Likawi nga Ikomparar ang Imo Kaugalingon sa Iban
Sekreto 2
Likawi nga Ikomparar ang Imo Kaugalingon sa Iban
ANO ANG GINATUDLO SANG BIBLIA? “Ang tagsa-tagsa dapat gid mag-usisa sang iya kaugalingon. Kag kon makita niya nga maayo ang iya ginahimo, ti mangin malipayon siya. Pero indi niya pag-ikomparar ang iya kaugalingon sa iban.”—Galacia 6:4, Ang Pulong sang Dios, APD.
NGAA MABUDLAY INI HIMUON? Pirme naton ginakomparar ang aton kaugalingon sa iban. Kon kaisa sa mga mas kubos sa aton, kag pirme sa mas impluwensiado, mas manggaranon, kag mas may ikasarang. Bisan kay sin-o man naton ginakomparar ang aton kaugalingon, indi gid maayo ang resulta sini. Abi naton, ang pagkatawo sang isa nagadepende sa iya pagkabutang ukon masarangan. Puede pa gani ini bangdan sang kahisa kag kompetensiahanay.—Manugwali 4:4.
ANO ANG PUEDE MO HIMUON? Tan-awa ang imo kaugalingon pareho sang pagtan-aw sang Dios sa imo. Himua ini nga basihan sang imo pagkatawo. Si Jehova * nga Dios nagsiling, “Ang tawo nagatulok sa gwa nga dagway pero ako nagatulok sa tagipusoon.” (1 Samuel 16:7, Maayong Balita nga Biblia, MB) Ginatakus ni Jehova ang aton pagkatawo indi paagi sa pagkomparar sa iban, kundi paagi sa pagbasa sang aton tagipusuon, panghunahuna, balatyagon, kag motibo. (Hebreo 4:12, 13) Nahibaluan niya ang aton mga limitasyon, kag gusto niya nga magkabuhi kita suno sa aton masarangan. Kon ginakomparar mo ang imo kaugalingon sa iban, mangin bugalon ka ukon indi gid makontento. Gani, batuna sing mapainubuson nga indi sa tanan nga tion ikaw ang pinakamaayo.—Hulubaton 11:2.
Ano gid ang dapat mo himuon para pabaloran ka sang Dios? Gingiyahan niya si Miqueas sa pagsulat: “Napahayag niya sa imo, O tawo, ang maayo; kag ano bala ang ginakinahanglan sa imo sang GINOO kondi ang paghimo sing matarung, kag ang paghigugma sang kalolo, kag ang paglakat sing mapainubuson upud sa imo Dios?” (Miqueas 6:8) Kon sundon mo ini, indi ka gid pagpabay-an sang Dios. (1 Pedro 5:6, 7) Daku gid ini nga rason nga mangin kontento kita!
[Nota]
^ par. 5 Ang ngalan sang Dios sa Biblia.
[Retrato sa pahina 5]
Ginatakus ni Jehova ang aton pagkatawo sa kon ano ang ara sa aton tagipusuon
