Pamangkot sang mga Bumalasa . . .

Ang Dios Bala May Ginapasulabi nga Rasa?

▪ Wala. Ang Biblia maathag nga nagasiling: “Ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sang pagkamatarong kalahamut-an sa iya.”—Binuhatan 10:34, 35.

Ang pagtamod sang Dios sa sini nga butang indi pareho sa pagtamod sang indi perpekto nga mga tawo. Madamo ang nagapati nga ang isa ka rasa (masami ang ila rasa) mas mataas sangsa iban. Ginapakita sini nga pagpati ang pagtamod ni Charles Darwin, nga nagsulat: “Sa ulihi, . . . ang sibilisado nga rasa sang tawo magapapas, kag magabulos, sa kubos nga mga rasa.” Makapasubo nga madamo na ang ginpigos sang mga tawo nga nagakabig sang ila rasa nga mas mataas.

May basihan bala nga magbatyag ang isa nga mas mataas ang iya rasa? Napamatud-an bala sang siensia nga mas maayo ang gene sang iban nga rasa? Ang geneticist kag propesor sang Oxford nga si Bryan Sykes nagsiling: “Wala sing basihan nga lainlain ang gene sang tagsa ka rasa. . . . Ginapamangkot ako pirme kon bala may Griego nga DNA ukon Italyano nga gene, pero ang matuod, wala. . . . Palareho kita tanan.”

Ini nga impormasyon nagaugyon sa ginasiling sang Biblia. Ginatudlo sang Biblia nga gintuga sang Dios ang lalaki kag babayi, nga amo ang ginhalinan sang tanan nga tawo. (Genesis 3:20; Binuhatan 17:26) Gani, sa pagtamod sang Dios palareho ang tanan nga tawo.

Wala si Jehova nagatan-aw sa kolor ukon hitsura sang tawo. Mas importante sa iya ang aton tagipusuon, ukon ang aton pagkatawo. Nagsiling sia: “Ang tawo nagatan-aw lang sa hitsura, pero ako iya nagatan-aw sa tagipusuon.” (1 Samuel 16:7, APD) Ini nga kamatuoran makapabakod gid sa aton. Paano?

Ano man ang aton rasa, madamo sa aton ang nalaw-ayan sa aton hitsura, kag diutay lang ang mahimo naton para bag-uhon ini. Pero, masarangan naton bag-uhon ang pinakaimportante nga butang—ang aton tagipusuon. (Colosas 3:9-11) Batunon naton nga may huyog kita nga magbatyag nga ang aton rasa mas mataas, ukon kubos, sangsa iban. Bangod ini nga pagtamod wala nagaugyon sa pagtamod sang Dios, dapat naton ini dulaon sa aton tagipusuon.—Salmo 139:23, 24.

Kon ginatinguhaan naton nga tamdon ang aton kaugalingon kag ang iban pareho sa pagtamod ni Jehova, buligan niya kita. Ginapahanumdom kita sang iya Pulong: “Ang mga mata sang GINOO nagapanoloktolok sa bug-os nga duta, sa pagpakita nga sia mabakud tungud sa ila nga may tagiposoon nga himpit ayon sa iya.” (2 Cronica 16:9) Matuod gid ini ano man ang aton rasa.