MADAMO ang nakahibalo nga may 12 ka apostoles si Jesus. Pero basi wala sila makahibalo nga may mga disipulo man sia nga mga babayi nga pirme nakig-upod sa iya. Isa sa ila si Juana.—Mat. 27:55; Luc. 8:3.

Ano ang ginhimo ni Juana sang nagministeryo si Jesus, kag ano ang matun-an naton sa iya halimbawa?

Si Juana ang “asawa ni Cuza nga tulugyanan ni Herodes sang iya panimalay.” Si Cuza mahimo ang tulugyanan ni Herodes Antipas. Isa si Juana sa pila ka babayi nga gin-ayo ni Jesus sa ila mga balatian. Kaupod si Juana sang iban pa nga babayi nga naglakbay upod kay Jesus kag sa iya mga apostoles.—Luc. 8:1-3.

Gintudlo sang Judiyo nga mga rabbi nga indi dapat makig-upod ang mga babayi sa mga lalaki nga indi nila paryente, kag indi gid maglakbay upod sa ila. Halos wala gani nagapakig-istorya ang Judiyo nga mga lalaki sa mga babayi. Wala ginsapak ni Jesus ini nga mga tradisyon, gani ginpaupod niya sa iya grupo si Juana kag ang iban pa nga nagatuo nga mga babayi.

Mahimo nga ginpakalain sang iban si Juana bangod nakig-upod sia kay Jesus kag sa mga apostoles. Dapat mangin handa sa paghimo sing pagbag-o ang tanan nga nakig-upod kay Jesus sa ila naandan nga kabuhi. Pero ginsiling ini ni Jesus parte sa iya mga sumulunod: “Ini sila nga nagapamati sa pulong sang Dios kag nagatuman sini amo ang akon iloy kag akon mga utod.” (Luc. 8:19-21; 18:28-30) Napalig-on ka bala nga mahibaluan nga suod gid si Jesus sa mga nagasakripisyo sa pagsunod sa iya?

Si Juana kag ang madamo pa nga babayi nag-alagad kay Jesus kag sa 12 ka apostoles “paagi sa paggamit sang ila mga pagkabutang.” (Luc. 8:3) “Wala ginsiling ni Lucas nga ang mga babayi amo ang nagluto sang pagkaon, naghugas sang ginkan-an, kag nagpanursi sang mga bayo,” siling sang isa ka manunulat. “Posible nga ginhimo nila ini . . . , pero wala ini ginsiling ni Lucas.” Mahimo nga gingamit sang mga babayi ang ila kuarta, pagkabutang, ukon ginapanag-iyahan para buligan ang ila kaupdanan.

Wala sang sekular nga trabaho si Jesus kag ang iya mga apostoles samtang nagalakbay sa pagbantala. Gani posible nga wala sila sang kuarta para ibayad sa pagkaon kag iban pa nga kinahanglanon sang ila grupo sang mga 20 ka tawo. Bisan pa mahimo gin-abiabi ang Cristo kag ang iya mga apostoles, mahimo nga wala sila nagasalig nga hatagan pirme sang iban bangod may dala sila nga “kahon sang kuarta.” (Juan 12:6; 13:28, 29) Mahimo nga  nag-amot si Juana kag ang iban pa nga babayi para sa ila kagastuhanan.

Ginasiling sang iban nga ang Judiyo nga babayi wala sang kuarta ukon ginapanag-iyahan. Pero makita sa iban pa nga sinulatan sadto nga ang Judiyo nga babayi mahimo makatigayon sang manggad sa pila ka paagi: (1) palanublion kon mapatay ang iya amay nga wala sang anak nga lalaki, (2) ginhatag sa iya nga panag-iyahan niya, (3) kuarta nga ginkasugtan nga para sa iya sa kontrata sang kasal kon diborsiohan sia, (4) bahin niya sa kuarta kag pagkabutang sang napatay niya nga bana, ukon (5) iya kinitaan.

Wala duhaduha nga nag-amot ang mga sumulunod ni Jesus sa ila masarangan. Mahimo nga may manggaranon nga mga babayi sa mga sumulunod ni Jesus. Nasiling sang iban nga si Juana manggaranon bangod asawa sia sang tulugyanan ni Herodes. Mahimo nga sia ang naghatag kay Jesus sang bayo nga wala sing tinahian. Ginsiling sang isa ka manunulat nga ‘indi ini masarangan sang asawa sang mangingisda.’—Juan 19:23, 24.

Indi espesipiko nga ginsiling sang Kasulatan nga nag-amot sing kuarta si Juana. Pero ginhimo niya ang iya masarangan, kag may matun-an kita sa sini. Depende sa aton kon mahatag kita ukon indi kag kon ano ang ihatag naton para sa intereses sang Ginharian. Ang importante sa Dios amo nga malipayon naton nga ginahimo ang aton masarangan.—Mat. 6:33; Mar. 14:8; 2 Cor. 9:7.

Sang ginpatay si Jesus, mahimo nga didto si Juana kag ang iban pa nga babayi “nga nag-upod kag nag-alagad sa iya sang didto pa sia sa Galilea, kag ang madamo pa nga babayi nga nagtaklad kaupod niya sa Jerusalem.” (Mar. 15:41) Sang ginkuha ang bangkay ni Jesus sa usok para ilubong, “ang mga babayi nga nag-upod sa iya halin sa Galilea nagsunod, kag gintan-aw nila ang lulubngan kag nakita nila kon paano ginhamyang ang iya bangkay. Dayon nagpauli sila kag naghanda sing mahamot nga mga tanom kag mahamot nga mga lana.” Pagkatapos sang adlaw nga inugpahuway, nagbalik ini nga mga babayi—nga ginpakilala ni Lucas nga “sanday Maria Magdalena, Juana, kag Maria nga iloy ni Santiago”—kag nakita nila ang mga anghel nga nagsugid sa ila nga ginbanhaw si Jesus.—Luc. 23:55–24:10.

Posible nga upod si Juana sa mga disipulo, lakip sa iloy kag mga utod ni Jesus, nga nagtipon sa Jerusalem sang Pentecostes 33 C.E. (Binu. 1:12-14) Bangod sa palasyo nagtrabaho ang iya bana, mahimo nga sia ang nagsugid kay Lucas sang mga detalye parte kay Herodes Antipas, ilabi na kay si Lucas lang ang manunulat sang Ebanghelyo nga nagsambit sang iya ngalan.—Luc. 8:3; 9:7-9; 23:8-12; 24:10.

May matun-an gid kita sa kasaysayan ni Juana. Gin-alagad niya si Jesus sa iya bug-os nga masarangan. Mahimo gid nga nalipay sia nga ang iya gin-amot nakabulig kay Jesus, sa 12 ka apostoles, kag sa iban pa nga mga disipulo sa ila paglakbay kag pagbantala. Nag-alagad si Juana kay Jesus kag mainunungon sia sa iya walay sapayan sang mga pagtilaw. Dapat ilugon sang Cristiano nga mga babayi ang iya diosnon nga panimuot.