SANG ginpikpik si Kingsley sa abaga, nagsugod sia sa pagbasa sa Biblia—amo ini ang iya una nga asaynment sa Teokratikong Eskwelahan Para sa Ministeryo sa kongregasyon. Maathag niya nga ginmitlang ang kada tinaga kag wala gid sing sala. Pero dali lang! Ngaa wala sia nagatulok sa iya Biblia?

Si Kingsley, nga taga-Sri Lanka, isa ka bulag. May diperensia man ang iya palamatin-an kag kinahanglan sia mag-wheelchair. Paano sia nakatuon parte kay Jehova kag nangin kalipikado sa pagpakigbahin sa Teokratikong Eskwelahan Para sa Ministeryo? Isugid ko sa inyo.

Sang una ko nga nakilala si Kingsley, nagdayaw ako kay nauhaw gid sia sa kamatuoran sang Biblia. Nakatuon na sia sang Biblia upod sa pila ka Saksi, kag tais na ang iya libro nga Ang Ihibalo nga Nagadul-ong sa Kabuhi nga Walay Katapusan sa Braille. * Nagsugot sia nga padayunon namon ang iya pagtuon, pero may duha kami ka problema.

Una, nagaistar si Kings­ley upod sa iban sa balay para sa mga tigulang kag mga dis-ebol. Bangod sang gahod sa palibot kag pigaw nga palamatin-an ni Kingsley, dapat maghambal ako sing  matunog. Gani mabatian sang tanan ang amon pagtuon kada semana!

Ikaduha, diutay lang nga impormasyon ang mabasa kag mahangpan ni Kings­ley kon magtuon kami. Para mas madamo sia sing matun-an, nagahanda gid sia. Abanse niya nga ginasulitsulit basa ang amon pagatun-an, ginapangita ang mga teksto sa iya ­Braille nga Biblia, kag ginahunahuna ang sabat sa mga pamangkot. Epektibo gid ini nga paagi. Kon magtuon kami, nagapungko sia sa hapin sa salog kag nagapatikpatik sa sini samtang ginapaathag niya ang iya natun-an sa iya pinakamabaskog nga tingog. Wala magdugay, duha ka beses na kami magtuon sa isa ka semana, kag tagduha na ka oras!

Gusto ni Kingsley magtambong sa mga miting sa Kingdom Hall, pero indi ini mahapos. Kinahanglan niya ang bulig para makasakay kag makapanaug sa iya wheelchair kag sa salakyan, kag sa pagsulod kag paggua sa Kingdom Hall. Pero madamo sa kongregasyon ang nagbulosbulos sa pagbulig sa iya, kag ginkabig nila ini nga pribilehiyo. Kon miting, nagapungko sia malapit sa loudspeaker, nagapamati sing maayo, kag nagakomento pa!

Sang madugaydugay na ang iya pagtuon, namat-od sia nga magpakigbahin sa Teokratikong Eskwelahan Para sa Ministeryo. Duha ka semana antes sang iya una nga pagbasa sa Biblia, ginpamangkot ko sia kon nakapraktis na sia. May kompiansa sia nga nagsiling, “Huo, Utod, nagpraktis na ako sing mga 30 ka beses.” Ginpasalamatan ko sia sa iya pagpanikasog kag ginpamangkot kon puede ko pamatian ang iya pagbasa. Ginbuksan niya ang iya Biblia, ginplastar ang iya mga tudlo sa Braille, kag nagbasa. Pero natalupangdan ko nga wala nagahulag ang iya mga tudlo. Saulado na gali niya ang iya basahon sa Biblia!

Daw indi ako makapati samtang nagatululagay ang akon luha. Ginpamangkot ko si Kingsley kon paano niya ini nasaulo pagkatapos magpraktis sing 30 ka beses lamang. Nagsabat sia: “Indi, nagpraktis ako sing mga 30 ka beses kada adlaw.” Sa sulod sang kapin sa isa ka bulan, nagapungko si Kings­ley sa hapin sa salog kag sulitsulit nga nagabasa asta nga masaulo niya ini.

Nag-abot ang adlaw sang iya asaynment sa Kingdom Hall. Sang matapos ini ni Kingsley, mabaskog nga nagpalakpak ang kongregasyon, kag madamo ang naghibi sang makita nila ang determinasyon sining bag-o nga estudyante. Ang isa ka manugbantala, nga nag-untat sa pagpakigbahin sa eskwelahan bangod sa kulba, nagpangabay nga magpakigbahin liwat. Ngaa? Nagsiling sia, “Kon mahimo ni Kings­ley, mahimo ko man!”

Sang Septiembre 6, 2008, pagligad sang tatlo ka tuig nga pagtuon sa Biblia, ginsimbuluhan ni Kingsley ang iya dedikasyon kay Jehova paagi sa bawtismo sa tubig. Mainunungon sia nga Saksi tubtob sa iya kamatayon sang Mayo 13,2014, kag nagasalig gid sia nga sa Paraiso sa duta, padayunon niya ang iya matutom nga pag-alagad nga mapagros kag himpit ang panglawas. (Isa. 35:5, 6)—Panugiron ni Paul McManus.