Natalupangdan mo bala nga madamo nga relihion ang nagapanguarta lang sa baylo nga buligan ang mga tawo sa pagsimba sa Dios? Gina-advertise kag ginapabayaran nila ang ila ginahimo nga mga serbisyo kag nagapamaligya man sila. Madamo nga lider sang relihion ang may dalagku nga sueldo kag manggaranon sila kaayo. Binagbinaga ang pila ka halimbawa:

•   May ginhimo nga imbestigasyon sa isa ka Katoliko nga obispo. Nakita nga sa sulod sang 13 ka tuig, gingamit niya ang pondo sang simbahan para bayaran ang halos 150 niya ka pagbiyahe sakay sa private jet kag ang mga 200 niya ka pagbiyahe sakay sa limousine. Dugang pa, sobra sa apat ka milyon ka dolyar ang iya gingasto sa pagpa-renovate sang iya ginaistaran nga balay nga iya sang simbahan.

•   Ang isa ka preacher sa isa ka pungsod sa Africa regular nga nagawali sa iya simbahan kag linibo ang nagatambong. Ining daku nga simbahan nangin balaligyaan sang madamo nga mga butang. Lakip sa sini ang lana nga makapaayo kuno sang mga balatian, kag mga tualya kag mga T-shirt nga may mga piktyur niya. Ang kalabanan nga nagatambong sa iya simbahan mga pigado, pero sia ’ya puerte ka manggaranon.

•   May apat ka sagrado nga bukid sang mga Budhista sa China, kag ang duha sini nalista bilang mga kompanya. Kag ang sikat nga Shaolin Temple madamo naman sing negosyo, kag ang lider gani nila nga monghe ginatawag nga manedyer.

•   Ang mga kompanya sa bilog nga America nagabayad sang mga tawo para maghimo sing relihioso nga mga ritwal kag magwali sa ila mga trabahador.

 Ano ang ginabatyag mo parte sa mga relihion nga naganegosyo? Napamensaran mo na bala kon ano ang ginabatyag sang Dios sa mga tawo nga ginagamit ang ila relihion para makapanguarta?

 Wala gid nalipay ang Dios sa mga tawo nga ginagamit ang relihion para magnegosyo. Ginapakita sang Biblia nga sang una, naakig gid si Jehova sa mga saserdote kay nagapangangkon sila nga nagasimba sa iya pero nagapanudlo sila “tungod sa bayad.” (Miqueas 3:11) Naugot gid ang Dios sa madaya nga mga negosyante kay ginhimo nila ang iya lugar sang pagsimba nga “isa ka kueba sang mga kawatan.”—Jeremias 7:11.

 Pareho sa Dios, naugot man si Jesus sa mga tawo nga ginagamit ang ila relihion para makapanguarta. Sang panahon niya, ginpasugtan sang mga lider sang relihion ang mga negosyante nga magnegosyo sa sulod sang templo sa Jerusalem. Ginhimo nila ini kay daku ang ginabayad sang mga negosyante sa ila. Pero ginapanguartahan lang sini nga mga negosyante ang sinsero nga mga tawo nga nagakadto sa templo para magsimba. Maisog nga gintabog ni Jesus ining madaya nga mga negosyante pagua sa templo kag ginsilingan sila: “Untati ninyo ang paghimo sa balay sang akon Amay nga isa ka balaligyaan!”—Juan 2:14-16.

 Sang nagministeryo si Jesus, ginsunod man niya ang panghunahuna sang Dios. (Juan 8:28, 29) Sang gintudluan niya ang mga tawo parte sa Dios, wala sia nagpabayad. Wala man sia nagpabayad sang naghimo sia sing mga milagro pareho sang pagpakaon niya sa mga ginagutom, pag-ayo niya sa mga nagamasakit, kag pagbanhaw niya sa patay. Wala gingamit ni Jesus ang iya ministeryo para makakuarta sia kag mangin manggaranon kay wala gani sia bisan sang iya kaugalingon nga balay.—Lucas 9:58.

