Ang aton planeta maayo gid nga duog para sa kabuhi. May bugana ini nga tubig, nga kinahanglanon sa kabuhi. Ang pagtakilid, pagtiyog, kag orbit sang duta hustuhan lang para indi magyelo ukon maghubas ang mga kadagatan. Ang atmospera kag mag­net­ic ­field nagaamlig sa duta sa makamamatay nga radiasyon. Makatilingala gid ang paghiusa sang mga tanom kag sapat sa duta. Gani, madamo ang nakahinakop nga may katuyuan gid ang paghimo sang aton planeta.—Basa­ha ang Isaias 45:18.

Pero mahimo mamangkot ka, ‘Ang pag-­antos kag inhustisya bahin bala sina nga katuyuan?’—Basaha ang Deuteronomio 32:4, 5.

Gindesinyo ang duta nga mangin matahom nga puluy-an sang mga tawo, nga nagarespeto sa isa kag isa kag nagahigugma sa ila Manunuga. Gani, ang tawo may mas mataas nga katuyuan sangsa mga sapat kag tanom. Makilala naton ang aton Manunuga kag madayaw kag mailog ang iya gugma kag hustisya.­—Basa­ha ang Manugwali 12:13; Miqueas 6:8.

Matuman sang aton Manughimo ang tanan niya nga katuyuan. Gani makasiguro kita nga dulaon niya ang pag-antos kag inhustisya kag himuon ang aton planeta nga malipayon nga puluy-an para sa katawhan.—Basaha ang Salmo 37:11, 29; Isaias 55:11.