Nahibaluan Mo Bala?

Ano ang matun-an naton sa pagdayon ni apostol Pedro sa balay sang isa ka manugpanit antes sia ginsugo nga magkadto kay Cornelio?

▪ Ang tulun-an sang Binuhatan nagasiling nga nagpabilin si Pedro “sa sulod sang madamo nga adlaw . . . sa Joppe upod kay Simon nga manugpanit,” nga may “balay sa higad sang dagat.” (Binuhatan 9:43; 10:6) Ginkabig sang mga Judiyo nga mahigko kag manubo nga obra ang pagpamanit. Suno sa Talmud, mas manubo pa ini sangsa pagpanguha sing ipot. Bangod sini nga obra, pirme makauyat si Simon sang patay nga lawas sang sapat, gani magapabilin sia nga indi matinlo. (Levitico 5:2; 11:39) Suno sa pila ka reperensia, mahimo nga naggamit si Simon sing tubig sa dagat, kag ang iya ulubrahan mahimo nahamtang sa gua sang banwa bangod ang pagpamanit “mabaho nga proseso.”

Wala nangindi si Pedro nga magdayon sa balay ni Simon. Ginapakita sini nga pareho sa ginhimo ni Jesus sang una, wala ginsunod ni Pedro ang pagpakanubo sang mga Judiyo sa mga tawo nga indi matinlo.—Mateo 9:11; Lucas 7:36-50.

Ano ang buot silingon sang sabat ni Jesus nga “ikaw mismo ang nagsiling sini”?

▪ Sang ginpamangkot sia ni Caifas, nga mataas nga saserdote sang mga Judiyo, kon bala sia ang Cristo, nga Anak sang Dios, si Jesus nagsabat: “Ikaw mismo ang nagsiling sini.” (Mateo 26:63, 64) Ano ang iya buot silingon?

Wala ginlikawan ni Jesus ang pamangkot ni Caifas. Ang ekspresyon nga “ikaw mismo ang nagsiling sini” masami nga ginahambal sang mga Judiyo bilang pag-ugyon sa ginasiling sang isa. Halimbawa, ang Jerusalem Talmud, nga isa ka relihioso nga sinulatan sang mga Judiyo sang ikap-at nga siglo C.E., nagsiling nga sang ginpamangkot ang isa ka Judiyo kon bala napatay na ang rabbi, nagsabat sia: “Ikaw ang nagsiling sini.” Ang iya sabat nagapahangop nga patay na matuod ang rabbi.

Nahibaluan ni Jesus nga may awtoridad ang mataas nga saserdote nga pasugiron sia sing kamatuoran. Kon indi sia magsabat, mahimo hunahunaon sang mataas nga saserdote nga ginapanghiwala niya nga sia ang Cristo. Gani, ang sabat ni Jesus nga “Ikaw mismo ang nagsiling sini” nagapakita nga ugyon sia sa ginsiling sang mataas nga saserdote. Ginapakita man sa sinulatan ni Marcos, nga sang ginpamangkot ni Caifas si Jesus kon bala Sia ang Mesias, si Jesus nagsabat: “Huo, ako.”—Marcos 14:62; basaha man ang Mateo 26:25 kag Marcos 15:2.

[Retrato sa pahina 18]

Ulubrahan sang mga manugpanit sa Fez, Morocco