Si Danielle, isa sa mga Saksi ni Jehova sa South Africa, nakakita sang bag nga nabilin sang isa ka kostumer sa coffee shop. Wallet nga may kuarta kag mga credit card ang sulod sang bag. Determinado gid si Danielle nga ibalik ang bag sa tag-iya sini, gani ginpangita niya ang adres ukon numero sang telepono pero ngalan lang sang tag-iya ang iya nakita. Gintinguhaan man niya nga makontak ang tawo paagi sa bangko sini pero wala sia nagmadinalag-on. Pero wala gid nag-untat si Danielle sa pagpangita sa tawo. Gintawgan niya ang numero sang telepono nga ara sa reseta sang doktor nga nakita niya sa bag. Ang receptionist nga nagsabat sa telepono nagpasugot nga ihatag ang numero sang telepono ni Danielle sa tawo.

 Nakibot ang tawo sang nakabaton sia sang tawag halin sa clinic sang iya doktor kag ginsugiran sia nga nakita ni Danielle ang iya bag kag gusto nga ibalik ini sa iya. Sang nag-abot ang tawo para kuhaon ang iya bag, gintamyaw sia ni Danielle kag sang iya amay. Ginhingalitan nila ang kahigayunan nga sugiran sia kon ngaa nagtinguha gid sila nga pangitaon sia. Ginpaathag nila nga bilang mga Saksi ni Jehova, ginatinguhaan gid nila nga magkabuhi suno sa mga prinsipio sang Biblia. Amo kon ngaa gusto gid nila mangin bunayag ukon honest sa tanan nga tion.—Hebreo 13:18.

 Pagligad sang pila ka oras, nag-message ang tawo kay Danielle kag sa iya amay kag nagpasalamat liwat kay ginbalik nila ang iya bag kag wallet. Nagsiling sia: “Salamat gid kay gintinguhaan gid ninyo nga makita ako. Nalipay ako nga makilala ka kag ang imo pamilya. Indi ko gid malipatan ang inyo kabuot. Para magpasalamat sa inyo, gusto ko nga maghatag sang donasyon. Kabalo ako nga nagasakripisyo kamo para maalagad ang Dios. Ang inyo ginhimo pamatuod gid nga maayo kamo nga mga tawo, kay si Danielle nangin honest kag may integridad. Sa liwat, salamat sa inyo kag kabay nga pakamaayuhon sang Dios ang inyo ministeryo.”

 Pagligad sang pila ka bulan, nakaistoryahanay liwat ang amay ni Danielle kag ang tawo. Ang tawo nagsiling nga sining karon lang, samtang naga-shopping, may nakita sia nga wallet. Sang nakita niya ang babayi nga tag-iya sang wallet, ginbalik niya ini. Dayon, ginpaathag niya nga ginbalik niya ang wallet kay amo man sina ang ginhimo sa iya sang nakakita sang iya wallet. Nagsiling sia: “Ang isa ka simple nga pagpakita sang pagka-honest kag kaayo makapahulag sa isa nga maghimo sing pareho man, kag maayo gid ang epekto sini sa tanan sa komunidad.”