MAY ginsugid na bala sa imo nga likom ukon sekreto?— * May isugid ko sa imo. Ginatawag ini sang Biblia nga “sagrado nga likom nga ginhipsan sa sulod sang malawig gid nga mga tion.” (Roma 16:25) Sang una, ang Dios lang ang kabalo sang “sagrado nga likom.” Tan-awon naton kon ano ang ginhimo sang Dios para madamo ang makabalo sini nga sekreto.

Una anay, kabalo ka bala kon ano ang “sagrado”?— Buot silingon sini, balaan, matinlo, ukon espesyal. Ini nga sekreto gintawag nga sagrado nga likom kay halin ini sa Dios, nga balaan. Sin-o sa banta mo ang gusto makabalo sini nga sekreto?— Ang mga anghel. Ang Biblia nagsiling: “Ang mga anghel nagahandum nga magtan-aw sa sini gid nga mga butang.” Huo, gusto nila mabal-an ining sagrado nga likom.—1 Pedro 1:12.

Sang magkadto si Jesus sa duta, may ginsugid sia parte sa sagrado nga likom kag ginpaathag niya ini. Ginsilingan niya ang iya mga disipulo: “Sa inyo ginhatag ang sagrado nga likom sang ginharian sang Dios.” (Marcos 4:11) Parte kuno sa ano ang sagrado nga likom?— Parte ini sa Ginharian sang Dios, nga gintudlo ni Jesus nga ipangamuyo!—Mateo 6:9, 10.

Usisaon naton subong kon ngaa ang Ginharian sang Dios isa ka sekreto “sa sulod sang malawig gid nga mga tion” asta nga nag-abot si Jesus sa duta para ipaathag ini. Sang wala ginsunod nanday Adan kag Eva ang sugo sang Dios kag ginpagua sila sa hardin sang Eden, ginsugid sa mga alagad sang Dios nga himuon Niya gihapon nga paraiso ang bilog nga duta. (Genesis 1:26-28; 2:8, 9; Isaias 45:18) Ginsulat nila nga mangin malipayon gid ang mga tawo sa duta kon maggahom na ang Ginharian sang Dios.—Salmo 37:11, 29; Isaias 11:6-9; 25:8; 33:24; 65:21-24.

Sin-o sa banta mo ang pilion sang Dios nga Manuggahom sa iya Ginharian?— Ang iya Anak, ang “Principe sang Paghidait,” nga si Jesucristo. “Ang pagbulut-an manginsa iya abaga,” siling sang Biblia. (Isaias 9:6, 7) Ikaw kag ako dapat magtuon sang “ihibalo tuhoy sa sagrado nga likom sang Dios, nga amo si Cristo.” (Colosas 2:2) Dapat naton mabal-an nga ginsaylo sang Dios ang kabuhi sang una nga anghel (ang espiritu nga Anak) nga gintuga niya pakadto sa tiyan ni Maria. Ang Anak, nga isa sadto ka gamhanan nga anghel, ginpadala sang Dios sa duta bilang halad para mabuhi kita asta san-o.—Mateo 20:28; Juan 3:16; 17:3.

Magluwas nga si Jesus ang ginpili sang Dios nga mangin Manuggahom sa Iya Ginharian, may dapat pa kita mabal-an parte sa sini nga sekreto. Mapalangit man ang iban nga lalaki kag babayi  upod sa ginbanhaw nga si Jesus. Kaupod sila ni Jesus nga magagahom sa langit!—Efeso 1:8-12.

Ginpakilala ang pila ka kaupod ni Jesus nga magagahom sa langit. Ginsilingan ni Jesus ang iya matutom nga mga apostoles nga mapalangit sia para magpreparar sing lugar para sa ila. (Juan 14:2, 3) Kon basahon mo ang mga bersikulo sa idalom, mabal-an mo ang ngalan sang pila ka lalaki kag babayi nga makaupod ni Jesus sa paggahom sa Ginharian sang iya Amay.—Mateo 10:2-4; Marcos 15:39-41; Juan 19:25.

Sang una, wala pa mabal-an kon pila ang makaupod ni Jesus nga magagahom sa langit bilang bahin sang iya Ginharian. Pero bal-an na naton subong. Kabalo ka kon pila sila?— Siling sang Biblia, 144,000. Bahin man ini sang sagrado nga likom.—Bugna 14:1, 4.

Gapati ka bala nga ining “sagrado nga likom sang ginharian sang Dios” amo ang pinakamaayo nga sekreto nga puede mabal-an ni bisan sin-o?— Kon amo, dapat pa gid naton ini tun-an sing maayo para mapaathag naton ini sa madamo nga tawo.