Masarangan Mo ang mga Kabudlayan

SA SINING mabudlay nga mga tion, ginabatas sang madamo ang tulad-bagyo nga mga kabudlayan. Apang, para sa mga Cristiano, ang gugma sa Dios kag pagkamainunungon sa iya mga prinsipio amo ang nagabulig sa ila nga malandas ini. Paano? Ang sabat yara sa ilustrasyon nga gintudlo ni Jesucristo. Ginpaanggid niya ang iya matinumanon nga mga disipulo sa “mainandamon nga tawo, nga nagtukod sang iya balay sa ibabaw sang igang.” Si Jesus nagsiling: “Nagbundak ang ulan kag nagbaha kag naghuyop ang hangin kag nagwaswas sa balay, apang wala ini matumba, kay ginpasad ini sa igang.”—Mateo 7:24, 25.

Talupangda nga bisan mainandamon ang tawo sa ilustrasyon, nakaeksperiensia gihapon sia sing mga kabudlayan—nga ginarepresentar sang nagabundak nga ulan, pagbaha, kag mabaskog nga hangin. Gani, indi buot silingon ni Jesus nga ang iya mga disipulo wala sing kabudlayan nga atubangon kag magakalipay lamang sa mahidaiton kag malinong nga kabuhi. (Salmo 34:19; Santiago 4:13-15) Sa baylo, nagsiling sia nga mahandaan kag malandas sang matutom nga mga alagad sang Dios ining maunos nga mga kabudlayan kag krisis.

Ginsugdan ni Jesus ang ilustrasyon paagi sa pagsiling: “Ang tagsatagsa nga nagapamati sining akon pinamulong kag nagahimo sini mangin kaangay sa mainandamon nga tawo, nga nagtukod sang iya balay sa ibabaw sang igang.” Siempre pa, si Jesus wala nagapamulong tuhoy sa literal nga pagtukod sang balay, kundi tuhoy sa pagpalambo sang Cristianong mga motibo kag mga buhat. Ang mga nagapamati sa pinamulong ni Cristo nagahantop kag nagapakita sing maayong pangatarungan. Ginapasad nila ang ila mga motibo kag mga buhat sa igang sang Cristianong mga panudlo paagi sa paghimo sang mga butang nga gintudlo sa ila. Sing makawiwili, ining simbuliko nga igang indi masapwan sa manabaw lang. Ang tawo sa ilustrasyon dapat ‘magkutkot sing madalom’ agod malab-ot ini. (Lucas 6:48) Sing kaanggid, ginapanikasugan gid sang mga disipulo ni Jesus nga mapalambo ang nagapadayon nga mga kinaiya nga nagapasuod sa ila sa Dios.—Mateo 5:5-7; 6:33.

Ano ang matabo kon ang tulad-bagyo nga mga kabudlayan magtilaw sa kabakod sang Cristianong pundasyon sang mga sumulunod ni Jesus? Ang ila pagkamatinumanon sa mga panudlo ni Cristo kag ang ila Cristianong mga kinaiya napamatud-an nga amo ang ginahalinan sang kabakod sa tion sining mga kabudlayan kag labaw sa tanan, sa tion sang nagahilapit nga bagyo sang Armagedon. (Mateo 5:10-12; Bugna 16:15, 16) Sa pagkamatuod, paagi sa pagtuman sa mga panudlo ni Cristo, nasarangan sang madamo ang tulad-bagyo nga mga pagtilaw. Masarangan mo man ini.—1 Pedro 2:21-23.