Ano ang natabo? Ngaa wala nakig-away ang Dios para sa mga Judiyo, subong sang ginhimo niya sang una? Ukon ngaa wala niya sila ginsugo nga makig-away agod mahilway sila sa pagpamigos? Nagbag-o bala ang pagtamod sang Dios sa inaway? Wala. Apang may daku nga pagbag-o sa mga Judiyo. Ginsikway nila ang Anak sang Dios nga si Jesus subong Mesias. (Binuhatan 2:36) Gani subong isa ka pungsod, nadula nila ang ila pinasahi nga kaangtanan sa Dios.—Mateo 23:37, 38.

Ang Judiyo nga katawhan kag ang Ginsaad nga Duta wala na ginaamligan sang Dios, kag indi na makasiling ang mga Judiyo nga ginasakdag ukon ginabuligan sila sang Dios sa ila pagpakig-away. Subong sang gintagna ni Jesus, ang mga pagpakamaayo nga naangot sa kahamuot sang Dios ginkuha sa undanon nga pungsod sang Israel kag ginhatag sa isa ka bag-o nga pungsod, ang espirituwal nga pungsod nga sang ulihi gintawag sang Biblia nga “Israel sang Dios.” (Galacia 6:16; Mateo 21:43) Ang kongregasyon sang hinaplas sang espiritu nga mga Cristiano amo na ang espirituwal nga Israel sang Dios. Gani sang unang siglo, ginsilingan sila: ‘Karon katawhan na kamo sang Dios.’—1 Pedro 2:9, 10.

Bangod ang unang siglo nga mga Cristiano amo na ang ‘katawhan sang Dios,’ nakig-away bala ang Dios para sa ila agod mahilway sila sa pagpamigos sang mga Romano? Ukon ginsugo bala niya sila nga makig-away sa mga nagapigos sa ila? Wala. Ngaa? Kon parte sa ginsugo sang Dios nga inaway, ang Dios lamang ang nagadesisyon kon san-o dapat makig-away, subong sang ginpakita sang ginsundan sini nga artikulo. Wala nakig-away ang Dios para sa mga Cristiano sang unang siglo, kag wala man niya sila ginsugo nga makig-away. Maathag nga ang unang siglo, indi amo ang gintalana nga tion nga makig-away ang Dios sa mga malauton kag nagapamigos.

Gani, kaangay sang mga alagad sang Dios sang dumaan nga tion, ang mga Cristiano sang unang siglo dapat maghulat tubtob mag-abot ang tion nga tapuson sang Dios ang kalautan kag pagpamigos. Samtang wala pa ini, wala sila gintugutan sang Dios nga makig-away batok sa ila mga kaaway. Maathag nga ginpakita ini ni Jesucristo sa iya mga panudlo. Halimbawa, wala niya ginsugo ang iya mga sumulunod nga makig-away, sa baylo ginsilingan sila: “Padayon nga higugmaa ang inyo mga kaaway kag padayon nga ipangamuyo ang mga nagahingabot sa inyo.” (Mateo 5:44) Sang nagtagna si Jesus tuhoy sa tion nga salakayon sang mga soldado sang Roma ang Jerusalem sang unang siglo, ginsugo niya ang iya mga disipulo nga indi magpabilin kag makig-away, kundi magpalagyo—kag amo gid sini ang ginhimo nila.—Lucas 21:20, 21.

Dugang pa, sa panuytoy sang Dios, si apostol Pablo nagsiling: “Indi kamo magtimalos, . . . kay nasulat na: ‘Akon ang pagtimalos; ako ang magabalos,’ siling ni Jehova.” (Roma 12:19) Ginkutlo ni Pablo ang ginsiling  sang Dios siniglo antes sini nga mabasa sa Levitico 19:18 kag Deuteronomio 32:35. Subong sang ginpakita sang ginasundan sini nga artikulo, ang isa ka paagi nga nagatimalos ang Dios para sa iya katawhan sang dumaan nga tion amo ang pagbulig sa ila sa pagpakig-away batok sa ila mga kaaway. Gani ginapakita sang mga tinaga ni Pablo nga wala nagbag-o ang pagtamod sang Dios sa inaway. Sang unang siglo, ginatamod gihapon sang Dios ang inaway subong makatarunganon nga paagi para itimalos sang Dios ang iya mga alagad kag tapuson ang tanan nga sahi sang pagpamigos kag kalautan. Apang kaangay sang una, ang Dios lamang ang magadesisyon kon san-o magapakig-away kag kon sin-o ang magapakig-away.

Maathag nga wala ginsugo sang Dios ang mga Cristiano sang unang siglo nga makig-away. Kamusta naman karon? May ginasugo bala ang Dios nga grupo sang mga tawo para makig-away? Ukon karon na bala ang tion nga magapasilabot ang Dios kag makig-away para sa iya mga alagad? Ano ang pagtamod sang Dios sa inaway karon? Ini nga mga pamangkot sabton sang katapusan nga artikulo sa sini nga serye.