Huo. Gintagna sang Biblia nga magalala gid ang batasan sang mga tawo subong. Maganubo ang moral sang mga tawo kag balewalaon nila ang maayo nga mga pamatasan. a (2 Timoteo 3:1-5) Pero gintagna man sang Biblia nga may mga tawo nga indi maimpluwensiahan sini. Kay buligan sila sang Dios nga matun-an kon paano nila Sia mapalipay paagi sa ila ginahunahuna kag ginahimo.—Isaias 2:2, 3.

Sa sini nga artikulo

•  Ano ang gintagna sang Biblia nga mangin panghunahuna kag paggawi sang mga tawo subong?

•  Kon kaugalingon lang ang ginapensar sang mga tawo, ano ang mangin epekto sini sa iban?

•  Ngaa magalain pa gid ang batasan sang mga tawo?

•  Bangod nagalain na gid ang batasan sang mga tawo, ano dapat ang aton mangin reaksion?

•  Magalain bala ang batasan sang tanan nga tawo?

•  Magalab-ot gid bala sa punto nga indi na makontrol ang kinagamo sa kalibutan?

 Ginsugid sang Biblia ang indi maayo nga mga batasan kag paggawi nga mangin ordinaryo na lang sa mga tawo. Amo sini ang matabo, bangod kaugalingon lang nila ang ila ginapensar. Ang mga tawo “wala sing pagpugong sa kaugalingon,” “mahigugmaon sa kaugalingon,” kag “mahigugmaon sa kinasadya sa baylo nga mahigugmaon sa Dios.”—2 Timoteo 3:2-4.

 Natuman gid ini nga tagna kay ang ginapensar lang sang mga tawo subong amo ang ila kaugalingon, kon ano ang makapaayo sa ila, kon ano ang gusto nila, kag kon ano ang sa banta nila nga makapalipay sa ila, kag iban pa. Ordinaryo na lang ini subong kag may mga grupo pa gani nga ginatawag nga “Me Generation.” Dugang pa, madamo nga tawo subong ang nakapokus lang sa ila kaugalingon amo nga “wala [sila] sing gugma sa kon ano ang maayo,” kag indi nila gusto nga magpakita sing maayo nga mga kinaiya. ‘Indi man sila mapinasalamaton,’ kay para sa ila indi nila kinahanglan nga pasalamatan ang mga butang nga ara sa ila ukon ang ginhimo sang iban sa ila.—2 Timoteo 3:2, 3.

 May iban pa nga indi maayo nga mga batasan ang mga tawo bangod kaugalingon lang nila ang ila ginapensar. Gintagna man sang Biblia ini nga mga batasan:

•   Sakon. Madamo nga tawo ang “mahigugmaon sa kuarta.” Para sa ila madinalag-on sila kon daku ang ila kita ukon madamo ang ila manggad.—2 Timoteo 3:2.

•   Bugalon. Madamo subong ang “bugalon, matinaastaason,” kag “nagapahambog.” (2 Timoteo 3:2, 4) Pirme ginapabugal sini nga mga tawo ang ila mga ikasarang, mga kinaiya, ukon manggad.

•   Mabinutangbutangon. Madamo subong ang “manugpasipala” kag “mabinutangbutangon.” (2 Timoteo 3:2, 3) Pirme ginainsulto sini nga mga tawo ang iban ukon ang Dios ukon ginahimuan nila sila sing indi matuod nga istorya.

•   Matig-a sing ulo. Madamo nga tawo subong ang “indi mainunungon,” “indi magsugot sa bisan ano nga kasugtanan,” “maluib,” kag “matig-a sing ulo.” (2 Timoteo 3:2-4) Ini nga mga tawo wala nagapapierde, wala nagapamati sa panugda sang iban, kag wala man nila ginasunod ang mga kasugtanan nga ila ginhimo.

•   Mapintas. Madamo subong ang “mabangis,” ukon dasig maakig, nga nagaresulta sa pagpanakit kag kapintas.—2 Timoteo 3:3.

