MINILYON ka Cristiano ang wala nagasaulog sang Krismas. Ano ang ginabatyag nila sa ila desisyon? Nagabatyag bala sila nga daw may kulang? Nagabatyag bala ang ila kabataan nga ginadingutan sila? Binagbinaga ang ginsiling sang mga Saksi ni Jehova sa bilog nga kalibutan parte sa sini.

Pagdumdom kay Jesucristo: “Antes ako mangin Saksi ni Jehova, talagsa lang ako nagasimba. Kon Krismas ukon Easter lang ako nagasimba, pero wala ko man gihapon ginadumdom si Jesucristo. Wala na ako nagasaulog sang Krismas, pero nagatambong ako sa Cristiano nga mga pagtilipon duha ka beses kada semana kag ginatudluan ko ang iban sang ginasiling sang Biblia parte kay Jesus!”—EVE, AUSTRALIA.

Pagpakita sing kaalwan: “Nalipay gid ako kon makabaton ako sang regalo nga wala ko ginapaabot. Ginahatagan ko man ang iban sang kard kag drowing nga ako mismo ang naghimo. Nalipay gid ako nga nalipay ang iban sa akon ginhimo.”—REUBEN, NORTHERN IRELAND.

Pagbulig sa mga imol: “Nalipay kami magluto para sa mga nagamasakit. Kon kaisa, ginadalhan namon sila sang bulak, keyk, ukon regalo para mag-ayoayo man ang ila pamatyag. Nalipay kami kay mabisitahan namon sila bisan ano nga tion.”—EMILY, AUSTRALIA.

Pag-updanay sang pamilya: “Kon magtilipon ang amon pamilya, mas makilala sang kabataan ang ila mga tiyo, tiya, lolo kag lola, kag mga pakaisa. Nagaupdanay kami indi lamang bangod may okasyon ukon napilitan lang, gani mabatyagan sang amon pamilya nga palangga namon sila.”—WENDY, CAYMAN ISLANDS.

Paghidait: “Masako ang mga tawo kon Krismas amo nga wala na sila sing tion nga pamensaron ang parte sa paghidait. Nakabatyag ako sing kalinong sa hunahuna kay natun-an ko ang ginapromisa sang Biblia para sa katawhan. Nahangpan ko nga may malipayon nga palaabuton para sa akon kabataan.”—SANDRA, SPAIN.