6. Pagwali sa Bilog nga Kalibutan
6. Pagwali sa Bilog nga Kalibutan
“Iwali ining maayong balita sang ginharian sa bug-os nga kalibutan.”—MATEO 24:14, Ang Biblia, PBS.
● Si Vaiatea nagaistar sa isa ka naligwin nga isla sa Pasipiko sa Tuamotu Archipelago. Bisan pa ang Tuamotu may mga 80 ka isla kag may kalaparon nga sobra sa 802,900 kilometros kuadrados, mga 16,000 lamang ang pumuluyo sini. Pero si Vaiatea kag ang iban pa nga pumuluyo sang isla naistorya sang mga Saksi ni Jehova. Ngaa? Bangod gusto sang mga Saksi nga isugid ang maayong balita sang Ginharian sang Dios sa tanan nga tawo, bisan diin man sila nagaistar.
ANO ANG GINAPAKITA SANG MGA REPORT? Ang mensahe sang Ginharian nakalab-ot na sa bilog nga kalibutan. Sang 2010 lamang, ang mga Saksi ni Jehova naghinguyang sing sobra sa 1.6 ka bilyon ka oras sa pagsugid sing maayong balita sa 236 ka kadutaan. Buot silingon, mga 30 minutos kada adlaw ang ginahinguyang sang isa ka Saksi sa pagwali. Sang nagligad nga mga dekada, naghimo sila kag nagpanagtag sing sobra sa 20 bilyones ka literatura parte sa Biblia.
ANO ANG PILA KA PAGPATI? Linibo na ka tuig nga ginawali ang mensahe sang Biblia.
HUSTO BALA INA NGA PAGPATI? Matuod, madamo ang nagawali parte sa Biblia. Pero ang kalabanan sa ila nagawali sing malip-ot lang kag sa pila lang ka lugar. Sa pihak nga bahin, ang mga Saksi ni Jehova nag-organisar sing pagwali nga hilikuton sa ginatos ka milyon ka tawo sa bilog nga kalibutan. Padayon sila nga nagawali bisan pa ginapamatukan sila sang pila ka gamhanan kag mapintas nga mga organisasyon sang tawo. * (Marcos 13:13) Dugang pa, wala ginabayaran ang mga Saksi ni Jehova sa ila pagwali. Mga boluntaryo sila, kag wala sing bayad ang ila mga literatura. Ang ila hilikuton ginasuportahan sang boluntaryo nga mga amot.
ANO SA BANTA MO? Ginawali bala sa bilog nga kalibutan ang “maayong balita sang ginharian”? Ang katumanan bala sini nga tagna nagakahulugan nga may mas maayo pa nga palaabuton?
[Nota]
^ par. 6 Para sa dugang nga impormasyon, tan-awa ang tatlo ka video nga “Faithful Under Trials,” “Purple Triangles,” kag “Jehovah’s Witnesses Stand Firm Against Nazi Assault,” nga ginhimo sang mga Saksi ni Jehova.
[Blurb sa pahina 9]
“Tubtob ginatugot ni Jehova, ipadayon naton ang makugi nga pagbantala sing maayong balita sang Ginharian, nga nagagamit sang tanan nga paagi agod malab-ot ang mga tawo.”—2010 TUIGAN NGA LIBRO SANG MGA SAKSI NI JEHOVA.