 Ginsilingan ni Jesus ang iya mga sumulunod nga indi nila paggamiton ang mga hilikuton may kaangtanan sa ila pagsimba para makapanguarta. Nagsiling sia: “Nakabaton kamo nga wala sing bayad, gani maghatag kamo nga wala sing bayad.” (Mateo 10:8) Ginsunod gid sang mga sumulunod ni Jesus sadto, nga nakilal-an bilang mga Cristiano, ang iya mga ginsiling. Binagbinaga ang pila ka halimbawa:

•   Si apostol Pedro nga nakaupod ni Jesus sa iya ministeryo, gintanyagan sang kuarta sang isa ka tawo nga si Simon, kay gusto niya nga makabaton man sia sing gahom kag awtoridad. Pero wala ginbaton ni Pedro ang kuarta ni Simon, kag ginsaway niya sia. Si Pedro nagsiling: “Kabay pa nga madula ka kag ang imo kuarta, bangod ginhunahuna mo nga mabakal mo ang wala sing bayad nga dulot sang Dios.”—Binuhatan 8:18-20.

•   Kilala si apostol Pablo bilang isa ka nagalakbay nga ministro. Nagpangabudlay gid sia para mag-alagad sa madamo nga Cristianong kongregasyon sa sulod sang mga tinuig. Pero wala niya ini gingamit para makapanguarta sia. Sia kag ang kaupod niya nga mga Cristiano ‘indi manuglibod sang pulong sang Dios kaangay sang madamo nga tawo.’ (2 Corinto 2:17) Sa baylo, si Pablo nagsulat: “Nagapangabudlay kami sa adlaw kag gab-i, agod indi kami makapabug-at sa pinansial sa bisan isa sa inyo sa pagbantala namon sa inyo sang maayong balita sang Dios.”—1 Tesalonica 2:9.

 Siempre, kinahanglan man sang mga Cristiano sadto ang kuarta para makabantala sila sa madamo nga lugar kag mabuligan ang iban. Bisan pa ginabuligan nila ang mga tawo sa pagsimba sa Dios, wala sila nagapabayad. Pero kon gusto maghatag sang mga tawo sing kuarta, puede nila ini himuon base sa masunod nga mga prinsipio:

•   2 Corinto 8:12: “Ang dulot nga tinagipusuon labi nga kalahamut-an sa Dios, bangod ginapaabot sang Dios nga maghatag ang isa ka tawo suno sa yara sa iya, indi suno sa wala sa iya.”

   Buot silingon: Mas importante ang motibo sang nagahatag sangsa kon pila ang iya ginahatag.

•   2 Corinto 9:7: “Maghimo ang kada isa suno sa ginpamat-od niya sa iya tagipusuon, indi sing paganot ukon napilitan, kay ginahigugma sang Dios ang nagahatag sing malipayon.”

   Buot silingon: Indi gusto sang Dios nga napilitan ka lang sa paghatag. Nalipay sia kon ang isa ka tawo kinabubut-on nga maghatag bangod gusto niya.

 Maathag nga ginatudlo sang Biblia nga wala ginabaton sang Dios ang tanan nga relihion ukon ang tanan nga paagi sang pagsimba. (Mateo 7:21-23) Sa isa ka tagna sa Biblia, ginpaanggid sini ang tanan nga butig nga relihioso nga organisasyon sa isa ka makihilawason nga babayi. Ngaa? Bangod nakig-alyansa sila sa mga gobierno para makakuarta sila ukon makabaton sang iban nga pabor, kag nabiktima nila ang mga tawo sa tanan nga pungsod. (Bugna 17:1-3; 18:3) Ginapakita sini nga tagna nga sa indi na lang madugay, hukman sang Dios ang tanan nga butig nga relihion.—Bugna 17:15-17; 18:7.

 Samtang wala pa ini matabo, indi gusto sang Dios nga madaya ang mga tawo ukon mapahilayo ang mga tawo sa iya bangod sa malain nga ginahimo sang butig nga relihion. (Mateo 24:11, 12) Ginpalig-on niya ang sinsero nga mga tawo nga hibaluon kon paano nila sia maalagad sing insakto. Ginapalig-on man niya sila nga maghalin sa butig nga relihion.—2 Corinto 6:16, 17.