Pamangkot sang mga Bumalasa . . .

Mapalangit Bala ang Tanan nga Matutom nga Cristiano?

▪ Madamo ang nakabasa sining ginsiling ni Jesus: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.” (Juan 3:16) Buot bala silingon ni Jesus nga ang tanan nga matutom nga sumilimba sang iya Amay, si Jehova nga Dios, mapalangit para magkabuhi sing wala katapusan?

Talupangda ang ginsiling ni Jesus: “Wala sing tawo nga nakakayab sa langit kundi sia nga nagpanaug gikan sa langit, ang Anak sang tawo.” (Juan 3:13) Ginapakita sini nga ang matutom nga mga sumilimba sang una, pareho nanday Noe, Abraham, Moises, kag David, wala nagpalangit. (Binuhatan 2:34) Diin sila nagkadto? Ara sila sa lulubngan, nga nagatulog sa kamatayon, wala sing hinalung-ong, kag nagahulat sang pagkabanhaw.—Manugwali 9:5, 6; Binuhatan 24:15.

Sa Biblia, si Jesus ang una nga nagsambit nga may pila ka tawo nga mapalangit. Nagsiling sia sa iya mga apostoles nga mahanda sia sing duog para sa ila sa langit. (Juan 14:2, 3) Wala ini sadto nahibaluan sang katawhan sang Dios. Sang ulihi, ginpaathag ni apostol Pablo nga sa tapos napatay si Jesus kag nabanhaw pakadto sa langit, ‘ginbuksan Niya para sa iya mga disipulo ang isa ka bag-o kag buhi nga dalan’ nga wala pa sing tawo nga nakaagi.—Hebreo 10:19, 20.

Buot bala silingon nga halin sadto nagpalangit na ang tanan nga matutom? Indi, kay ang mabanhaw pakadto sa langit ginhatagan sing hilikuton nga para lamang sa pila ka tawo. Sa katapusan nga gab-i nga kaupod ni Jesus ang iya mga apostoles, ginsilingan niya sila nga ‘magalingkod sila sa mga trono agod maghukom’ sa iya Ginharian sa langit. Gani, magagahom sila sa langit upod kay Jesus.—Lucas 22:28-30.

Luwas sa mga apostoles, ang iban nga tawo magagahom man upod kay Jesus. Sa palanan-awon ni apostol Juan, nakita niya si Jesus upod ang mga ginbanhaw sa langit nga ginlaragway nga ‘isa ka ginharian kag mga saserdote nga magagahom sa duta.’ (Bugna 3:21; 5:10) Pila ang ila kadamuon? Pareho sa isa ka gobierno nga pila lamang ang nagagahom, ang Ginharian sa langit pagagamhan ni Jesus, ang Kordero sang Dios, upod sa 144,000 nga ‘ginbakal gikan sa katawhan.’—Bugna 14:1, 4, 5.

Matuod, ang 144,000 diutay lamang kon ipaanggid sa tanan nga matutom halin pa sang una. Pero nagakaigo gid ini, bangod ang 144,000 nga banhawon pakadto sa langit may pinasahi nga hilikuton. Kon magpaobra ka sang balay, kontratahon mo bala ang tanan nga panday sa inyo lugar? Indi, kay pila lang ka panday ang kinahanglan para sa trabaho. Sing kaanggid, indi tanan nga matutom pilion sang Dios para sa pinasahi nga pribilehiyo nga maggahom sa langit upod kay Jesus.

Tumanon sining gobierno sa langit ang katuyuan sang Dios sa katawhan. Dumalahan ni Jesus kag sang iya 144,000 ka kaupod ang paghimo sa bilog nga duta nga paraiso, diin madamo nga matutom ang magakabuhi sing malipayon asta san-o. (Isaias 45:18; Bugna 21:3, 4) Lakip sa sini ang mga yara sa memorya sang Dios, nga pagabanhawon.—Juan 5:28, 29.

Ang tanan nga matutom nga sumilimba ni Jehova halin sang una makabaton sang pinasahi nga regalo nga kabuhi nga wala sing katapusan. (Roma 6:23) Pila lamang ang makabaton sang kabuhi sa langit para maggahom upod kay Jesus, kag ang kalabanan makabaton sang kabuhi sa paraiso nga duta.