Sa Hulyo kag Agosto 2020, matan-aw sang mga kauturan sa bilog nga kalibutan ang pareho nga programa sang rehiyonal nga kombension. Subong pa lang matabo nga amo sini ang kahimusan sang kombension. Para mangin posible ini, ang ginrekord nga mga pamulongpulong kag mga video dapat ma-translate sa sobra 500 ka lenguahe. Sa normal nga sitwasyon, mga isa ka tuig ukon sobra pa ang kinahanglan nga tion para maplano ini nga proyekto, kag marekord kag ma-translate ang mga pamulongpulong kag mga video. Pero bangod sang mga sitwasyon nga resulta sang coronavirus nga pandemic, halos apat na lang ka bulan ang nabilin para matapos sang mga translator ang 2020 ‘Magkasadya Pirme’! nga Rehiyonal nga Kombension.

 Ang Translation Services kag ang Global Purchasing sa World Headquarters sang mga Saksi ni Jehova nagbulig sa sining daku kaayo nga proyekto. Kabalo ang Translation Services nga madamo nga translation team ang nagakinahanglan sing dugang nga mga equipment, ilabi na sang maayo nga klase nga mga mikropono, para matapos ini nga proyekto. Gani, ang Global Purchasing nagbakal sang 1,000 ka mikropono kag ginpadala dayon ini sa halos 200 ka lokasyon.

 Para makakinot, tingob ang pagbakal sang mga mikropono kag ginpadeliber ini sa isa ka lokasyon, dayon gin-repack ini para mapadala sa mga translator sa bilog nga kalibutan. Bangod tingob ang pagbakal sang mga mikropono, ginabulubanta nga $170 U.S. ang presyo sang kada isa, lakip ang bili sang pagpadala. Mas barato ini sing sobra 20 porsiento sangsa kon ginbakal ini sing tag-isaisa.

 Kinahanglan ini mabakal kag mapadala sang Global Purchasing sang Abril kag Mayo 2020, sa tion nga limitado ang operasyon sang madamo nga kompanya bangod sang pandemic. Pero antes matapos ang Mayo, nabaton na sang mga remote translation office, branch office, kag iban pa nga mga lokasyon ang kinahanglanon nga mga equipment.

 “Maayo gid ang kooperasyon sang mga department sa Bethel kag sang sarisari nga mga kompanya para sa sini nga proyekto,” siling ni Jay Swinney, nga nagadumala sang Global Purchasing. “Madasig namon ini nga nahimo kag nagamit sa pinakamaayo nga paagi ang mga donasyon bangod lamang sa bulig sang espiritu ni Jehova.”

 Si Nicholas Ahladis, nga nagaalagad sa Translation Services, nagsiling: “Ang mga translator nga na-lockdown sina nga tion napalig-on gid sang nabaton nila ang mga equipment. Bisan pa indi makaupdanay ang mga translator, makabuligay sila gihapon para ma-translate kag marekord ang mga pamulongpulong, drama, kag mga kanta sa sobra 500 ka lenguahe.”

 Ini nga proyekto isa lang sa madamo nga mga hilikuton para maobra ang 2020 ‘Magkasadya Pirme’! nga Rehiyonal nga Kombension para sa mga kauturan sa bilog nga kalibutan. Ang imo maalwan nga mga donasyon paagi sa donate.ps8318.com kag sa iban pa nga paagi amo ang gingamit sa pagbakal sining kinahanglanon nga mga equipment.