Bilang espiritu nga tinuga, ang Yawa nagaistar sa indi makita nga duog. Pero indi ini kalayuhon nga impierno nga ginapaantos niya ang mga malauton, subong sang makita diri sa piktyur.

“Inaway sa langit”

 May tion nga si Satanas nga Yawa gintugutan nga maglibutlibot sa duog sang mga espiritu, kag makakadto sa atubang sang Dios kaupod sang matutom nga mga anghel. (Job 1:6) Pero ang Biblia nagtagna nga may “inaway sa langit” kag palayason si Satanas sa langit kag ‘itagbong sia sa duta.’ (Bugna 12:7-9) Ang kronolohiya sa Biblia kag ang mga hitabo sa kalibutan nagapamatuod nga ini nga inaway sa langit natabo na. Ang Yawa ari subong sa duta kag indi na sia puede sa langit.

 Buot bala silingon sini nga ang Yawa nagaistar sa isa ka espesipiko nga lugar sa aton planeta? Halimbawa, ang siudad sang Pergamo sadto ginasiling nga lugar “diin yara ang trono ni Satanas” kag “diin nagapuyo si Satanas.” (Bugna 2:13) Ang matuod, ini nga mga ekspresyon nagapatuhoy sa lapnag nga pagsimba kay Satanas sa sina nga siudad. Ang Biblia nagasiling nga ang Yawa nagagahom sa “tanan nga ginharian sang napuy-an nga duta,” gani ari sia diri sa duta pero wala sia nagaistar sa isa ka espesipiko nga lugar.​—Lucas 4:​5, 6.