Si Bryn nga nagaistar sa North Carolina, U.S.A., isa ka miembro sang Hospital Liaison Committee sa sina nga lugar. Nagakadto sia sa mga ospital para atipanon ang mga kinahanglanon sang mga pasyente nga mga Saksi ni Jehova.

 Bangod sa COVID-19 nga pandemic, madamo nga ospital ang wala na nagsugot nga magbaton sang bisita. Gintawgan ni Bryn ang direktor sang pastoral care sa isa ka ospital para mamangkot kon paano niya mabuligan ang mga pasyente nga Saksi.

 Naistorya ni Bryn ang assistant sang direktor. Bangod indi puede makabisita sa ospital, ginpangabay ni Bryn ang assistant kon bala puede mahatag sa mga pasyente nga Saksi ang iya phone number para maistorya niya sila. Nagpasugot ang assistant.

 Nadumduman dayon ni Bryn ang mga staff sa ospital. Ginsilingan niya ang assistant nga nagapasalamat gid sia sa ginahimo sa ospital kag tani OK lang ang mga staff. Nagsiling pa sia nga nabasa niya nga grabe gid ang stress sang mga tawo bisan diin bangod sa pandemic, ilabi na sang mga nagatrabaho sa ospital.

 Ang assistant nagsiling nga bangod sa COVID-19, grabe gid ang stress sang kabuhi sa ospital.

 Si Bryn nagsiling: “Madamo sing impormasyon sa amon website nga makabulig sa mga tawo kon na-stress sila. Puede mo kadtuan ang jw.org kag i-type ang ‘stress’ sa Search field. Dayon, makita mo ang mga artikulo nga makabulig gid sa inyo mga staff.”

 Samtang nagaistoryahanay sila, ginkadtuan sang assistant ang website kag gin-type sa Search field ang tinaga nga “stress.” Nakita niya ang madamo nga artikulo parte sa stress. “Wow!” siling niya. “Ipakita ko ’ni sa amon direktor. Makabulig gid ’ni sa amon mga staff kag sa iban pa. I-print ko ’ni kag ipanghatag sa ila.”

 Pagligad sang pila ka semana, naistorya ni Bryn ang direktor. Nagsiling ang direktor nga ginbuksan nila ang website kag gin-print nila ang mga artikulo parte sa stress kag ang iban pa nga mga artikulo. Ginpanghatag nila ini sa mga nars kag sa mga staff sang ospital.

 Si Bryn nagsiling: “Nagpasalamat gid ang direktor sa aton mga ginahimo kag sa manami nga mga artikulo. Daku gid ang nabulig sini sa ila.”