Sa iya Sermon sa Bukid, ginsilingan ni Jesus ang iya mga sumulunod: “Kamo ang asin sang duta; apang kon ang asin indi na maparat, paano mapasag-uli ang pagkaasin sini? Indi na ini magamit sa bisan ano nga butang kundi ipilak sa gua agod matapakan sang mga tawo.” (Mateo 5:13) Ang asin preserbatibo. Gani, ang ilustrasyon ni Jesus mahimo magkahulugan nga ang iya mga disipulo puede kag dapat mag-amlig sa iban sa espirituwal kag moral nga pagkadunot.

Base sa ginhambal ni Jesus parte sa pagkadula sang kaparat sang asin, ang The International Standard Bible Encyclopedia nagasiling: “Ang asin nga naghalin sa Patay nga Dagat nasimpunan sang iban pa nga mineral; gani mahimo madula ang asin sa sini nga miksklada, amo nga indi na ini maparat.” Gani, mahangpan naton nga kon indi na maparat ang asin “indi na ini magamit sa bisan ano nga butang kundi ipilak sa gua.” Ang ensiklopedia nagasiling pa: “Ang asin nga naghalin sa Patay nga Dagat nasimpunan sang iban nga mineral amo nga mas manubo ang kalidad sini sangsa kalabanan nga asin, pero bangod mahapos ini matigayon (ginapamulot lang ini sa baybayon) amo ini ang panguna nga kuluhaan sang asin sa Palestina.”

Ginsaysay ni Jesus ang parabola parte sa isa ka babayi nga sang nadulaan sang isa sa iya napulo ka drakma, nagsindi sang suga kag nagsilhig sang iya balay tubtob nakita niya ini. (Lucas 15:8-10) Sang panahon ni Jesus, ang isa ka drakma nagabalor sing halos isa ka adlaw nga sueldo, gani daku ini nga kuarta. Pero ang kahimtangan nga iya ginlaragway mahimo natabo gid.

Ginapakita sang pila ka reperensia nga masami ginagamit sang mga babayi ang sensilyo bilang puni. Gani mahimo nga ang sensilyo nga ginpatuhuyan ni Jesus bahin sang isa ka palanublion ukon dote. Bisan diin man sa sini ang rason, sigurado nga gusto gid makita sini nga babayi ang nadula nga sensilyo.

Dugang pa, ang kinaandan nga mga balay sang panahon ni Jesus gindesinyo nga madulom kag mainit. Diutay lang ukon wala gid gani ini sang bintana. Ang salog ginakulapan sang dagami ukon laya nga paklang sang lainlain nga tanom. Amo nga mabudlay pangitaon ang sensilyo kon mahulog ini. “Gani,” siling sang isa ka komentarista, “kon madula sa sini nga lugar ang isa ka gamay nga butang pareho sang kuarta, ang pinakamaayo nga himuon para makita ini amo ang pagsindi sang suga kag pagsilhig sang balay.”