Ang mga abyan makabulig para mangin malipayon kag madinalag-on ang aton kabuhi. Ang aton suod nga mga abyan may positibo nga impluwensia sa aton. Makabulig man sila para mangin mas maayo kita nga mga tawo.—Hulubaton 27:17.

 Pero ang Biblia nagasiling nga dapat naton pilion sing maayo ang aton mga abyan. Nagapaandam man ini nga mangin malain gid ang resulta kon makig-abyan kita sa indi maayo nga mga tawo. (Hulubaton 13:20; 1 Corinto 15:33) Kon amo sina nga klase sang mga abyan ang pilion sang isa ka tawo, posible gid nga makahimo sia sing sala nga mga desisyon ukon mahimo maglain ang iya batasan kag mga kinaiya.

Sa sini nga artikulo

•  Ano ang maayo nga abyan?

•  Sin-o ang pila sa maayo nga halimbawa sang mga mag-abyan nga mabasa sa Biblia?

•  Puede bala mangin abyan sang Dios ang isa ka tawo?

•  Mga teksto sa Biblia parte sa pag-abyanay

 Gintudlo sang Biblia nga ang pundasyon sang suod nga pag-abyanay indi lamang ang pareho nga mga hilig ukon mga hobby. Halimbawa, ang Salmo 119:63 nagasiling: “Abyan ako sang tanan nga nagakahadlok sa imo a kag sang mga nagatuman sang imo mga mando.” Talupangda nga ining manunulat sang Biblia nagsiling nga ang ginapili niya nga mga abyan amo ang mga tawo nga nagahimo sang mga butang nga nagapalipay sa Dios kag nagatuman sang Iya mga sugo.

 Ginasugid man sang Biblia ang mga kinaiya ukon batasan sang maayo nga mga abyan. Halimbawa:

•   “Ang matuod nga abyan nagahigugma sa tanan nga tion, kag isa ka utod nga masaligan sa tion sang kalisdanan.”—Hulubaton 17:17.

•   “May mga magkaupod nga handa maghalit sa isa kag isa, apang may abyan nga mas suod pa sangsa isa ka utod.”—Hulubaton 18:24.

 Ginatudlo sini nga mga bersikulo nga ang isa ka maayo nga abyan mainunungon, mapinalanggaon, mabuot, kag maalwan. Makasalig man kita nga ang isa ka maayo nga abyan magabulig sa aton kon may problema kita. Ang matuod nga abyan wala man nahadlok magsaway kon nakita niya nga mahimo kita mapahamak sa aton ginahimo ukon kon daw nagahana na kita nga maghimo sing sala nga desisyon.—Hulubaton 27:6, 9.

 Sa Biblia, may halimbawa sang suod nga mga mag-abyan. Mga tawo sila nga sarisari ang edad, ginhalinan, kultura, kag tindog ukon posisyon sa komunidad. Binagbinaga ang tatlo sa sini.

•   Si Rut kag si Noemi. Si Rut umagad ni Noemi kag mahimo nga malayo ang kinamagulangan ni Noemi sa iya. Dugang pa, indi pareho ang ila gindak-an nga kultura. Bisan pa sa sini, nangin suod sila nga mag-abyan kag palangga nila ang isa kag isa.—Rut 1:16.

•   Si David kag si Jonatan. Mahimo mga 30 ka tuig ang kinamagulangan ni Jonatan kay David. Pero nagsiling ang Biblia nga si David kag si Jonatan “suod nga mag-abyanay.”—1 Samuel 18:1.

•   Si Jesus kag ang iya mga apostoles. May awtoridad si Jesus sa iya mga apostoles, bangod sia ang ila manunudlo kag agalon. (Juan 13:13) Pero wala gid nagbatyag si Jesus nga indi sia dapat makig-abyan sa ila. Sa baylo, nangin abyan ni Jesus ang mga nagatuman sa iya mga panudlo. Nagsiling sia: “Ginatawag ko kamo nga mga abyan, bangod ang tanan nga butang nga nabatian ko sa akon Amay ginapahibalo ko sa inyo.”—Juan 15:14, 15.

 Huo, posible gid nga mangin abyan sang mga tawo ang Dios. Ang Biblia nagasiling: “Nagapakig-abyan Sia sing suod sa mga matarong.” (Hulubaton 3:32) Buot silingon, ang ginapili sang Dios nga mangin abyan niya amo ang mga tawo nga disente, honest, kag talahuron, kag nagatinguha nga sundon ang mga ginapatuman Niya parte sa kon ano ang insakto kag sala. Halimbawa, si Abraham nga isa ka tawo nga may pagtuo, gintawag sa Kasulatan nga abyan sang Dios.—2 Cronica 20:7; Isaias 41:8; Santiago 2:23.