Kon isa ka sa mga Saksi ni Jehova, maimadyin mo bala nga ginaupdan ka sang pulis samtang nagabantala sang maayong balita sa mga pamalay? Amo ina ang naeksperiensiahan ni Joseph sa Micronesia sang 2017. Upod sa tatlo pa ka Saksi, nakigbahin sila sa pinasahi nga kampanya para makadtuan ang mga nagaistar sa malayo nga mga isla.

 Udto na nag-abot ang apat ka Saksi sa gamay nga isla nga mga 600 ang nagaistar. Pagdungka nila, gintamyaw sila sang meyor sang isla. Ginsugid ni Joseph ang natabo: “Nagsiling ang meyor nga puede kami updan sang mga pulis sakay sa patrol para makadtuan ang tanan nga mga balay. Nakibot kami sa iya ginsiling, pero matinahuron namon ini nga ginpangindian. Gusto namon kadtuan ang mga tawo sa kinaandan nga paagi samtang nagapamalaybalay.”

 Gani naglakat ang mga manugbantala para bantalaan ang madamo nga tawo tubtob posible. “Maabiabihon gid ang mga tawo kag interesado gid sila sa aton mensahe,” siling sang mga Saksi. “Gani nadugayan kami sa pagpakig-istorya sa kada balay.”

 Sang hapon na, duha ka beses nga naglabay kay Joseph ang patrol kag sa ikatlo nga bes nagpundo ini. Ginpangabay sang mga pulis si Joseph kon bala puede nila sila maupdan pakadto sa mga balay nga bisitahan pa nila. “Nangindi ako,” siling ni Joseph. “Pero namilit gid sila kag nagsiling nga ‘diutay na lang ang oras ninyo nga nabilin, gani updan namon kamo sa mga balay nga wala pa ninyo makadtuan.’ Wala ko na sila ginpangindian kay may mga balay pa nga dapat namon kadtuan. Samtang nagapakadto kami sa kada balay, ginasugiran kami sang mga pulis sang apelyido sina nga pamilya kag nagsiling sila nga kon wala sing may maggua kon manuktok kami, bosinahan nila ang tagbalay para maggua ini.

 “Paagi sa ila bulig, nakadtuan namon ang tanan nga balay sa sina nga adlaw. Madamo kami sing napaambit nga mga literatura kag naghimo sing kahimusan nga balikan ang mga tawo nga interesado.”

 Ginsilingan sang mga pulis si Joseph nga “nanamian gid sila sa pagpaambit sang maayong balita.” Sirom na sang nagpauli ang mga Saksi, kag ang mga pulis nagbabay sa ila samtang nagayuhum kag nagauyat sang base sa Biblia nga mga literatura.