Sang 2017, nagbiyahe paagi sa lantsa ang 12 ka Saksi halin sa rehiyon sang Mosquito (Miskito) Coast sa Nicaragua. Ang ila lantsa may ngalan nga Sturi Yamni. Ang isa sa ila nga si Stephen, nagsiling: “Tuyo namon nga palig-unon ang isa ka diutay nga grupo sang mga Saksi nga nagaistar sa malayo kaayo nga lugar kag buligan sila nga mabantala ang maayong balita sa ila malapad katama nga teritoryo.”

 Ginsugdan sining 12 ka Saksi ang ila 200 kilometros nga biyahe sa Pearl Lagoon pailaya sa Río Grande Matagalpa. Wala gid sa ila pensar nga ang ngalan sang ila lantsa, nga buot silingon “Maayong Balita” sa Miskito nga lenguahe, makatigayon sing espesyal nga kahulugan sa mga tawo nga nagaistar sa pangpang sang suba. Pagligad sang mga 12 ka oras nga pagpanakayon, wala labot sa isa ka gab-i nga pagpahuway, nakalab-ot gid man ang mga Saksi sa ila kaladtuan nga amo ang komunidad sang La Cruz de Río Grande. Malipayon nga gin-abiabi sang anom ka Saksi nga nagaistar diri ang ila mga kauturan nga nag-abot.

 Sina nga gab-i naglain ang tiempo, kag grabe kabunok sang ulan sa puno sang Río Grande de Matagalpa. Pagligad lang sang pila ka oras, naglambas na ang suba kag padayon ini nga nagdalom sa sulod sang duha ka adlaw. Ginbahaan ang Kingdom Hall kag ang madamo nga pamalay sa La Cruz. Ang nag-abot nga mga Saksi nagbulig sa mga pumuluyo didto nga makabakwit, kag ang kalabanan sa ila didto nagpaligad sang duha ka gab-i sa balay sang isa ka Saksi nga may ikaduha nga panalgan.

 Sang ikatlo nga gab-i, ang meyor sang La Cruz nagkadto sa ila para mangabay sang bulig sa nagbisita nga mga Saksi. Ang Sturi Yamni amo lamang ang makasarang magbiyahe sa nagabaha nga suba, gani gusto sang meyor nga gamiton ini para sakyan sang mga relief worker pailawod para mabuligan ang iban nga komunidad nga apektado man. Nalipay gid ang mga Saksi sa pagbulig.

 Pagkaaga, tatlo ka Saksi ang naglakat upod sa relief team. “Grabe gid ang baha,” siling ni Stephen. “Nagakaanod ang dalagku nga mga kahoy, may dalagku nga mga alimpuros, kag kasulog sang tubig nga nagalab-ot sa kadasigon nga sobra 18 kilometros kada oras.” Pero bisan amo sini kabudlay, nakalab-ot ang amon lantsa sa tatlo ka komunidad.

 Gingamit sang tatlo ka Saksi ini nga kahigayunan para masugid sa mga nagaistar sa sini nga mga komunidad ang paumpaw nga kinahanglan gid nila. Ginhatagan man sila sang mga Saksi sang kopya sang 2017 nga gua sang Magmata! nga may tig-ulo nga “Mga Dapat Himuon Kon May Kalamidad.”

 Ang pumuluyo sang mga komunidad sa pangpang sang suba nalipay gid sa praktikal nga bulig kag sa pagpalig-on halin sa Biblia nga nabaton nila halin sa mga Saksi. “Nagabulig gid sila sa tion sang kabudlayan,” siling sang pila ka pumuluyo. Ang iban pa nagsiling: “Matuod gid ang ila gugma sa ila isigkatawo.” Sang makita nila ang pagpangabudlay sang mga Saksi para mabuligan ang pareho nila nga mga Saksi kag ang iban pa, madamo nga pumuluyo ang nangin interesado sa pagpamati sa makapaumpaw nga mensahe sang Biblia.