Ang sobra nga kaimulon nagapatay sang minilyon kada tuig bangod sang malnutrisyon kag balatian. Bisan pa may mga bahin sang kalibutan nga manggaranon, mas madamo nga tawo ang tama ka imol. Ginapakita sang Biblia nga ang kaimulon madugay na nga problema sang mga tawo.—Basaha ang Juan 12:8.

Agod madula ang kaimulon, kinahanglan ang isa ka gobierno sa kalibutan. Ina nga gobierno dapat may gahom sa pagpanagtag sa kinahanglanon sang tawo sing alalangay kag makapauntat sang mga inaway, nga amo ang panguna nga rason sang kaimulon. Ginsaad sang Dios ina nga gobierno.—Basaha ang Daniel 2:44.

Gintangdo sang Dios ang iya Anak, si Jesus, nga maggahom sa tanan nga tawo. (Salmo 2:4-8) Luwason ni Jesus ang mga imol kag dulaon niya ang pagpamigos kag pagpamintas.—Basaha ang Salmo 72:8, 12-14.

Subong ang gintagna nga “Prinsipe sang Paghidait,” paluntaron ni Jesus ang paghidait kag kalig-unan sa bilog nga kalibutan. Dayon ang tanan sa duta magaistar sa ila kaugalingon nga balay, may makalilipay nga trabaho, kag madamo sing pagkaon.—Basaha ang Isaias 9:6, 7; 65:21-23.