Nahibaluan Mo Bala?

May paryente bala si Jesus sa iya 12 ka apostoles?

▪ Wala sing diretso nga sabat ang Biblia. Pero kon tan-awon ang iban nga impormasyon kag basihan ang mga tradisyon sadto, mahimo nga paryente ni Jesus ang iban sa iya 12 ka apostoles.

Ginsambit sang mga manunulat sang Ebanghelyo ang ngalan sang mga babayi nga nagatan-aw kay Jesus samtang nagatagumatayon ini sa usok sang pag-antos. Ang Juan 19:25 nagsiling: “Ang iya iloy [Maria] kag ang utod nga babayi sang iya iloy; si Maria nga asawa ni Clopas, kag si Maria Magdalena.” Kon ikomparar ini nga bersikulo sa sinulatan nanday Mateo kag Marcos parte sa amo man nga hitabo, makasiling kita nga ang utod sang iloy ni Jesus amo si Salome. Si Salome amo ang iloy sang mga anak nga lalaki ni Zebedeo. (Mateo 27:55, 56; Marcos 15:40) Gani ang iya mga anak, nga ginpakilala sa iban nga bersikulo nga sanday Santiago kag Juan, mga pakaisa ni Jesus. Ining mag-utod nga mga mangingisda, gintawag ni Jesus para mangin mga disipulo niya.—Mateo 4:21, 22.

May mga impormasyon nga nagasiling nga si Clopas ukon Alfeo, nga bana sang isa sa mga babayi nga ginsambit sa Juan 19:25, utod ni Jose nga amay ni Jesus. Kon matuod ini, si Santiago nga anak ni Alfeo nga isa man sa iya 12 ka apostoles, pakaisa man ni Jesus.—Mateo 10:3.

Paryentehanay bala sanday Jesus kag Juan nga Manugbawtismo?

▪ Ang iban nagapati nga magpakaduha sila. Ginbase ini sa indi sibu nga translation sang Lucas 1:36. Halimbawa, sa King James Version, ini nga bersikulo nagasiling nga si Elisabet nga iloy ni Juan, kag si Maria nga iloy ni Jesus, magpakaisa.

Pero ang matuod, ang tinaga nga gingamit sa sini nga bersikulo sa orihinal nga Griego, indi espesipiko. Ginapakita lamang sini nga magparyentehanay ining duha ka babayi, pero indi buot silingon nga magpakaisa sila. Ang The Interpreter’s Dictionary of the Bible nagsiling, “ang termino nga gingamit tuman kasangkad amo nga indi mahibaluan kon ano gid ang ila relasyon.” Kon amo, diin naghalin ang ideya nga magpakaduha sanday Jesus kag Juan? Ang The Catholic Encyclopedia nagsabat: “Ang tanan namon nga impormasyon parte sa . . . mga ginikanan ni Maria . . . naghalin sa apokripal nga mga sinulatan.”

Gani, sanday Jesus kag Juan magparyentehanay, pero indi sigurado kon magpakaduha sila.