Suno sa Biblia, ang hari sang Israel nga si David nagkabuhi sang ika-11 nga siglo B.C.E. kag ang iya mga kaliwat naghari sing ginatos ka tuig. Pero may mga kritiko nga wala nagapati sa sini, kag nagsiling sila nga ang istorya parte kay David ginhimuhimo lang. Matuod gid bala nga tawo si Hari David?

Sang 1993, may nadiskobrehan ang isa ka arkeologo nga si Avraham Biran kag ang iya grupo sa Tel Dan, sa naaminhan nga Israel. Isa ini ka bato nga ginsulatan sang ikasiam nga siglo B.C.E. Nakatigib diri ang mga tinaga nga “Panimalay ni David” sa dumaan nga Semitic nga lenguahe. Ang bato isa ka bahin sang monumento nga ginpatukod sang mga Arameanhon nga nagapabugal sang ila mga kadalag-an batok sa mga Israelinhon.

Suno sa isa ka artikulo sa Bible History Daily, may iban nga nagasiling nga ang natigib sa bato nga “Panimalay ni David” wala nagapamatuod nga may hari gid sang una nga si David. Pero ang kalabanan nga mga eksperto sa Biblia kag mga arkeologo nagapati nga ang bato nga nakita sa Tel Dan amo ang una nga masaligan nga pamatuod nga si Hari David, nga mabasahan sa Biblia, isa gid ka matuod nga tawo. Ang artikulo nagsiling man nga isa ini sa pinakaimportante nga nadiskobrehan sang mga arkeologo nga ginsulat sang BAR [Biblical Archaeology Review].