Natawo ako sa Baku, Azerbaijan. Duha kami ka mag-utod kag ako ang agot. Muslim si Tatay, kag Judiyo si Nanay. Nagapalanggaanay sila kag wala sing problema sa relihion. Ginasakdag ni Nanay si Tatay kon mag-Ramadan, kag ginasakdag man ni Tatay si Nanay kon magsaulog sia sing Paskua. May Koran kami sa balay, Torah, kag Biblia.

Para sa akon Muslim ako. Bisan wala ko ginaduhaduhaan nga may Dios, may mga kahimtangan nga ginapaligban ko. ‘Ngaa gintuga sang Dios ang mga tawo nga magaantos sa iya bug-os nga kabuhi dayon paantuson man lang gali sing wala katapusan sa impierno?’ Nagasiling ang mga tawo nga pagbuot sang Dios ang tanan nga nagakatabo, gani nagapalibog ako, ‘Ginapaantos bala sang Dios ang mga tawo kag nalipay sia sa pagtan-aw sa ila?’

Sang 12 anyos ako, nagsugod ako nga mangamuyo sing namaz, ang lima ka pangamuyo sang Muslim kada adlaw. Apang ako kag ang akon magulang ginpaeskwela man ni Tatay sa eskwelahan sang mga Judiyo. Gintudluan man kami sing tradisyon sang mga Judiyo nga nabase sa Torah kag sing Hebreo nga lenguahe. Antes magsugod ang amon klase, kinahanglan mangamuyo kami suno sa tradisyon sang mga Judiyo. Gani kada aga, nagapangamuyo ako sing namaz sa balay kag sa eskwelahan, nagaupod man ako sa mga Judiyo kon mangamuyo sila.

Gusto ko gid masabat ang akon mga pamangkot. Pirme ko ginapamangkot ang mga rabbi sa eskwelahan: “Ngaa gintuga sang Dios ang mga tawo? Ano ang pagtamod sang Dios kay Muslim si Tatay? Maayo man sia nga tawo, ngaa nga ginakabig sia nga indi matinlo? Ngaa gintuga sia sang Dios?” Wala ako makumbinsi sa ila mga sabat.

Nadula ang akon pagtuo sa Dios sang 2002. Mga isa ka semana pa lang kami sa Germany, kag na-istrok si Tatay kag na-coma. Tinuig ako nga nagapangamuyo nga mangin maayo ang panglawas sang akon pamilya. Adlaw-adlaw ako nga nagapangamuyo  para sa kabuhi ni Tatay kay kumbinsido ako nga ang Labing Gamhanan may gahom sa kabuhi kag kamatayon. Sa pensar ko, ‘Diutay gid lang nga butang nga pamatian sang Dios ang pangabay sang gamay nga bata.’ Sigurado gid ako nga sabton niya ang akon pangabay. Pero napatay si Tatay.

Nasubuan gid ako nga wala ako ginpamatian sang Dios. ‘Sayop siguro ang pangamuyo ko,’ pangatarungan ko, ‘ukon wala sing Dios.’ Nag-untat ako sa pagpangamuyo sing namaz. Nadula ang akon interes sa relihion, amo nga naghinakop ako nga wala sing Dios.

Pagligad sang anom ka bulan, nanuktok sa balay ang mga Saksi ni Jehova. Bangod ginapakanubo namon ang Cristianismo, gusto namon sang akon magulang nga ipakita sa ila sing matinahuron nga sala ang ila pagpati. Ginpamangkot namon sila: “Ngaa ginasimba sang mga Cristiano si Jesus, ang krus, si Maria, kag ang iban nga idolo kay supak ini sa Napulo ka Sugo?” Ginpakita sang mga Saksi halin sa Biblia ang mga pamatuod nga ginadilian ang matuod nga mga Cristiano sa pagsimba sa mga idolo kag dapat nga sa Dios lamang mangamuyo. Nakibot gid ako.

Dayon namangkot kami: “Indi bala nga nagapati man kamo sa Trinidad? Kon si Jesus Dios, ngaa nagkabuhi sia diri sa duta kag ginpatay sang mga tawo?” Ginsabat nila liwat paagi sa Biblia kag ginpaathag nga si Jesus indi ang Dios kag indi tupong sa Iya. Ginpaathag sang mga Saksi nga amo ini ang rason nga wala sila nagapati sa Trinidad. Natingala ako kag nagsiling ako sa akon kaugalingon, ‘Daw katingalahan ini sila nga mga Cristiano.’

Pero, gusto ko gihapon mahibaluan kon ngaa nagakapatay ang mga tawo kag ngaa ginatugutan sang Dios nga mag-antos kita. Ginpakita sang mga Saksi sa akon ang libro nga Ang Ihibalo nga Nagadul-ong sa Kabuhi nga Walay Katapusan, * nga may mga kapitulo nga nagasabat sang akon mga pamangkot. Ginsugdan nila dayon nga tudluan ako sing Biblia.

Sa kada pagtuon namon, nasabat gid ang akon mga pamangkot paagi sa Biblia. Nahibaluan ko nga Jehova ang ngalan sang Dios. (Salmo 83:18) Ang iya panguna nga kinaiya amo ang gugma. (1 Juan 4:8) Gintuga niya ang mga tawo kay gusto niya nga ipaambit ang regalo nga kabuhi. Nahangpan ko nga bisan ginatugutan sang Dios ang inhustisya, ginakaugtan niya ini kag dulaon niya ini sing permanente. Natun-an ko nga nahalitan gid ang katawhan sang pagrebelde nanday Adan kag Eva. (Roma 5:12) Ang resulta sini amo ang kamatayon sang aton mga hinigugma, lakip na si Tatay. Pero, dulaon ini sang Dios sa bag-ong kalibutan kay banhawon niya ang mga patay.—Binuhatan 24:15.

Nasabat gid sang Biblia ang akon mga pamangkot. Nagpati ako liwat sa Dios. Sang makilala ko pa gid ang mga Saksi ni Jehova, narealisar ko nga may bug-os kalibutan sila nga paghiliutod. Nagdayaw gid ako sa ila paghiusa kag gugma. (Juan 13:34, 35) Napahulag gid ako nga alagaron si Jehova tungod sang akon natun-an, amo nga nagdesisyon ako nga mangin isa sang mga Saksi ni Jehova. Nagpabawtismo ako sang Enero 8, 2005.

Nagbag-o ang akon pagtamod sa kabuhi bangod sang makapakumbinsi nga mga sabat sang Biblia. Nangin matawhay ang akon hunahuna bangod sang makatarunganon nga mga paathag sang Pulong sang Dios. Nalipay gid ako nga bangod sang pagkabanhaw nga ginasaad sa Pulong sang Dios makita ko liwat si Tatay.—Juan 5:28, 29.

Anom ka tuig na kami nga minyo sang akon diosnon nga bana nga si Jonathan kag malipayon gid kami. Natun-an namon nga ang kamatuoran sang Dios simple kag makatarunganon, pero bilidhon. Amo kon ngaa nalipay gid kami nga isugid man sa iban ang amon pagtuo kag paglaum. Subong, nahibaluan ko na nga ang mga Saksi ni Jehova indi “katingalahan” kundi matuod nga mga Cristiano.