•   Malain. Gintagna ni Jesus ang “pagdamo sang kalautan” subong. (Mateo 24:12) Gintagna man niya nga madamo ang matabo nga “mga kinagamo.”—Lucas 21:9.

•   Wala sing pagpalangga sa pamilya. Madamo subong ang “indi matinumanon sa mga ginikanan” kag “indi mapinalanggaon [sa pamilya].” Bangod sini, madamo ang ginapabay-an, ginaabusuhan, kag ginasakit sang ila pamilya.—2 Timoteo 3:2, 3.

•   Nagapakunokuno nga diosnon. Madamo nga tawo ang “daw diosnon kon tulukon.” (2 Timoteo 3:5) Pero imbes nga himuon ang gusto sang Dios, ginasunod nila ang ginasiling sang mga lider sang relihion kay amo na ang gusto nila mabatian.—2 Timoteo 4:3, 4.

 Madamo nga tawo subong nga kaugalingon lang nila ang ila ginapensar. Bangod sini, madamo nga tawo ang nasakitan kag nag-antos. (Manugwali 7:7) Halimbawa, ang iban mahigugmaon sa kuarta, gani nagapangdaya sila kag nagapangilkil. May mga tawo man nga wala sing pagpalangga sa ila mismo pamilya, amo nga may mga kapamilya sila nga nagaka-depress kag gusto pa gani maghikog bangod sa pag-abuso. May mga tawo man nga maluib kag indi matutom, kag grabe gid nga kasakit ang mabatyagan sang ginluiban. Kag ini nga kasakit posible magdugay sa malawig nga tion.

 Ginasugid sang Biblia ang mga rason kon ngaa nagalain pa gid ang mga tawo:

•   Amat-amat nga nagakadula ang gugma sang mga tawo sa Dios kag sa ila isigkatawo. (Mateo 24:12) Bangod sini, mas ginauna sang mga tawo ang ila lang kaugalingon.

•   Gintagbong si Satanas nga Yawa sa duta halin sa langit. (Bugna 12:9, 12) Sugod sadto, ginaimpluwensiahan niya ang mga tawo nga maghimo sing malain kag unahon lang pirme ang ila kaugalingon.—1 Juan 5:19.

 Ang Pulong sang Dios nagsiling: “Magpalayo ka sa sini nga mga tawo.” (2 Timoteo 3:5, Maayong Balita nga Biblia) Indi buot silingon sini nga likawan naton ang tanan nga tawo. Kundi, likawan naton nga makig-abyan sa mga tawo nga indi diosnon kag kaugalingon lang ang ginapensar.—Santiago 4:4.

 Indi. Gintagna sang Biblia nga may mga tawo nga “nagapanghayhay kag nagapanghakroy tungod sa makangilil-ad nga mga butang nga ginahimo.” (Ezequiel 9:4) Indi sila pareho sa iban nga kaugalingon lang ang ginapensar, kag ginasunod nila ang mga kasuguan sang Dios. Ang ila mga ginahambal kag ginahimo lain gid sangsa kalabanan nga tawo. (Malaquias 3:16, 18) Halimbawa, indi nila gusto nga may kontra sila kag wala man sila nagaentra sa mga inaway kag pagpamintas.—Miqueas 4:3.

 Indi. Indi ina matabo, kay dali na lang dulaon sang Dios ang mga tawo nga hungod nga wala nagatuman sa iya mga sugo. (Salmo 37:38) Magahimo sia sing “bag-o nga duta” nga wala na sing kinagamo kag magaistar diri ang mahagop nga mga tawo sing wala katapusan. (2 Pedro 3:13; Salmo 37:11, 29) Ini nga paglaum matabo gid. Bisan subong, ginabuligan sang Biblia ang mga tawo nga magbag-o para masunod nila ang mga sugo sang Dios.—Efeso 4:23, 24.