kita ukon indi. Nagapati man ako nga ihatag niya ang mga handum sang aton tagipusuon. Gani kon indi kita makakita sing palamanhon bisan pa gusto naton mamana, maayo gid nga magpabilin anay kita nga indi minyo.” (1 Tim. 1:11) Sang ulihi, nakapamana si Michiko sing maayo nga utod, kag malipayon sia bangod naghulat sia.

Ang pila ka utod nga lalaki naghulat man sing nagakaigo nga palangasaw-on. Ang isa sa ila amo si Bill nga taga-Australia. Nagsiling sia nga kon kaisa may nanamian sia nga mga babayi sa gua sang kongregasyon. Pero ginalikawan gid niya nga makigsuod sa ila. Ngaa? Indi niya luyag sugdan ang isa ka kaangtanan nga magaresulta sa ‘pagpagota sing sampihakan upod sa indi tumuluo.’ Sa pagligad sang mga tinuig, may mga naluyagan man sia nga utod, pero wala naluyag sa iya. Naghulat si Bill sing 30 ka tuig, dayon nakilala niya ang isa ka utod nga pareho sa iya sing tulumuron. Nagsiling si Bill: “Wala gid ako naghinulsol.” Nagdugang pa sia: “Nalipay gid ako kay updanay kami sa ministeryo, sa pagtuon, kag sa pagsimba. Nalipay gid ako nga makilala kag makaupod ang mga abyan sang akon asawa bangod tanan sila mga  sumilimba man ni Jehova. Ginaaplikar namon ang mga prinsipio sang Biblia sa amon pag-asawahay.”

Ano ang mahimo mo samtang ginatugyan mo ang mga butang sa kamot ni Jehova? Mahimo mo hunahunaon kon ngaa wala ka magminyo. Kon ang panguna nga rason amo ang sugo sang Biblia nga magminyo sa “sumulunod lamang sang Ginuo,” dapat ka hatagan sing komendasyon sa pagtuman sina nga sugo. Makasalig ka nga nalipay gid si Jehova sa imo determinasyon nga tumanon ang iya Pulong. (1 Sam. 15:22; Hulu. 27:11) Padayon nga ‘ipautwas sa Dios ang imo ginabatyag’ paagi sa pangamuyo. (Sal. 62:8) Mangin mas hanuot ang imo pangamuyo samtang wala untat ka nga nagapangabay sa iya. Magabakod ang imo kaangtanan sa Dios kada adlaw samtang ginapakigbatuan mo ang mga pagsulay kag sayop nga mga handum. Makasalig ka nga nagaulikid ang Labing Mataas sa tanan niya nga matutom nga alagad kag palangga ka niya. Nahibaluan niya ang imo mga kinahanglanon kag mga handum. Wala sia nagsaad nga hatagan sing tiayon ang kada isa. Pero kon gusto mo na gid mangasawa ukon mamana, nahibaluan sang Dios ang pinakamaayo nga paagi para mahatag ang imo nagakaigo nga mga handum.—Sal. 145:16; Mat. 6:32.

Kon kaisa mahimo magbatyag ka kaangay ni salmista David nga nagsiling: “Sabta ako gilayon, O Jehova; nadulaan ako sang kusog. Indi paglipdi ang imo nawong sa akon.” (Sal. 143:5-7, 10) Sa sini nga sitwasyon, tuguti ang imo langitnon nga Amay nga ipakita kon ano ang iya kabubut-on para sa imo. Mahimo mo ini paagi sa pagbasa sang iya Pulong kag sa pagpamalandong sa sini. Kag mahibaluan mo ang iya mga sugo kag makita mo kon ano ang iya ginhimo para sa iya katawhan sadto. Paagi sa pagpamati sa iya, magabakod ang imo pagsalig nga ang pagtuman sa iya maalamon gid.

Ano pa ang mahimo mo agod mangin malipayon ka kag mabungahon? Samtang wala ka pa sing asawa ukon bana, palambua ang espirituwal nga paghantop, kaalwan, kapisan, kaayo, diosnon nga debosyon, kag maayo nga reputasyon, nga mapuslanon gid para sa isa ka malipayon nga pamilya. (Gen. 24:16-21; Rut 1:16, 17; 2:6, 7, 11; Hulu. 31:10-27) Unaha ang pagpangita sa Ginharian paagi sa pagpakigbahin sing bug-os sa pagbantala kag iban pa nga Cristianong mga hilikuton; mangin pangamlig gid ini sa imo. Si Bill nga ginsambit kaina nagsiling parte sa mga tinuig nga luyag niya mangasawa: “Kadasig lang maglabay sang tion! Gingamit ko ini nga tion sa pag-alagad kay Jehova subong payunir.”

Gani, ang pagminyo sa “sumulunod lamang sang Ginuo” realistiko gihapon. Ang pagtuman sa sini nga panuytoy makabulig sa imo nga mapadunggan si Jehova kag matigayon mo ang dayon nga kalipay. Ang Biblia nagasiling: “Malipayon ang tawo nga nagakahadlok kay Jehova, nga nagakalipay gid sa iya mga sugo. Ang bilidhon nga mga butang kag mga manggad yara sa iya balay, kag ang iya pagkamatarong wala sing katapusan.” (Sal. 112:1, 3) Gani mangin determinado nga tumanon ang sugo sang Dios nga magminyo sa “sumulunod lamang sang Ginuo.”